النهارده اليوم العالمي للغة العربية، لغتنا الأم ولغة القرآن ولغة الضاد وكل الكلام العظيم ده. نفسي أكتب المقدمة باللغة العربية وأقول قد إيه هي لغة مهمة وحلوة، بس مين قال إن اللي بكتبه ده مش "لغة عربية"؟ من فترة واحد بعتلنا مسج على صفحة "الفصلة" كان بيدعي علينا وبيقولنا ربنا يهديكم عشان بنساهم في تدمير الذوق العام، لأننا بنكتب بالعامية! الكوميدي بقى إن المسج بتاعته كان فيها أخطاء إملائية. مين قال إن العامية "لغة" أقل؟ أو "لهجة" ماتتكتبش؟ أو إننا المفروض نتكلم لغة عربية فصحى؟

لو كتبت على جوجل "اللهجة العامية المصرية"، هيطلعلك صفحة ويكبيديا، هتلاقي مكتوب فيها إنها لهجة منطوقة ومش مكتوبة وإنها لا يعترف بيها في الأبحاث والدراسات، رغم إنها بيتم التدريس بيها. وبالتدوير شوية، هتعرف ازاي بدأت العامية المصرية. هحكيلك الحكاية من الأول خالص..

اللغة العربية اللي أنت فاكرها الأصل دي، هي في الأساس لهجة "قريش"، قبل ظهور الإسلام كان في الجزيرة العربية لهجات كتيرة، بس كان فيه لهجة موحدة تستخدم في كتابة القصائد والعهود والمواثيق، واللهجة دي هي اللي نزل بيها القرآن الكريم، اللهجة دي بيطلق عليها أحيانًا "لهجة قريش"، وبعد الإسلام انتشرت في كل البلاد اللي دخل فيها الإسلام ومنها مصر، وابتدت اللغة العربية تتوغل في المجتمع اللي كان خليط ما بين لغات يونانية وقبطية وهيروغليفية، فطلعت اللهجة العامية اللي بيفهمها كل العرب عشان السينما والمسلسلات والأغاني، لكنها هتفضل لهجة مصرية خالصة.

ليه بقى بنتعامل معاها إنها حاجة أقل وبتبوظ الذوق العام؟

عشان مثلًا بتقول على أي حاجة "جامدة" بدل ما تقول عليها "جميلة"، طيب مين قال إن كلمة "جميلة" دي ماكانتش كلمة ماحدش بيستخدمها من 500 سنة؟ اشرحلك قصدي أكتر..

جربت تقرأ لشكسبير بالإنجليزي؟ لو آه، هتلاقي إن اللغة الإنجليزية اللي كتب بيها كتبه ورواياته، غير الإنجليزي اللي أنت عارفه وبتستخدمه دلوقتي، ليه ده بقى؟ عشان اللغة بتتطور وبيتضاف ليها ألفاظ جديدة وفيه ألفاظ بتتشال وبتحل محلها كلمات غيرها، وده مايقللش ولا من اللغة القديمة ولا الجديدة، يعني اللغة الإنجليزية متقسمة لإنجليزية بدائية وإنجليزية قديمة ومتوسطة وحديثة.

يطلع حد يقولنا: بس كل دي كانت لغة إنجليزية رصينة وفصحى، مش دخيل عليها كلمات مش إنجليزي أصلًا، طيب إيه رأيك بقى في الإنجليزي الأمريكاني اللي بتسمعه في الأفلام والمسلسلات والأغاني وحافظه؟ لما اتكونت الولايات المتحدة الأمريكية وجه سكانها من كل أنحاء العالم تقريبًا، اللغة الإنجليزية اتطورت فيها لدرجة وصلت إن الإنجليز نفسهم اللي جايين من بريطانيا، مابيعرفوش يتكلموا مع باقي السكان، لحد ما وصلت للغة الموجودة دلوقتي.

طيب اللغة العربية ليها قواعد، هنخل بيها كلها؟ وهندمر أصولنا وتراثنا؟

مين قال إن العامية مالهاش قواعد، أفاجئك؟ الكلام ده متراجع إملائيًا ونحويًا، ما هو ماحدش قال نخرف ونكتب كل الكلام غلط يعني عشان نبقى بنكتب زي ما بنتكلم. بس ليه نعقدها ونصعبها على نفسنا؟ ليه مانكتبش الكلام زي ما بنقوله، على الأقل في حياتنا اليومية؟ زي ما بنكتب دلوقتي على الفيسبوك كده وماحدش بيعتبر ده تقليل للذوق العام.

من سنين طويلة، دعا قاسم أمين لحركة اتسمت "تحرير اللغة العربية"، كان هدفها إن الإعراب مايبقاش مقيد اللغة العربية، وإن تبقى اللغة أسهل في التواصل، بس ماحدش استجاب للدعوة دي فماتت. ومن فترات قريبة، حاول مؤرخ وأستاذ اسمه عبدالعزيز جمال، وضع قواعد للغة العامية عشان الموضوع مايبقاش سداح مداح، يعني بس لسه الناس بتشوف ده تدمير للغة.

في 2010 كان أول كتاب أقراه كامل بالعامية، "كتاب مالوش اسم" لأحمد العسيلي، في الأول كنت مستغربة ومش فاهمة ليه ممكن حد يكتب بالعامية؟ وده صح ولا غلط ؟ بس من سنة تقريبًا، كان ليا فرصة اتكلم مع العسيلي اللي قالي إنها بالنسبة ليه "لغة" مش مجرد لهجة عامية، وإن فيها كلمات مش هيعرف يعبر عنها بأي حاجة تاني، ومهما حاول يكتب باللغة العربية مش هتطلع كل اللي جواه. عشان هو بيفكر بالعامية، وقالي بالنص "العربي العربي لغة عظيمة وأنا مش ضدها.. بس مافيش عيب لما المصريين يتكلموا ويكتبوا بالمصري ومالوش لازمة العداء اللي ضد العامية، المهم إن الناس تتعلم تكتب صح أصلاً".

هي دي الخلاصة بقى، المهم الناس تكتب وتتكلم صح، العامية مش لغة أقل خالص ولا هي ركيكة ولا بتبوظ أخلاقنا، العامية هي انعكاس لينا وتحسها شالت سنين طويلة بكل تعبها وفرحها وأحداثها وباين فيها كل تطوراتنا كشعب، أنا شخصيًا أحيانًا بحس إني عايزة أكتب باللغة العربية وإنها هتعبر عني أكتر، وأوقات تانية أحس ده مع العامية، زي ما فيه ناس بتحس ده مع الإنجليزي، كل ده مش غلط ولا بيدمر اللغة ولا أصولها.

ففي عيد اللغة العربية، كل سنة واحنا بنتكلم بالطريقة اللي بنحبها وبتعبر عننا.

 Main Photo: Ahmad S. El Abi