عندي صديق كل ما يقولي رشحيلي فيلم، وأقوله عايزه بيتكلم عن إيه؟ يقولي Mind fuck. دي نوعية الأفلام اللي بتسحلك معاها وتخليك تفضل تفكر وأنت بتتفرج وبعد ما تخلص، واحتمال تفضل تعمل pause عشان تستوعب اللي بيحصل. النوع ده موجود كمان في الأفلام العربي، يمكن مش بنفس الشكل وطريقته مختلفة بس الأكيد انك هتفكر ألف مرة بعد الفيلم ودماغك هتتسحل. لو نويت تشوف منها متستناش فيلم شبه هوليوود استنى بس إنك تفكر في فكرة مختلفة.

أرض الخوف

ده من وجهة نظري أفضل حوار اتكتب في تاريخ السينما العربية، لدرجة إنك ممكن متتفرجش عليه وتفضل تسمعه بس. الفيلم بيحكي عن ظابط جتله مهمة إنه ينزل أرض الخوف ويغير اسمه ويعيش بشخصية تاجر مخدرات عشان يقدر يبعت تقارير صحيحة 100%، لكن الموضوع قلب جد وفضل حنينه لأرض الخوف حتى بعد خروجه منها. القصة أوسع من كده وبتتكلم عن تفاصيل تانية زي آدم والخروج من الجنة، فحاول تركز أكتر.

جنة الشياطين

ده الفيلم المصري الوحيد تقريبًا اللي بطله فضل ميت ومبينطقش واتعلقنا بيه برضه، الفيلم هيغير مفاهميك عن الموت والصداقة والناس اللي حواليك، ومش هيسحلك إلا لو أنت غاوي تتسحل يعني.

الاختيار

"احنا بنقابل مين في آخر السكة؟ بنقابل نفسنا"

إيه اكتر لحظة مرعبة للإنسان؟ غالبًا بتكون لما يتقابل مع نفسه مش مع حد تاني. الفيلم عن أخين توأم وأنت طول الفيلم مش هتعرف مين فيهم اللي بيتكلم عشان المشاكل النفسية اللي عند واحد منهم، بس مشاكله النفسية دي مخلياه فيلسوف، هتتعلم منه حكم الحياة وتفكر فيها، وتتخض لما تقابل نفسك.

اختفاء جعفر المصري

احنا بنتحاسب على النية ولا على التنفيذ؟ دي الفكرة اللي بيدور عنها الفيلم اللي بطله بيقتل بالنية بس والتفكير وبيعيش في صراع هو القاتل فعلًا ولا لأ؟ بعد الفيلم ده لو فكرت شوية هتغير نوايا كتير جواك.

ديكور

الفيلم بيحكي عن "مها" اللي بتعيش قصتين، قصة جواز تقليدي من واحد بيحبها وهي قلبها لسه متعلق بحب الجامعة، وقصة تانية جواز حب الجامعة بس قلبها بيروح للشخص التقليدي اللي بيحبها حب غير مشروط. الفيلم هيخلص وأنت مش عارف أنهي قصة في دول الحقيقية وأنهي اللي بتوهم بيها مها نفسها، وازاي كل خطوة وقرار في حياتها خلى لحياتها شكل مختلف، وهي مش عارفة تقرر إيه الل هيخليها سعيدة فعلًا، لو شفت Mr nobody  فالفيلم ده قريب منه مع اختلاف التفاصيل.

موعد مع إبليس

شفت مسلسل "ونوس"؟ الفيلم ده متاخد عن نفس المسرحية "فاوست" اللي كتبها جوتة، وهي باختصار عن شخص عمل عهد مع الشيطان يديه الفلوس مقابل إنه يديه حياته، بس البني آدم بيرجع في كلامه، رغم إن الفيلم قديم، إلا إنه من أفضل الأفلام اللي قدمت المسرحية دي، شوفه وشوف مسلسل "ونوس" كمان.

حدوتة مصرية

أنا فاكرة أول مرة شفت الفيلم ده وازاي بهرتني فكرة المحاكمة جوه القفص الصدري للبني آدم. الفيلم فيه بصمة يوسف شاهين، لأنه من أفلام سيرته الذاتية، بس كمان هيخليك تفكر في صراعاتك النفسية مع شخصيتك وأنت طفل وشخصيتك وأنت كبير وأهلك واللي تعرفهم، وازاي كل الخناقات دي ممكن تحصل جواك، ولما تسأل الدكتور أنا عندي إيه؟ يرد ويقولك "حالة نفسية".

البحث عن سيد مرزوق

لو شفت أي فيلم لداود عبدالسيد دور ورا الرموز اللي جواه. الفيلم ده بيحكي عن "يوسف" الموظف البرئ اللي خرج وقابل متشرد لابس زي شارلي شابلن، وبعدين عرف إنه الملياردير سيد مرزوق اللي بيتنكر في شخصيات غريبة، وفجأة لقى "يوسف" نفسه متهم بالقتل ومش عارف يعمل إيه.

قدرات غير عادية

الفيلم بيتكلم عن "يحيي" اللي بيدور عن القدرات غير العادية في البشر، ومعتقد إن كل واحد جواه حاجة مش عادية، حاول تفهم اللي بين السطور ورا الأحداث عشان تعرف سر الفيلم ده.