الخناقة بين الأهلي والزمالك ليها أشكال وأوجه كتير. خناقة في الملعب، خناقة في الإعلام، خناقات بين الجمهورين ولو على سبيل الهزار والتحفيل، وطبعًا خناقات للفوز بأحسن لاعيبة، وأحسن لاعيبة مين اللي هيتخانق عليهم غير أحسن ناديين اللي معاهم أكتر فلوس وأكبر إمكانيات؟

 أي صفقة في الكورة كل ما الزخم عليها بيزيد كل ما التوقعات منها بتزيد، يعني اللاعب اللي اشتريته ب50 مليون بتكون متوقع منه يكسر الدنيا أكتر من اللاعب اللي اشتريته ب10 مليون، واللاعب اللي قدرت تاخده من المنافس بتاعك بعد خناقة، بتبقي مستني منه يكيد العزال، بس مش كلهم عرفوا يكيدوا العزال، في لاعيبة كتير الأهلي والزمالك قطعوا بعض عليهم وفي الآخر الفريق اللي فاز باللاعب غنى بسببه ظلموه.

• سعيد عبد العزيز

سعيد عبد العزيز كان بيلعب في غزل المحلة وكابتن المنتخب الأوليمبي وباك شمال صيته ذايع في الدوري المصري، فكان طبيعي الأهلي والزمالك يحاولوا يمضوا معاه. اللاعب فضل يتدرب مع لأهلي حاولي أسبوع ومضى على استمارة قيد وإقرارات على نفسه إنه عاوز يلعب في الأهلي ومش أي مكان غير الأهلي وصرح النادي إنه معاه عقد للاعب موثق في الشه العقاري.

 يسكت الزمالك؟ ماسكتش، ظهر فجأة لسعيد عبد العزيز عقد مع الزمالك وشيك ماضي عليه بخط إيده واتقال إن ناديه غزل المحلة مش عاوز يبيعه غير للزمالك وإن اللاعب نفسه كلم مدرب الزمالك فاروق جعفر في الوقت ده وقاله أنا وقعت عقد مع الأهلي بس عقد غير محدد المدة ولا الفلوس وبالتالي مش هيكون معترف بيه في اتحاد الكورة، بس أنتوا يا زمالك حاجة تانية، أنا عاوز ألعبلكم وهمضي عقود وشيكات.

وما بين تأكيدات مسؤولي الأهلي إن اللاعب عاوزنا وتأكيدات مسؤولي الزمالك إن اللاعب هيقطع نفسه عشانا، اتنقل سعيد عبد العزيز للأهلي بعد خناقات سنة 99، حصل إيه بعد كده؟ بعد كده كانت ذكريات سعيدة للزمالكاوية وتعيسة للأهلاوية ولسعيد عبد العزيز نفسه اللي ظهر مع الأهلي بمستوى تعبان واتنقل للاتحاد في موسم 2002 – 2003.

• أكوتي منساه

الغاني أكوتي منساه كان بيقدم مستوى كويس في وسط ملعب النادي المصري سنة 2005، فحصل إيه؟ الأهلي والزمالك قرروا إنهم عاوزينه. الصفقة خلصت في الآخر لصالح الأهلي، بس النقطة دي فيها أقاويل كتير. بسبب دخول الزمالك في الصفقة مع الأهلي، نجح رئيس النادي المصري سيد متولي إنه يعمل مزاد على اللاعب ويبيعه للأهلي ب9 مليون جنيه و 3 لاعيبة، اللي هما خالد بيبو ومحمد فضل والناشئ عاشور الأدهم.

ده الكلام اللي قاله سيد متولي، بس عدلي القيعي قال لموقع "فيلجول" كلام تاني خالص، وعلى حسب كلامه فالصفقة دي ماتكلفتش أكتر من 3 مليون للمصري و150 ألف جنيه للنادي الغاني السابق بتاع اللاعب ولوكشة اللاعيبة اللي الأهلي سابها للمصري ماكانتش من ضمن الصفقة أصلا.

الزمالك ساعتها لما دخل في الصفقة اتقال إن مرتضى منصور بعت عرض ب10 مليون جنيه للمصري، عشان المصري يكون قدامه حل من اتنين، يا يبيع للزمالك يا يبيع للأهلي بسعر أكبر، فأنا كزمالك هاخد اللاعب أو هخسر الأهلي فلوس وأزود عليه صفقة كانت ممكن تخلص بسعر أقل بكتير.

