مارينا بنت مسيحية، كانت بتحتفل بفرحها وبتعمل فوتوسيشن مع عريسها في الأزهر بارك، علشان فجأة يدخل عليها مجموعة بنات منتقبات ويحتفلوا بيها بالغنا والزغاريط والأناشيد الإسلامية ويشاركوها في الفوتوسيشن. مارينا على فيسبوك بتقول: "كنت مبسوطة ومكنتش أتخيل أن هيكون ليا فرحين، دي كانت أجمل مفاجئة في حياتي، حاجه فوق الخيال".

كريستينا واحدة من قرايب العروسة، قالت إنهم كانوا ماشيين في الأزهر بارك بيختاروا الأماكن اللي هيتصوروا فيها، لما لقوا ستات منتقبات بيبصوا ليهم بإعجاب وبيبتسموا، قبل ما يقرروا يحولوا الابتسامة لمشاركة رسمية ويحيوا الفرح. واحدة من الأغاني اللي البنات زفوا بيها مارينا، أغنية "بارك الله لكما" لماهر زين.