المركز الثقافي الفرنسي في القاهرة ومركز FGO-Barbara الفني فى باريس، هيدوا فرصة للمواهب المصرية الشابة في مجال الموسيقى، إنهم يعرضوا فنهم على الجمهور، من خلال مشروع جديد اسمه "منيرة الفن". "المركز الثقافي الفرنسي" مش غريب عليه دعم الثقافة والفن وبالأخص دعم الفنانين المستقلين اللي محتاجين مساحة يقدموا فيها اللي عندهم. المركز الفرنسي دايماٌ بيدخل في شراكات مع مراكز فنية تانية، سواء مصرية أو فرنسية في تنظيم عروض فنية وأحيانًاً كمان عروض رياضية.

في 2018، المركز الفرنسي عمل هدف مختلف، وهو مساعدة المواهب الجديدة إنهم يدخلوا المجال الاحترافي، علشان مايبقاش جمهورهم بس من زوار المركز الثقافي، لكن جمهور أكبر وأشمل. علشان كده تمت الشراكة مع مركز FGO-Barbara الفني وهو واحد من أهم المراكز اللي بتقدم عروض موسيقية في العاصمة الفرنسية "باريس"، ده غير إنهم بيقدموا كورسات للموسيقيين المبتدئين علشان يطوروا من موهبتهم. في آخر كام سنة، مركز FGO-Barbara تعاون مع مراكز ثقافة فرنسية من بلاد كتير حول العالم، زي "إيطاليا" و "موريتانيا" و "المغرب" و "الجزائر" و دلوقتي جه الدور على "مصر". 

مشروع "منيرة الفن"، اللي واضح إن اسمه كده علشان المركز الثقافي الفرنسي موجود فى منطقة "المنيرة"، فتح أبواب التقديم في 15 يناير وهيقفلها يوم 15 فبراير. لجنة التحكيم متكونة من موسيقيين مصريين و فرنسيين محترفين، من ضمنهم الموسيقار الفائز بالجرامي "فتحي سلامة" و مؤسس استديو"ميت نسخة" الموسيقي "محمود رفعت" . في المسابقة هيختاروا خمس أو ست موسيقيين/ باندات موسيقية، علشان يقدموا عرض قدام الجمهور في المركز الثقافي الفرنسي فى المنيرة يوم 12 أبريل. الست موسيقيين/باندات هيتم تصفيتهم لاتنين بس وهيشاركوا فى ورشة تدريبية بقيادة "فتحي سلامة" و فريق من مركز FGO-Barbara الفني فى ستديو "ميت نسخة" المملوك لمحمود رفعت. فى يوم 22 يونيو، الفائزين هيفتتحوا حفلة Fete de la Musique  اللي هتتعمل فى مكان مخصوص قصاد الآلاف و هتتذاع على التلفيزيون المصري. الموضوع مش هيقف عند كده، الفائزين هيسافروا "فرنسا" ويقدموا حفلة فى مركز FGO-Barbara الفني قدام موسيقيين فرنسيين محترفيين. 

التقديم من اللينك ده: 

http://www.institutfrancais-egypte.com/fr/notre-programmation/tremplin-d%C3%A9di%C3%A9-aux-jeunes-talents-mounirat-al-fan/