اللي يهمنا من كل ده إن بعد كل الخناقات دي أكوتي راح الأهلي وجاله رباط صليبي في أول ماتش رسمي ضد أنيمبا النيجيري في دوري أبطال أفريقيا، وبعدها مابقاش له مكان في خط وسط الفريق الأحمر. رجع اكواي تاني للمصري بس المرة دي كان ببلاش.

• عمرو سماكة

لاعب صاعد شاب بيلعب في الترسانة اسمه عمرو سماكة، قرر الأهلي والزمالك إنهم عاوزينه. سماكة أصلا من ناشئين الأهلي فلما الأهلي جس نبضه وقاله تحب ترجع قالهم أرجع طبعًا، بس لما الزمالك نط في الصفقة والترسانة قرر إنه يبيعه للزمالك الموضوع اتعقد. اللاعب عاوز الأهلي ومتفق معاه على كل حاجة والزمالك متفق مع الترسانة اللي عاوز يبيع للزمالك، نعمل إيه؟ هنخفي اللاعب، اللاعب اختفي وماحدش لاقيه ولا عارف هو فين، واللي يلاقيه يبقى مضيه.

حكى بعد كده سماكة تفاصيل أكتر عن الصفقة بعد ما نجح الأهلي في حسمها، قال اللاعب لموقع "الأهلي دوت كوم" إن الترسانة طلب منه يمضي على ورقتين، ورقة فيها رغبة لعب للزمالك وورقة فيها رغبة لعب للأهلي، عشان احنا كترسانة نلاعب الاتنين ونفتح بينهم مزاد، اللاعب قالهم بس أنا عاوز الأهلي، قالوله هنوديك الأهلي بس لازم تساعدنا نضغط ونجيب أعلى سعر.

الترسانة أخلف وعده مع سماكة – حسب كلام سماكة نفسه- وخرجوا الورقة اللي فيها رغبة اللعب للزمالك وقالوا للناس كلها اللاعب عاوز الزمالك واحنا هنبيع للزمالك، قام اللاعب سافر على الساحل الشمالي وفضل مختفي هناك لحد ما الترسانة استجاب لرغبته واتفق مع الأهلي. فضلت مشكلة وحيدة، الأهلي عاوز يدفع مليون ونص والترسانة مصمم على مليوم و600 ألف، فاللاعب قالهم عندي أنا ال100 ألف دي.

اتنقل "سماكة" للأهلي وهوب اكتشفوا إنه بياخد منشطات وباعوه، القصة الطويلة العريضة دي كلها كانت نهايتها السطر ده!

• حسين علي

"إذا حضر الما بطل التيمم" ده كان المانشيت الرئيسي لأحد أعداد مجلة الأهلي في سنة 2008، على لسان لاعب بتروجيت حسين علي، اللي قرر يروح الأهلي بعد ما كان خلاص خلص كل التفاصيل مع الزمالك، والزمالك قال إنه هيعلن رسميًا عن الصفقة خلال ساعات، وفي خلال ساعات كان الأهلي هو اللي بيعلن عن الصفقة!

حسين علي ماشئ في الأهلي، الأهلي سابه فراح بتروجيت وظهر بشكل كويس، قرر الأهلي يشتريه تاني بس المشكلة إن الزمالك تقريبًا خلص فيه واللاعب أخد شيكات من النادي الأبيض كمان. حكى حسين بعد كده إنه اكتشف إن الشيكات دي بدون رصيد وكمان اكتشف إن الزمالك خلاه يوقع على ورق بدون علمه فقلق وراح الأهلي ومضى وراح القسم عمل محضر في الزمالك وردلهم شيكاتهم.

بعد سيزون في الأهلي ماشمش فيه الملعب، مشي حسين وراح على الجونة، وساعتها طلع اعتذر لجماهير الزمالك وقالهم أنا زمالكاوي وأبويا زمالكاوي ونفسي ألعب في الزمالك والأهلي غلطة عمري وشوية كربلائيات لا تسمن ولا تغني من جوع.

