"سيب القهوة وروح الاستاد" ده الشعار اللي استخدمه بنك مصر في الإعلان عن قروض لتمويل رحلات السفر لمونديال روسيا، اللي هتشارك فيه مصر، في شهر يونيه الجاي. القروض هتمول 100% من تكاليف الرحلة، حسب اللي أعلنه البنك. القرض بينقسم ل4 برامج كالآتي:

1- موظفي القطاعين العام والخاص:
40 ألف حنيه حد أقصى للقرض، وممكن تبقى 50 ألف جنيه في عندك مرتب بيتحول للبنك. والفايدة 20.5%، لكن بتنزل ل19% في حالة لو عندك مرتب بيتحول للبنك. كل المطلوب منك إنك تجيب عرض من شركة سياحية بالأسعار، وتعهد من مكان شغلك بتحويل الراتب، أو شهادة إثبات دخل.

2- أصحاب المهن الحرة: 
40 ألف جنيه حد أقصى. 22.5% فايدة ومدة السداد 4 سنين كحد أقصى. دخلك لازم مايقلش عن 3 آلاف جنيه في الشهر، ومطلوب منك عرض الأسعار من شركة سياحية هتسفرك وشهادة دخل معتمدة من محاسب قانوني، وصورة من البطاقة الضريبية ورخصة مزاولة مهنة.

3-أصحاب المعاشات:
حد أقصى للقرض 30 ألف جنيه، وسداد على 5 سنين، بشرط سنك مايزيدش عن 65 جنيه عند آخر قسط لسداد القرض. الفايدة 18.5% في حالة تحويل المعاش و 19.5% في حالة عدم التحويل. هتحتاج نفس الورق زي الناس اللي فوق، وعليه خطاب بقيمة المعاش من الهيئة العامة للتأمينات والمعاشات، أو تعهد من جهة المعاش بتحويل المعاش للبنك، وتوقيع العميل على إقرار بتحويل الراتب للبنك لغاية سداد القرض.

4- منتج الأوعية الادخارية:
اللي هو قرض للناس اللي عندها شهادات ادخار أو ودائع في البنك. حد أقصى 100 ألف جنيه والفايدة تزيد 2% عن فايدة الشهادة، وتزيد ل4% في رحالة شهادات ال16% و ال20%. هتحتاج نفس الأوراق العادية، مع توقيع العميل على حظر كسر الشهادة، لغاية ما تسدد القرض.