نصايح من دكتور أسنان عشان متروحش لدكتور أسنان
"في حاجات بنحبها وحاجات بنكرهها، وحاجات تانية بنختلف عليها بين الحب والكره، بس سيبك أنت، كل الناس بتكره دكاترة السنان".
اعرفك بنفسي، أنا محمد مجدي عامر، دكتور سنان بيحب شغله. تفتكر أنا دخلت الكلية علشان اتخرج شخص مكروه؟ طول عمري بسمع الجملة اللي فوق، بس كان عندي فضول أفهم ليه القناعة دي مترسخة في أذهان وقلوب المصريين؟ بتكرهني ليه؟! عموما يا سيدي لو بتكره دكتور السنان، هقولك على كام حاجة لو عملتهم مش هتروح لدكتور سنان أصلًا.
بس خلينا متفقين، اللي هتسمعه دلوقتي ده علشان الوقاية خير من العلاج، ماتجيش تقولي بقى يا عم أنت بتحكي في ايه دا أنا كل سناني مسوسة ومكسرة ومخرمة من كل جنب، أنت كدة هتروح هتروح لدكتورك، وهتسلم نفسك ومحفظتك على الباب بكل أريحية.
سنانك مصممة إنها تعيش معاك طول عمرك، بشرط واحد: تخليها نضيفة أكتر عدد ساعات في اليوم، طيب ما أنا بغسلها كل يوم! المفروض إن حضرتك تغسلها بعد كل أكل وأي أكل أو شرب، يعني احنا بنقول 3 مرات في اليوم على أساس إننا بناكل 3 وجبات أساسية، بس طبعًا الحقيقة إن كلنا بناكل عشر مرات في اليوم على الاقل، وده معناه إننا وصلنا لأول نصيحة: فرشة سنان ومعجون صغيرة في عربيتك أو شنطتك. تغسل سنانك كويس من بواقي الأكل بعد كل أكلة لمدة دقيقتين كاملتين، جو العشر ثواني غسيل ده ماينفعش. خلي الفرشة دي medium، ودايمًا نضيفة ونشفها كويس، وماترميهاش في الشنطة ولا تابلوه العربية من غير ما تكون معزولة، شالله تحطها في كيس.
ناس كتير مننا بتشتكي إن الأكل بيتحوش بين سنانها، لو ده بيحصلك وسنانك مافيهاش اخرام أو مكسرة، يبقى هتستعمل خيط تنضيف الأسنان، ولو مابتعرفش تستخدمه ازاي يبقى تشتري النوع اللي بيبقى مربوط في إيد بلاستيك كدة وبيتباع في الصيدليات والسوبر ماركت. نصيحة 2: بلاش خلة السنان؛ بتعمل جيوب بين الأسنان والموضوع بيزيد كل مرة بنستعملها، استخدم الخيط دايمًا.
بسمع من ناس كتير إن سنانها ضعيفة وبتتكسر، علشان الكالسيوم في جسمهم قليل، أو مابيشربوش لبن، الكلام دا "فاكس تمامًا ولا مؤاخذة عاري من الصحة" أسنانك بتتكسر علشان بتسوس، بس لو حابب تقوي أسنانك يبقى وصلنا للنصيحة رقم 3: زيارة دكتور الأسنان لعمل علاج تحفظي ووقائي، بوضع جيل من الفلورايد المركز على أسنانك، بغرض تقويتها وتقليل خطر الإصابة بالتسوس.
ماتنساش إن جسمك وصحتك أكيد أغلى من عربيتك اللي على الأقل بتعملها صيانة مرتين في السنة -ده لو أنت يدوبك بتستعملها- ما بالك بقى بأسنانك اللي مابتبطلش أكل عليها طول اليوم؟ نصيحة 4: زيارة دورية لطبيب الأسنان مرة كل 6 أشهر على الأكثر، لعمل كشف على الأسنان واللثة. طبعا الأطفال هما الأولى بالوقاية دي، وده هيجنبهم تمامًا الصدمات العاطفية اللي ممكن يتعرضولها عند دكتور الأسنان. النصيحة الأخيرة بقى: ماتكرهش الراجل اللي مهمته في الحياة يعالجك، اكره كسلك واستسهالك. وزي ما بنقعد بالساعات على مواقع التواصل الاجتماعي، ممكن نخصص بس نص ساعة نقرأ فيها عن كيفية المحافظة على صحتنا وأسنانا.