• خالد قمر

الأهلي والزمالك كانوا بيتخانقوا على مؤمن زكريا، مؤمن وقع للزمالك ووقع للأهلي في نفس فترة الانتقالات وأعلن عن رغبته في إنه يلعب للأهلي مش الزمالك، قام الزمالك قدم شكوى لاتحاد الكورة وقال اللاعب ده بتاعي ودي العقود اللي تثبت، كده وحسب اللوايح يبقى مؤمن زكريا هيتوقف ويتعاقب، طب هتعمل إيه يا أهلي؟ لازم اضغط على الزمالك عشان يسحب شكوته ضد مؤمن، طب هعمل كده ازاي؟

فلاش باك كام شهر لورا، نفس الموسم، تحديدًا موسم 2015، الزمالك بيعلن تعاقده مع واحد من أفضل مهاجمي الدوري، لاعب الشرطة خالد قمر. كان معروف إن الأهلي حاول مع اللاعب، بس خلاص راح الزمالك وسكت الكلام عليه، بس لما قرر الأهلي يضغط على الزمالك، اكتشفنا إن خالد قمر كان موقع للأهلي زي ما وقع للزمالك، وهنا ضرب الأهلي بعقد خالد قمر على الطرابيزة وقالهم هتوقفوا مؤمن هنطلع عقد خالد قمر ونوقفه، حاجة في منتهى الـ "الله وأنا مالي يا لمبي!"

فين بقى خالد قمر؟ خسر مكانه الأساسي في الزمالك وقدم مستويات ضعيفة، حاليًا بيلعب في الاتحاد على سبيل الإعارة. كانت مستاهلة كل ده يعني؟!

• باسم علي

باك يمين كويس في المقاولين بيقولوا الأهلي هيجيبه اسمه باسل علي، لجملة دي قعدت في ودان مشجعين الأهلي كام سنة كده وبتتكرر كل موسم انتقالات، لحد ما جه باسم علي أخيرا في سيزون 2014.  مبروك يا أهلي، لا مش مبروك، اللاعب طلع موقع للأهلي والزمالك في نفس الوقت والزمالك بيدور عليه ولو عتر فيه هيقتله! قدم الزمالك شكوته لاتحاد الكورة اللي قرر يعاقب باسم بإيقاف شهر وغرامة 77 ألف جنيه.

فين باسم دلوقتي؟ مستوى هزيل جدًا مع الأهلي وخسر مكانه وبقى التالت في مركزه بعد أحمد فتحي ومحمد هاني، ولما الأهلي اتزنق في باك رايت نتيجة إصابة فتحي وهاني، لعبوا بكريم نيدفيد في المكان ده، اللي هو أصلا نص ملعب، ده يديك فكرة عن وضع باسم في الأهلي بقى عامل ازاي.

• إسلام رشدي

في نهاية سيزون 2013 – 2014 كان في لاعب بيقدم مستويات كويسة في فريق المنيا اسمه إسلام رشدي، وبدأ يكتر الكلام عليه بين الأهلي والزمالك. الأهلي قطع عرق وسيح دمه وراح دفع لالمنيا قيمة الشرط الجزائي في عقد اللاعب اللي هي نص مليون جنيه، وبكده يبقى اللاعب رسمي في الأهلي. حلي ساعتها اللاعب في عين الزمالك اللي قرر يروح لنادي المنيا ويقولهم هنديكم فيه 3 مليون جنيه!

فارق السعر ده كان طبيعي يخلي المنيا يحاول يقنع اللاعب إنه يروح الزمالك مش الأهلي، بس اللاعب تمسك بالأهلي وقال مش هلعب غير للأهلي، وانتشرت أخبار إن الأهلي مخبي اللاعب في مكان ومعينله 2 بودي جارد عشان يمنعوا أي حد من الزمالك إنه يحاول يقربله أو يلعب في دماغه.

ربنا كملها بالستر للأهلي وأخدوا اللاعب، بس ماشاركش بمستوى ثابت، والفترة دي كانت فترة تخبط في الأهلي بشكل عام. إسلام كان بيقدم مستويات كويسة في ماتش بعدين يخرج بره ال18 في الماتش اللي بعده وماتفهمش ليه، بعدها بسبب مشكلة التجنيد راح إعارة لحرس الحدود. حاليًا إسلام رشدي بيلعب في الجونة وماشي بشكل كويس وقال إنه لو اتعرض عليه الأهلي والزمالك مرة تانية هيختار الأهلي برضه.