سلمى الماجدي هي أول سيدة سودانية وعربية اتولت مهام تدريب فريق رجالة، بدأت "سلمى" شغلها في 2015 لما كان عمرها 26 سنة لكن موقع فيفا احتفى بيها مؤخرًا، وقالت المدربة العربية إنها كانت بتحلم باللعبة من طفولتها وكانت بتكتب كل حاجة بيقولها المدرب لأخوها وزمايله عشان تحفظ الخطط في الملعب. 

"سلمى" بتحكي إنها كانت حاجة صعبة إنها تدرب ناشئين، خصوصًا إنهم مبيسمعوش نصايح الكبار وكانوا بيضحكوا عليها لأنها "ست" لكن ده علمها الصبر لحد ما وصلت لتدريب فريق للكبار. المدربة السودانية كمان حاصلة على شهادة تدريب احترافية من الاتحاد المحلي في السودان والاتحاد الافريقي، ومعاها شهادة "ج" الافريقية وبتسعى عشان تاخد شهادة "ب"، في بداية تدريبها طلب منها "نادي النصر" خدماتها ورغم إن الفريق كان في آخر قائمة دوري الدرجة التالتة، قدرت تحقق معاه "سلمى" انتصارات متتالية واستمر في الدوري.

وبحسب موقع "فيفا"، فيه أندية كتير طلبت من سلمى تدريب الفريق فيها، وتم تصنيفها ضمن أفضل 100 امرأة في العالم بحسب BBC سنة 2015.