من ساعة ما شوفت فيلم "La La Land" وأنا في سؤالين بيدوروا في بالي، أول سؤال "Justin Hurwitz" كان بيفكر في إيه وهو بيألف مزيكا عارف إنها حرفيا هترقص العالم؟ هيعمل نغمة هتفضل معلقة في دماغ الناس لسنين، هتتجاوز كل حدود اللغة والزمان والمكان، نفس الفكرة في الأفلام ال Musical اللي عاشت معانا، زي Dancing in the Rain وغيرها.

في مصر، كان في تجارب قديمة جميلة نقدر نصنفها كأفلام موسيقية، من أهمهم من وجهة نظري "أيس كريم في جليم"، فيلم خيري بشارة اللي كان بيقدم فيه لون مختلف من الأفلام على ذوق السوق المصري، واللي قعد النقاد لفترة طويلة مش فاهمين أهميته وجماله. فيلم تاني من أجمل الأفلام اللي كلها رقص ومزيكا، فيلم "غرام في الكرنك" بطولة فرقة رضا، واحد من أجمل الأفلام الموسيقية المصرية اللي اتعملت.
السؤال اللي بنسأله هنا، ليه ماعندناش فيلم موسيقي في الفترة الحالية، مع إننا عندنا ممثلين كتير بيقدروا يغنوا، بالإضافة إلى إن فيلم زي لا لا لاند نجح جدًا في السوق المصري؟

احنا بنقدملك هنا ليست بالممثلين اللي بيقدروا يغنوا، عندهم تجارب غنائية بالفعل، والمغنيين اللي دخلوا سكة التمثيل وقرروا يمثلوا، والممثلين اللي بيعرفوا يأدوا مع المزيكا بشكل جميل حتى لو ما كانوش مغنيين فعلا. يمكن القايمة تخلي مخرج لما يقراها يتشجع ويقتنع إن عندنا مقومات فيلم غنائي ناجح، ضيف على ده طبعًا جيش من كتاب الكلمات المتميزين جدًا والملحنين ومؤلفين الموسيقى التصويرية اللي مواهبهم كلها تقدر تعمل فيلم موسيقي مصري بمواصفات عالمية.

أنوشكا
أنوشكا ما تبقاش عارف تصنفها مطربة ولا ممثلة، لإنها في الاتنين أفضل من بعض، من أفضل أدوارها كممثلة من وجهة نظري، هو دورها في مسلسل جراند أوتيل، وبتغني ب4 لغات.

روبي
أيقونة الجمال المصرية، واحدة من أجمل الأصوات اللي شافتها السينما المصرية، مع مزيج من الدلع والسمار المصري، صعب تطلع قدامك ع الشاشة من غير ما تقع في حبها.

دنيا سمير غانم
دنيا بالفعل عندها ألبومين غنائيين، بالإضافة لمسلسل رمضاني كل سنة، بتعمل أغنية التتر بتاعه وبتغني فيه في أغلب الأوقات

أمير صلاح الدين
أمير بدأ سكة المسرح من زمان، لكن بدأ يتعرف من مسرحية قهوة سادة، واختاره بعد كدة أحمد حلمي علشان يمثل معاه في 1000 مبروك، دلوقتي هو عضو في باند من أنجح الفرق الموسيقية في مصر "بلاك تيما"، وفي نفس الوقت عنده فيلم من بطولته بيتعرض، سمكة وصنارة، بالإضافة لرصيد من الأفلام والمسلسلات

هشام إسماعيل
ارتبط ظهوره بشخصية فزاع في مسلسل الكبير أوي، اللي قدر يأدي فيه أكتر من أغنية، هشام خريج مسرحية قهوة سادة برضه، وليه أعمال كتير سواء في أفلام أو مسلسلات، ما نقدرش نصنفه إنه مغني، لكنه بيقدر يغني، وخامة صوته مختلفة

إدوارد
من المفاجآت إن إدوارد في الأصل كان مغني مش ممثل، وكان عضو فعلا في فريق غنائي بيعزف وبيغني فيه، قبل ما المخرج أسامة فوزي يقرر يديله دور في فيلم "بحب السيما" واللي كان فاتحة خير عليه، وعنده دلوقتي رصيد كبير من الأفلام والمسلسلات والمسرحيات.

أمينة خليل
واحدة من أفضل ممثلات جيلها، وشاركت في مجموعة كبيرة من الأفلام والمسلسلات، الجديد بقى إنها كمان بتغني، سمعناها بتغني مرتين، مرة في مسلسل طرف تالت وهي بتغني "على بالي" أغنية "عايدة الأيوبي" والمرة التانية مع زاب ثروت.

ميرنا وليد
تخيل إن نورا مرات البدري في مسلسل ذئاب الجبل، هي اللي غنت أغنية "حبيبي يا عاشق" في فيلم "شورت وفانلة وكاب، دويتو مع مدحت صالح

خالد الصاوي
الصاوي قبل ما يبقى ممثل سينمائي معروف، كان ممثل مسرحي كبير، وبيحب يغني، رغم إنه ماعملش تجارب غنائية متسجلاله إلا إنه فاجئنا بأغنيه في مسلسل "هي ودافنشي"

هند عبد الحليم
الوجه الجميل اللي شوفنها بتبدع في مسلسل 30 يوم وبنات سوبر مان، بتقدم مسرحية موسيقية اسمها "يوم أن قتلوا الغناء"، وصوتها لايف جميل جدًا، ولو في فيلم موسيقى اتعمل أعتقد إنها هتبقى من أفضل المرشحين، بالإضافة لكل الكاست اللي كان معاها.

