اللي هتقراه مستوحى من أحداث حقيقية وبيقدم قصة ملحمية، ما دامت القصص يمكن أن توصف بالملحمية. لو مش فاضي، لو مش مركز، توقف عن القراءة وارجع في وقت تكون قادر تستوعب فيه. الحكاية حكايتي وحكايتك، حكاية أسراب وجماعات من أمك وخالتك وهما واقفين يرغوا على باب الشقة في نهاية الزيارة، ولما باب الشقة وبير السلم ضاقوا عليهم، قرروا يحولوا محادثاتهم دي لتجمع يضم الآلاف ومن بعدها الملايين، كلهن يعرفن كل شيء، كلهن يفسرن كل شيء.

ادّعي إن مفيش حد في يوم من الأيام دوّر على أي حاجة غير ولقى الجواب على منتدى فتكات. وقت ما كنت بشتري سيراميك لشقتي، كنت شخص بلا أي خبرة، نازل يلف على معارض شارع "ترسا" بلا هدف، حاولت أدوّر على رفيوهات لشركات السيراميك، واتعامل مع البلاطة كأنها موبايل أو لاب توب! المكان الوحيد اللي ساعدني هو "فتكات" *يشعر بالامتنان*. إحدى الفتوكات كانت هتتجوز قريب ودخلت حكت تجربتها عن شرا السيراميك، أنا كل اللي كنت محتاج اعرفه هو إيه الأنواع الكويسة اللي اختار منها، وإيه الأنواع الوحشة اللي أبعد عنها، لكن الآنسة -أو زمانها مدام دلوقتي- حكيتلي تجربة مفصلة عن معارض السيراميك، تشمل الآتي: الأنواع- الأسعار- طريقة الفصال- البيّاع- بصة البيّاع- شنب البيّاع- لبس البيّاع- العنكبوت المعشش في ركن من أركان الحيطة اللي محطوط فيها السيراميك اللي فرجهم عليه البياع! ومانسيتش تقول ملاحظات بسيطة، من نوعية ماتاخديش حماتك معاكي علشان ست رخمة، وخدي أمك علشان تعرف تفاصل..إلخ.

التجربة التانية كانت أقدم شوية، وقت ما استقليت في شقة لوحدي وقررت إنه كفاية تيك أواي، أنا هطبخ واعتمد على نفسي ومواردي. "فتكات" كان عندها المفيد، التفاصيل مهمة، خاصة لما تكون حمار، ممكن حد يقولك وصفة طبخ الرز، عادي، حط رز ومية وزيت وملح، ماحدش هيقولك الزيت كام معلقة ولا الملح قد إيه ولا حط "شياطة" تحت الحلة علشان القعر مايتحرقش ولا تعلي النار أمتى وتوطيها أمتى، عالم كامل كان ممكن ماتوصلوش، فتكات عملوا ده، عملوه معايا ومع كام ألف غيري.

بعد فترة من الطبخ والتسخين والدهون والرواسب، "قعر" الفرن الكهربا بتاعي اتحول لهباب، سيبته، المهم إنه لسه بيقوم بالغرض، بعدها بفترة أكبر تحوّل لهباب وريحة جثث، عادي مش مشكلة، بس لما الأكل اللي بعمله في الفرن بقى بيلقط ريحة كنت ابتديت أحس بمشكلة، روحت لفتكات، وصلوني لأسرع وأفضل طريقة لإذابة الدهون، كله باستخدام حلول منزلية بسيطة جدًا: الخل والخميرة وحاجات شبه كده. كنت مبسوط، حاسس بفخر. 

القانون والحكومات في العالم كله بيكرهوا القراصنة، العيال اللي بترجم كتب وأفلام أجنبية أونلاين، الأشباح اللي بتسرق كراكات فيفا غصب عن عين أم شركة EA Sport، فتكات في نظري بقوا رواد وقراصنة بس من نوع تاني وفي مجالهم، ناس بتدي وماتاخدش. أنا عملت إيه في حياتي؟ طب عملت إيه علشان ألاقي كل الناس اللي بتساعدني دي علشان أظبط طبخة الرز ولا تنضيف الفراخ والتخلص من الزفارة العالقة في أطراف الأصابع؟

علاقتي بفتكات فضلت ع المنوال ده، مش مشترك عندهم لكن بيظهرولي في جوجل سيرش، باخد منهم غرضي، بس بتكسف أقول ده وارجع اركب التريند واتريق عليهم أونلاين ووسط أصحابي، واتخانق مع أمي لما تقولي عاوزة ادخل على فتكات، لحد ما كنت في آخر مؤتمر من Rise Up، القدر حط قدامي الحقيقة وقالي خد ياله، منتدى فتكات طلع مؤسسه راجل، عمله بس علشان يسلي أخواته البنات اللي كانوا قاعدين في البيت فاضيين. حظي مأسعفنيش أقعد معاه وأكلمه، بس عرفت إن الكيان ده هتكونله معايا حكاية أكبر من إنها تستخبى، أنا أهو، لسه زي ما أنا، بتزنق من فترة للتانية وبلاقي الحل عند فتكات.