قالوا كتير عنا وقالوا إننا أول ناس فى الكون

وإننا قدام كل تحدي لما نعوز نكون بنكون

بيسمونا الفراعنة والفرعنة دى ليها أصول

الفرعنة يعني الجدعنة والاستهبال وقت اللزوم

عدى علينا كتير وياما دقت على الراس طبول غن

هو احنا مكتوب علينا نوعية الأغاني دي بتاعت احنا جامدين ومركز درب التبانة وقالوا عنا والفراعنة والفرعنة والجدعنة وكل الزخرفة اللغوية وكلام السهل ده مع فكرة ن الشعب عايز ينبسط وهناخد كاس العالم من أول شوط وحقنا نقول أي حاجة عشان بقالنا 28 سنة مدخلناش كاس العالم؟ مش عارف ليه شامم رائحة زاب ثروت في الموضوع ده، إيه الريحة اللي شمتها وأنت بتسمع الأغاني اللي اتعلمت للمنتخب بمناسبة كأس العالم؟ تعالى نشم سوا كده

1- احنا الفراعنة - أبو 

أيوة عادي أغاني كاس العالم اللي كل ما تفتحوا شاشة تلاقوها شغالة، سواء إعلان أو أغنية، موسم بقى، لكن المزعج في الموضوع إن الأغاني دي منفصلة عن الواقع بتاعنا أو نقدر نقول إنها بتحاول تزخرف الواقع وتحط ألوان مش راكبة على الشارع المصري! يعني مثلًا كلمات أغنية "أبو" اللي كلها بتتكلم على إن احنا ناس جامدة ولعيبة كورة وإن البطولات الكروية هي لعبتنا بقى.

الصورة دى اتهزت مع جول أوروجواي في الشوط التاني، وفكرة ان احنا "نتفرعن" ونتفشخر بالفراعنة بتتهز مع صورة "محمد صلاح" هو أمل مصر في الوصول للدور الـ 16 وهل هيلعب ماتش روسيا ولا ايه؟ وخلينا في خط الدفاع عشان نساعد حارس المرمى وإن هجومنا فيه خلل كبير.

ولما بتيجى اللحظة الحاسمة بنحسمها في لحظة على طول

شفنا كتير أمثال كبيرة ولسه كتير ياما هانشوف

أبطال رفعوا اسم بلدنا بلد الـ 100 مليون فرعون

اتفرعن وسط العالم وريهم أصلك وكيانك

مشكلة الأغنية دي إن "أبو" تايه ما بين إن الاغنية تكون تشجيعية ولا بهججة وفرحة. وفي كلا الحالتين هي في الآخر مكتوبة بشكل مبالغ فيه، شغل بطاطس بقى، "أبو" عايز يقول للناس إن احنا جامدين ونقدر نعمل ونوصل عشان احنا فراعنة، لكن الفكرة مش عشان احنا فراعنة يبقى نقدر نغلب الفريق الفلاني، وده اللي كان واضح من كلمات الأغنية اللي بتحاول تحث المستمع والمتفرج على الشعور بالقوة من غير سند أو تاريخ كروي مشجع أصلًا. عشان كده كلمات الأغنية منفصلة عن الواقع الكروي أو حتى الطموح الواقعي بتاع كل واحد بيجري بكوتشي مهلهل يلعب كورة في الشارع، يعني لو كانت الأغنية دي عن كمال الأجسام أقولك ماشي احنا جامدين أوي بدليل "بيج رامي" وغيره كتير وتنطبق عليه كلمات الأغنية فعلًا.

طب اشمعنى البرازيل تعمل اللي هي عايزاه في أغنية كاس العالم؟

أولًا دي البرازيل، والفكرة مش في إنها أغنية عن كأس العالم، بس الفكرة ازاي تعمل أغنية كلماتها أقرب ما يكون للواقع الكروي لبلدك، وفي نفس الوقت لو عايز تدي أمل مايكونش فيه مبالغة وبعيدة عن التاريخ الرياضي، بمعنى إن البرازيل في الأغنية دي (جوجل ترانسليت) كلماتها هي أقرب للواقع. مع العلم إنهم طالعين بفضيحة من آخر كأس عالم وعشان كده هى أغنية تشجيعية أكتر من إنها أغنية فرحة وبهجة وسرور، عشان ده الطبيعي بالنسبة لهم، بس أهم حاجة إن مافيش مبالغة وفكرة أذكى طفل في العالم.