يسرا
بالإضافة لكونها من أيقونات السينما المصرية، فهي كمان بتغني ولو بشكل غير احترافي، من الأغاني اللي مشهورة ليها هي أغنية "حب"، ماعنديش فكرة في إيدين مخرج بيحب المزيكا ممكن يقدر يعمل بيها إيه.

أحمد مكي
جنب إنه نجم من نجوم الشباك، وأعماله في التليفزيون ناجحة وليها جماهيرية كبيرة، هو كمان مغني راب، وبيألف أغانيه كمان، عمل ألبوم غنائي بالإضافة لأكتر من أغنية سينجل

فتحي عبد الوهاب
من أفضل نجوم جيله، قدم أدوار كتير صعبة ومركبة، وبالإضافة لده غنى في فيلم "فرحان ملازم آدم"، ممكن الفيديو يخليك تقدر تحكم على خامة صوته.

محمود حميدة
البرنس، واحد من أكتر الممثلين اللي بحبهم، على إيد خيري بشارة غنى في فيلم "حرب الفراولة" أغنيتين رايقين جدًا، منهم أغنية عبد الغني السيد "ولا يا ولا"

محمد سعد
أيوة محمد سعد بيعرف يغني ويقول مواويل حلو جدًا، بس هو اللي بيستغلها في حتت محدودة جدًا، من الجواهر اللي محتاجة مخرج جواهرجي شاطر

محمد هنيدي
ماينفعش تكون عايش ومامرتش عليك أغنية من أغاني الكارتون اللي غناها هنيدي، أكيد يعني سمعت في حياتك هاكونا ماطاطا، هنيدي تقريبًا في كل أفلامه بيغني، لدرجة إنه عمل ألبوم من كلمات "مدحت العدل"، طبقة صوته كارتونية مبهجة، أكيد ليها استخدامها

سيمون
سيمون ابتدت حياتها كمغنية وليها 6 ألبومات غنائية، بالإضافة لرصيد من الأفلام والمسلسلات والمسرحيات اللي غنت في كتير منهم، زي كارمن وفارس بلا جواد، خامة صوتها مختلفة جدًا، ودي من الحاجات اللي خلتها متميزة.

محمد الشرنوبي
من ممثلين الجيل الجديد اللي أثبتوا حضورهم، من أهم أدواره دوره في مسلسل العهد وأفراح القبة

مؤخرًا اتقدمت مسرحيتين موسيقيتين من تقديم مجموعة من شباب المسرح، مسرحية يوم أن قتلوا الغناء، ومسرحية "ليلة"، الكاست كله عظيم، ولو اتعمل فيلم موسيقى أكيد هيبقوا من نجومه. الجمال اللي في المسرحيتين ما يتوصفش، سواء على مستوى التمثيل أو أصوات الممثلين واستعراضاتهم،  مسرحية يوم أن قتلوا الغناء بتتعرض على مسرح الطليعة، العرض من بطولة ياسر صادق، د. علاء قوقة، حمادة شوشة، طارق صبرى، هند عبدالحليم، محمد ناصر، أداء صوتى للنجم نبيل الحلفاوى. عرض "ليلة" المسرحي أول مسرح غنائى لفريق "القوى الناعمة"، بالتعاون مع فرقة المسرح الغنائى المصرى واتقدم على مسرح الماركيز

في مجموعة من المغنيين قرروا يقتحموا عالم التمثيل، في منهم اللي من فترة طويلة وفيه اللي لسه قريب، ومؤخرًا بقت أعمالهم كلها تمثيل بدون ما يكونوا بيغنوا فيها.
منهم

مدحت صالح: المفاجأة إن مدحت صالح شارك التمثيل في 44 عمل فني بحسب موقع السينما.دوت كوم، آخرهم كان موجة حارة وعائلة صالح
تامر حسني: تامر من أول ما ابتدى السينما أو التليفزيون وهو لازم يكون نجم العمل، مثل في 12 عمل فني، وبقى نجم شباك في السينما وجمهوره بيستنى أفلامه
أحمد فهمي: واحد من أعضاء فريق "واما"، أول دور ليه كان في خليج نعمة ودلوقتي كان واخد دور بطولة جنب نيللي كريم وزينة في مسلسل لأعلى سعر
مصطفى قمر: أول فيلم مثله مصطفى قمر كان مع أحمد زكي وهنيدي، شارك في حوالي 15 عمل فني بين فيلم ومسلسل، وكلهم كان بطل من أبطالهم
خالد سليم: ابتدى حياته كمغني، لكن حاليًا متواجد بشكل دائم في الأعمال الفنية، سواء السينمائية أو التليفزيونية، آخر مسلسل ليه كان "اختيار إجباري"