طول السنة بتتعزم على أكل كام مرة؟ بتتفرج على التلفزيون بمعدل كام ساعة في اليوم وبتشوف قرايبك وحبايبك كام مرة في الشهر؟ احسبها وشوف النتيجة طلعلتك كام، لما يدخل عليك رمضان هتضرب الرقم ده في 4. المبالغات مش دايمًا وحشة خصوصًا في رمضان، اتصالات لعبت على الفكرة دي وقررت إن المبالغة تكون فكرة حملتها الجديدة والعروض اللي هتقدمها للمشتركين طول الشهر.

المبالغة في العروض ممكن تكون: تخفيض في سعر الدقيقة، هدايا أو وحدات زيادة كل يوم، إنترنت مجاني مثلا لمدة ساعة في اليوم، كلها دي حاجات ينفع أي شركة تقدمها كعرض للمشتركين بتوعها، بس لما تقرر تبالغ أوي وتعلي على نفسك زي ما اتصالات قررت، يبقى أي حد هيشحن كارت الشبكة، هياخد 28 ضعف الشحنة. بعد ما تتخض وتفتح بوقك وتقعد تحسب الكارت هيديك قد إيه، ممكن تسأل اشمعنى يعني 28؟ بعدها تفتكر إن كل كام يوم ويبدأ كاس العالم، اللي مصر بتشارك فيه لأول مرة من 28 سنة، حويط يا أشرف!

إعلان الحملة لعب بشكل ذكي على الصورة الذهنية اللي المشاهد مكونها عن مجموعة من الفنانين والمشاهير، بمعنى إن الصورة الذهنية المتاخدة عن نيللي كريم إنها بتقدم أدوار دراما ونكد واحتمال رمضان الجاي تخلينا نقطع شرايينا. أحمد فهمي راشق في كل حاجة، مسلسلات وأفلام وبرامج. محمد رمضان صوره بالعربيات والأسود والنمور ممكن تنزلك من الحنفية.. إلخ، كل واحد من المشاركين في إعلان اتصالات لو بالغوا في أدوارهم وعلّوا على نفسهم هيبقوا عاملين ازاي؟ 

الإعلان نجح إنه يعلم بسرعة مع الناس، لحن الأغنية اللي علق في الودن بسرعة وده كان سبب اختياره، كمان الكوميكيس والميمز الكتير اللي اتعملت على رقصة محمد رمضان اللي ظهر بيها في آخر الإعلان، كل ده ماكانش هيحصل غير لو المحتوى علق مع الناس. لكن أكيد الدليل الأكبر على النجاح متمثل في نسب المشاهدة، الإعلان عمل في فترة قليلة 43 مليون مشاهدة على يوتيوب و37 مليون على فيسبوك ولسه الأرقام بتزيد كل يوم، لكن الأرقام دي بتخليه الأعلى مشاهدة بين كل الحملات الإعلانية المنافسة.

اتفرج على الإعلان وشارك برأيك