الإجابة تونس؟

الصدمة بقى إن تونس دخلت 5 مرات كأس العالم ومع ذلك اتجاه الأغنية كان مختلف عن فكرة احنا أجمد ناس ولكن الفكرة بسيطة في إنهم جايين والكلمة تحمل أكثر من معنى، من أول إنهم دخلوا كأس العالم، لحد إنهم ناويين على المكسب، الإبداع مش بيقف هنا وبس ولكن الإبداع كله في إنهم أخدوا أغنية (كالينكا) اللي هي رقصة شعبية في الفلكلور الروسي وعملولها ريمكس تونسي بالآلات الشرقية، وطريقة الغناء والنطق اللغة العربية تحس إنه روسي، والتصوير أصلًا كان كله في روسيا، الإبداع في إن الفكرة تكون مش مستهلكة ولا الكلمات تكون ساذجة بعيدة عن الواقع حتى لو هتتكلم عن الفول والطعمية.

2- قوم نادي لصلاح - إيساف وسمية درويش

أغنية "أبو" كانت المفروض تمشي في فكرة ارتباط الشعب المصري بالكورة، من أول إنها رياضة شعبية والكورة الشراب، الناس بتتفرج عليها في القهاوي، بتتلعب في الشارع المبهدل بتاعنا، والعيال بتعمل عارضة الجون بالجزمة أو الشنطة أو طوب، من الآخر يعني تكون الكلمات مرتبطة بالشارع أكتر ما تكون كلمات تعبير عن القوة وإن احنا جامدين وفراعنة. أغاني كاس العالم مش بتقف عند "أبو" بس، المشكلة تكبر بقى زي أغنية "قوم نادي لـ صلاح" اللي المطربة بتقول فيها "في الكورة احنا مش ساهلين"، ما هي سبوبة بقى!

3- المنتخب راح روسيا - المجموعة

مين في مصر مش مستغل محمد صلاح وكأس العالم وفكرة فرحة المصريين وفكرة الشعب عايز يفرح؟ مش فاضل غير إن "حسين الجسمي" يعمل أغنية لمنتخب مصر ويتاجر بسعادة المصريين، بس من الواضح إنه مش فاضي وإن البديل كان أغنية المنتخب راح روسيا لمجموعة من المطربين هي أسوأ حاجة ممكن تتسمع أو تتشاف أو حتى تعرف إنها موجودة. المشكلة إن المطربيين دول مقتنعين بإن اللي عملوه ده يعتبر فن أو تحت مسمى الفن! وإن ده ممكن يكون سبب في نجاح المنتخب مثلًا.

4- اه يا نجم يا ستار 

برضوا اللعب على النوستالجيا حلو، والفكرة حلوة وجذابة بس مرهقة للودان، والواحد مش عارف هي سف ولا فن يعني المستمع تايه ما بين السف والفن.

5- مهرجان كاس العالم - فيفتي

حتى المهرجانات قالت كلمتها عن مصر في كأس العالم

6- مصر في كأس العالم

رغم كل الأغاني اللي موجودة عن مصر في كأس العالم وعن محمد صلاح، أنا شايف إن أكتر أغنية مناسبة هي أغنية "مصر في كأس العالم"، رغم إن التمساح ده مش جاى معايا سكة بس بيقول كلمة معبرة وهو بيتنطط. مصر دخلت كاس العالم، مافيش أبسط من كده.

والصراحة إن أغاني البهجة والفرحة والسرور واللمة والأغاني التشجيعية والحماسية دي، تعتبر متاجرة بمشاعر الناس، ونوعية الأغاني دي بتلاقي ناس كتير بتدافع عنها بكل قوة عشان هي أغاني بتلعب على العاطفة وعشان كده بتلاقي زبونها، الأغاني دي بترسم صورة غير واقعية للمستمع وبيكون كل هم المغني إنه يطلع في صورة المخلص والمنقذ والشخص اللي خايف على الناس واللي هينور حياة المستمع اللي غرقان في الوحل. الأغاني دي تعتمد على كلمات في مضمونها المغني يتمنى السعادة المطلقة للمستمع ويتمنى إنه يكمل حياته على أمثل وجه، متجاهل تمامًا الواقع، المشكلة إن في ناس بتصدق الكلام ده.

7- رايحين 

مافيش مشكلة إن يكون فيه أغاني تشجيعية بس يكون غالب عليها الطابع المصري أكتر من الطابع الأوروبي أو الطابع الطبقي، وده مش موجود في مصر، يمكن بعد ما نتعود على دخول كأس العالم ساعتها بس هنعرف نعمل أغاني مناسبة لدخولنا البطولة دي وفي الآخر السؤال هو صلاح هيلعب ماتش روسيا ولا إيه؟

8- بنشجع مصر - محمد الشرنوبي 

وننهي المقالة دي بمأساة الشرنوبي بين إنه مش عارف يفضل مغني ولا ممثل، لكن هو أخد قرار إنه يعمل أغنية كأس العالم عشان يقول فيها (احنا اللي هنفضل بنشجع من غير تفكيييييييير).