ليه اللاعيبة الأجانب مهمين لأي فريق مصري؟ عشان أنت قايمتك ممكن يبقى فيها 22 أو 27 لاعب مصري، بس الأجانب هما 3 بس، بالتالي لازم ال3 دول يدولك إضافة مش موجودة في اللاعيبة المصريين، أو بالأصح إضافة مش موجودة في أي لاعب مصري، لدرجة إنك كنت مضطر تدور على الإضافة دي بره، فلما تجيب لاعب أجنبي مايصلحش للعب في الدوري المصري تبقى في مشكلة، الغريب إنها مابقيتش مشكلة وبقى ده العادي!

لو اتكلمنا عن أسوأ 10 أجانب لعبوا في الدوري المصري، لازم نركز على لاعيبة الأهلي والزمالك، لأنهم أكتر ناس بتدفع فلوس في اللاعيبة الأفارقة ولأنهم عندهم إمكانيات أكبر وكشافين أكتر، ومفروض الأجنبي اللي يجيبوه ده يبقى بيطلع نار من بوقه، بس برضه القاعدة بتقول إن ده مابيحصلش، ولو في استثناءات قليلة كل كام سنة، فهي استثناءات لتأكيد القاعدة.

• أجوجو

لازم يبقى على راس القايمة، بعد كل اللي اتدفع فيه ده لازم يبقى على راس القايمة. لغاية دلوقتي ماحدش عارف الزمالك جاب أجوجو بكام، في أقاويل إنه كان مبلغ مايقلش عن 15 مليون، وساعتها في 2008 دي كانت فلووووس. أجوجو كانت دولي في المنتخب الغاني وأساسي كمان، ده اللي خلى الناس مستبشرة إنها صفقة عظيمة. بس ماطلعتش عظيمة. أجوجو ماعملش أي حاجة تذكر وفي الآخر هرب آخر ما زهق وزهق الزمالكاوية معاه. وعشان هو موت وخراب ديار، أجوجو أخد حكم على الزمالك بخصم نقط ودفع غرامة، بسبب فلوسه المتأخرة.

• محمد غدار

بص يا سيدي، كان عندك لاعب عظيم اسمه جيلبيرتو، لعب معاك ما يقرب من 10 سنين أو أقل حاجة بسيطة، قررت تبيعه رغم إنه لسه صغير ويقدر يفيدك ومستواه كويس، بس خلاص سنة الحياة، مافيش مانع. لما تمشي جيلبيرتو العظيم ده هتجيب مكانه مين؟ هتجيب محمد غدار! غدار لاعب لبناني جه زي ما مشي، ماعملش حاجة غير إنه رفع ضغط الناس في الماتشات اللي لعبها.

• خالد سعد

الزمالك في مراحل انحداره كان أي لاعب يلعب ضده ماتش حلو بيروحوا يشتروه، ده اللي حصل مع خالد سعد. خالد كان باك شمال نادي الفيصلي الأردني ومنتخب الأردن، لعب قصاد الزمالك وتألق في البطولة العربية، فالزمالك هيعمل إيه؟ هيتشريه طبعا. اشتراه الزمالك ومالعبش خالص ومشي بعدها. خالد في حوار ليه مع موقع "اليوم السابع"، وصف أيامه في الزمالك بإنها أسوأ أيام حياته.

• كاستيلو

لو في حسنة تذكر للراجل ده، فهو الجول اللي جابه في ماتش الأهلي والاتحاد اللي خلص 3/2 للأهلي. كاستيلو كولومبي الجنسية، مانويل جوزيه مدرب الأهلي صمم عليه في موسم 2004 - 2005، فتعاقد الأهلي معاه إعارة لمدة سنة من فريقه الكولومبي. قضى اللاعب معظم السنة دي بيدفي دكة الاحتياط وماعملش أي حاجة تذكر أو لا تذكر، فكان طبيعي الإعارة ماتجددش ويرجع بلده.

• ريكاردو

وميعادنا دلوقتي مع لاعب تاني من قارة أمريكا الجنوبية، كابتن ريكاردو البرازيلي اللي الزمالك اشتراه في 2008 عشان يمسك في خناق جمال حمزة ويضربوا بعض في الملعب ويدوني لقطة هتعيش للأبد. أما عن مهارات ريكاردو نفسه، فمش هتعيش للأبد خالص، ولا للسبت الجاي حتى.

• هندريك

دي لاعيبة جات في غفلة من الزمن كده، لاعب برازيلي ألماني اشتراه الأهلي سنة 2015، بس لو دورنا وراه هيطلع من ناشئين كهرباء طلخة غالبًا. هندريك لاعب وسط مافيهوش أي حاجة من ريحة البرازيل، ولا ألمانيا، مشاركش بصفة كبيرة واكتشفوا إن التعاقد معاه كان غلطة فقالوله اتكل على الله، فقفش فيهم وأخد تعويض عشان يمشي من غير ما يشتكي. يستاهل اللي جابه.

• يامن بن ذكري

يامن كان مدافع تونسي مش بطال، ظهر بشكل كوس مع الأفريقي التونسي فاشتراه الزمالك في 2006. بس تقريبا مشاكل الزمالك في الوقت ده ماكانتش تسمح لأي لاعب إنه ينجح. مشي بعد موسم واحد وماعملش فرق في دفاع الزمالك ةلا في حد أخد باله إنه مشي أساسًا.

• بينيو

أنا مش فاكره أصلا! مش ده؟! تقول الأقاويل إن الراجل ده الأهلي ضمه في موسم 2003 – 2004، هو لعبله كام ماتش واتصاب كام ماتش وبعدها مشي وجاي في إيه وسافرت في إيه! عموما لو في لعب برازيلي على حق مش هييجي يلعب في مصر، إلا لو هتديله فلوس كتير زي ما دلوقتي بيسيبوا أنديتهم ويروحوا يلعبوا في الصين كده.

• كريم الحسن

الزمالك كان عنده أزمة في دفاعه سنة 2011، طب هتعمل إيه يا زمالك؟ هشتري أحسن مدافع في الدوري الغاني ولسه شاب صغير وهيتطور ويتحسن. ده ماحصلش، أو جزء منه بس اللي حصل، الزمالك اشترى كريم الحسن بس لا لعب ولا اتطور ولا حد افتكره، بس الحسنة من الموضوع إنه ماكلفش النادي حاجة وكانت صفقة انتقال حر. طب محطوط في قايمة الأسوأ ليه؟ عشان كان ليه مستحقات متأخرة وبسببه الزمالك اتوقعت عليه عقوبات. تخيل لما لاعب مايعملش أي حاجة غير إنه يجيبلك عقوبة!

• صلاح الدين سعيدو

اللاعب الأثيوبي وكابتن منتخب أثيوبيا، ظهر بشكل كويس في وادي دجلة فبدأ يكون في كلام عليه من الأهلي والزمالك، نجح الأهلي إنه يجيبه، وتقريبا نسي الكورة بتتلعب ازاي بعد ما مضى العقد مع الأهلي. قضاها إصابات ومشاركاته كانت قليلة ولما كان بيشارك كان بيدي مثال على المهاجم اللي لازم مايلعبش في الأهلي. مشي بعد سيزون واحد بعد تجربة فاشلة.