- مرة كنت ماشي مع صاحبتي وحاولت أمسك إيديها بس رفضت فقعدت أعيط

-- طب كانت خناقة يعني أو قافشين على بعض؟

- لا لا خالص بالعكس

-- أمال عيطت ليه؟

- ........

شاب مصري بيجاوب على سؤال: إيه أتفه حاجة عيطت بسببها.

الموضوع بدأ لما سألت مجموعة بنات عن حاجات هبلة عيطوا بسببها، ومن ساعتها وهما مجمعين بعض ولسه بيحكوا تقريبًا! في واحدة فتحت التلاجة مالقيتش جبنة شيدر ففضلت تعيط. واحدة تانية بترسم كانت رايحة تشتري ألوان من مكتبة، بس ماطلعوش بيبيعوا درجة الأحمر اللي عاوزاها، فعيطت! طب ما تشوفي مكتبة تانية يا ماما؟ بتعيطي ليه يعني!

العلم بيقول إن الدموع بتحصل بسبب استثارة المشاعر، سواء حزن شديد أو فرح شديد، وإن الدموع بيكون فيها مادة مهدئة الجسم بيفرزها، علشان كدة الناس بيدخلوا في وصلة عياط وبعدها يناموا على طول، بس على عكس الشائع، دي حاجة كويسة، لإن جسمك بيهدا فعلا وبتنام وتصحى أحسن، أو على الأقل بتبطل عياط.

طب الرجالة مابيعيطوش؟ لا بيعيطوا جدًا، وأوقات بتكون حاجات مش مفهومة أو تافهة بالنسبة لناس كتير، تافهة بالنسبة للبنات على الأقل. رجالة كتير سألناهم وكان عندهم إجابات بتدعم وجهة النظر دي.
  – اتفضل حضرتك قولي حاجة مش مهمة عيطتك

-- خناقة مع مديرتي في الشغل ودخلت الحمام أعيط بسببها

- عادي حقك، أوعى تحس بإحراج

-- لا إحراج إيه، هي أول مرة يعني!

الأسطورة بتقول إن الرجالة بتعيط أقل كتير من الستات، ده حقيقي. الأطفال، سواء ولاد أو بنات، بتكون عندهم نسب متساوية من هرمون "البرولاكتين"، وكل ما بيكبروا في السن، بتقل نسبة الهرمون عند الرجالة وتفضل زي ما هي عند السيدات، وده اللي بيخليهم بيعيطوا أكتر. لما الرجالة والستات بيوصلوا لمرحلة الشيخوخة، نسبة الهرمون بترجع تتساوى بينهم تاني، بس يمكن لأن الراجل بيتربى على فكرة إن العياط ضعف، وإن الراجل مابيعيطش، فبيبقى عنده اللي يمنعه يعيط حتى لو هرموناته زي الستات وأكتر، بس لسه الدنيا بخير وفي رجالة بتعيط على حاجات تافهة ومش مهمة عادي.

- سيبك أنت من الكلام ده، عيط ولا يهمك

-- لا ما أنا بعيط

- لأسباب تافهة؟

-- شوف مثلا.. كنت بتفرج على الأسد الملك وقعدت أعيط لما موفاسا مات

- بس ده كنت صغير؟

-- لا ده لغاية دلوقتي بتفرج وأعيط وبعيط وأنا بشوف كارتون القناص

في إجابات كتير اتقالت، من نوعية: شوفت موقف كذا، حد أعرفه مات، كنت تعبان وبتألم! مواقف طبيعي الواحد يعيط بسببها، بس الإجابات دي بتقول إن أصحابها مش مقتنعين إن الرجالة حقهم يعيطوا ويزعلوا ويدبدبوا في الأرض، بس كويس إن في ناس تانية شايفة الموضوع عادي. لو حاولت تفهم بنت إن رجالة كتير ممكن تعيط علشان فريقها خسر ماتش كورة، هيضحكوا عليك، هما مش فاهمين أصلًا فكرة تعلق الرجالة بالفرق اللي بيشجعوها وبالكورة، ودي بالنسبالهم تفاهة، زي ما الرجالة بالنسبالهم كل حاجات البنات تفاهة.

- بتعيط لو فريقك خسر عمومًا؟

-- لا مش عموما علشان لو عمومًا يبقى مش هبطل عياط

- ليه أنت زمالكاوي؟

-- لا ومش هقولك بشجع مين ففكك

- طب مش عاوز أعرف جاوب ع السؤال وخلاص

-- في الماتشات المهمة والبطولات الكبيرة، يعني كل لما بيبقى الطموح عالي وفي الآخر ترسى على مافيش، ممكن أعيط شوية

- ده بيحصل كتير؟

-- مرة ولا اتنين في السيزون كده

في حاجات اتقالت تضحك شوية، أو نقول إنها غير متوقعة أفضل من تضحك: "كنا أصحاب قاعدين في كافيه وطلبنا أوردر من مطعم وقالنا مش بنوصل لكافيهات، ساعتها كلنا بلا استثناء عنينا لمعت ودمعت". في حد تاني حكالي إنه كان سكران وقعد يعيط وهو بيتفرج على فيلم اتش دبور: "لما قاله جملة الجدعنة يا دبور، اتفتحت في العياط". بنت حكت "بفخر لا يخلو من شماتة" عن صديق ليها، كان رايح زيارة لجدته ولقاها عاملة أكل مابيحبوش فقعد يعيط. عمومًا يا رجالة ، الحياة صعبة وأنتوا ياما شيلتوا، نفسوا عن غضبكم وعيطوا، ماتتكسفوش، مش عيب، وعيطوا على حاجات تافهة عادي، حقكم اللي مش مسموح لحد يساومكم عليه.