موضوع إن مغني يطلع في مسلسل مش حاجة جديدة علينا، يعني ياما مصطفى قمر وتامر حسني وحمادة هلال وغيرهم عملوها وكسروا الدنيا مش حكاية يعني، لكن الجديد إن في 7 من ممثلين Game of thrones طلعوا بيغنوا ومش هتتوقعهم أبدًا، وأكيد مش قصدنا على Ed Sheeran، الراجل من ساعة ما غنى Shape of you وقربت على ال 2 مليار مشاهدة على يوتيوب، وماحدش عارف يكلمه، لكن الليست فيها ناس تانيين ما تتوقعش إنهم يكونوا بيغنوا.

1 -  ميليساندر"Melisandre"

كبيرة كهنة إله النور ونبع الشباب الصافي ومتصدرة محركات البحث في أنحاء المعمورة، الفنانة الهولندية "Carice Van Houten" اللي بتقوم بدور ميليساندرا في المسلسل، فاجئت الجميع بعد الكاريزما والأداء العظيم في الحلقات إنها بتغني كمان، تقدر تحكم على صوتها وأدائها من الفيديو ده.

2 - جراي ورم "Grey Worm"

البرنس، محمد رمضان قائد جيوش أم التنانين ومحطمة الأغلال وسارقة قلوب العذارى، الفنان الإنجليزي"Jacob Anderson" اللي ما بنسمعلوش صوت طلع بيغني وبيكتب كمان كلمات أغانيه، ليه قناة على يوتيوب بإسم RaleighRitchieVEVO

3 - هازدهار ذو لوراق "Hizdahr zo Loraq"

أيوة أنا اتصدمت برضه من الاسم لما قريته بالعربي، تحسه تعويذة مش اسم بني آدم، عمومًا هو ظهوره ماكانش لوقت طويل، الممثل الإنجليزي "Joel Fry" كان بيمثل دور واحد من أسياد "مارين" اللي "دينيرس" مرغت وشهم في التراب وصلبتهم في الشوارع وهو شخصيًا اتعمل منخل من سكاكين أولاد الهاربي، ولاد حلال ويستاهلوا كل خير. "Joel Fry" اللي كان طالع في مشهد مخلي واحد من العبيد يتكلم مكانه خلاص طلعله صوت، هو مش منتشر انتشار واسع وواضح إنها هواية، بس في ليه أغنية لطيفة بيغني فيها في كافيه ولا حاجة زي فيبي بوفيه، وفيه الكليب ده.

4 - أوشا "Osha"

تقريبا أوشا هي السبب الوحيد اللي خلى الموضوع ده يطلع فيه صور الشخصيات، لأنها الدليل الأعظم على السحر اللي ممكن تعمله صابونة وشاور سخن. الفنانة الإنجليزية "Natalia Tena" اللي بتقوم بدور واحدة من ال" Free Folk" أو ال "wildling"، عملت دور عظيم مع "هودور" في حماية "بران ستارك" لكن اللي مانعرفوش إنها عاملة باند اسمه Molotov Jukebox، أينعم مابيسمعوش جمهور كبير، بس لو اتنقلنا للكليب هتعرف إن الصرف باين على الآرت دايركشن، وعلى الصابون، والله العظيم اللي في الكليب دي "أوشا"

5 - رامزي بولتون "Ramsay Bolton" 

لأ بتهزر! لا لا لا، ده لو بيغني أكيد بيغني في احتفالات نذور بشرية، اللي بيشربوا فيها دم أرامل وأطفال ويسجدوا للشيطان شخصيًا، وبيطلع يقولهم "إن لوسيفر والحق يقال راض"، أنا آسف إني هبوظلك الصورة اللي في دماغك تمامًا، "Iwan Rheon" ممثل ويلزي - من ويلز يعني - لو بتلعب FIFA أكيد هتبقى عارفها لأن بيلعب فيها جاريث بيل وكان بيلعب فيها ريان جيجز، بغض النظر إنه ممثل فشيخ، بس كمان هو بيلعب مزيكا وبيغني، والجميل إن المزيكا بتاعته كمان مش بلاك ميتال مثلًا ولا عبدة شيطان ولا أي حاجة في دماغك، مزيكته لطيفة جدًا وتقدر تسمع عينة منها هنا 

6 - برون "Bronn"

أعتقد إننا مدينين للراجل ده إنه سبب من أسباب إن "تايرون" و"جيمي" لسه عايشين، تقريبًا إن اللانسيتر كلهم عايشين أصلًا. ده الوحيد في القائمة اللي في مشهد ليه وهو بيغني في المسلسل، في مشهد من الموسم الأول مع جنود اللانيستر في البار، ثواني أنا نسيت أقول هو مين أصلا! "jerome flynn" ممثل إنجليزي، وليه مسلسل قديم سنة 86 كان مشهور جدًا، طلع هو كمان بيغني وكان عامل باند مع ممثل انجليزي تاني اسمه Robson Green، من الكليبات اللي عملوها الكليب ده 

7 - دارو نهاريس "Daario Naharis"

هااااح وهيييح أكيد كتير فشخ، بس الواد يتحب يا رمضان يعني، ده غير إن كل معاركه كسبها أيًا يكن ميدان المعركة، بيتهيألي إنهم غيروه مخصوص علشان "دينيرس" تقدر تقبله. "Michiel Huisman" ممثل هولندي، وبيغني بالهولندي، فمش قادر أحدد صوته حلو ولا لاء، بس الواد حنين يعني فحتى لو صوته وحش إيه يعني، في حاجات أهم بكتير.