• اكتب معانا
  • ماتنسناش
  • تابعنا
الموضوع اللي جاي
ست مصرية بتغير حياة الأطفال فى حي الزبالين
الموضوع اللي فات
7 سفريات لفردين بأقل من 3 آلاف جنيه

٦ دول عربية هتشقى عشان تاخد جنسيتها

محدش بياكلها بالساهل

العالم دلوقتي بقي كله منفد علي بعضه وناس كتير بتهاجر من بلدها الأم وتعيش في بلد تانية وتتجوز وتخلف فيها كمان، ويفضل في سؤال مهم، امتى تقدر تاخد جنسية دولة معينة؟ كتير مننا يعرف تفاصيل عن الدول الأجنبية، بس احنا هنتكلم عن الدول العربية وممكن تعمل إيه علشان تعرف تاخد جنسية دولة عربية ومدى صعوبة الحصول عليها

١- الكويت: 
لو بتفكر في الكويت فعلشان تقدر تاخد الجنسية لازم تبقي بلغت سن الرشد -بمرسوم بناء على عرض وزير الداخلية- وعشت هناك بطريقة شرعية لمدة عشرين سنة مستمرة وماخرجتش من الكويت طوال العشرين سنة أكتر من شهرين. لازم يكون ليك مصدر دخل مشروع، كمان لازم حسن السير والسمعة وتكون علي دراية كاملة باللغة العربية، والأهم تكون مسلم أو أسلمت ٥ سنين قبل ما تقدم على الجنسية ولو ارتديت عن الإسلام بتتسحب منك بموجب القانون. بوجه عام الحصول على جنسية الكويت حاجة صعبة جدًا ومتوقفة في الأساس على المرسوم ورؤية الجهة الحاكمة

٢- السعودية:
لو بتفكر في السعودية بقي، فهما عندهم نظام مختلف شوية بيعتمد على أعلى سكور، بمعنى إن في شروط مجموعها ٣٣، لو جيبت أكتر من ٢٣ اللجنة اللي بتتشكل علشان تقرر تديك الجنسية ولا لأ هتوصي بدراسة الطلب، ده مش معناه إنك هتاخدها، ده معناه إن الطلب هيدرس، لو ماوصلتش للسكور ده الطلب هيتحفظ من غير دراسة ولا غيره.
علشان نفهم أكتر، لو عيشت في السعودية لمدة لا تقل عن ١٠ سنين، مجموع النقاط بتاعتك هيبقي ١٠، لو معاك مؤهل علمي بتاخد نقط كمان، زي مثلًا لو شهادة دكتوراه في الطب أو الهندسة بتاخد ١٣ نقطة، لو ماجستير بتاخد ٨ نقط، وفي طبعًا الروابط الأسرية، يعني مثلاً لو مراتك ووالدها سعوديين بتاخد نقطتين. فوق دا كله لازم يبقى معاك رخصة إقامة، يعني وجودك في البلد شرعي ولمدة ١٠ سنين، ولازم تبقى سليم العقل والجسد وتثبت ده في تقرير طبي، وتكون بتتكلم عربي كويس جدًا ومحتاج شهادة من إمام مسجد الحي اللي بتسكن فيه.

٣- الأردن: 
بالنسبة للأردن فلو أنت عربي ممكن بعد إقامتك مدة مش أقل من ١٥ سنة مستمرة واستغناءك عن جنسيتك الأم، تقدر تقدم على جنسية الأردن، بشرط تكون حسن السير والسلوك، ليك مصدر دخل، سليم العقل والجسد وتقسم يمين الولاء والإخلاص قدام قاضي صُلح، ومن حق مجلس الوزراء رفض أو قبول الطلب المتقدم وبيبقي في مبلغ مالي لازم يدفع بيختلف على حسب جنسية المقدم

الإمارات:
الإمارات ليهم سياسية مختلفة شوية، لو أنت عماني أو بحريني أو قطري، ممكن تاخد الجنسية بعد الإقامة ٣ سنين في الإمارات، أما لو أنت من أصل عربي فممكن تاخد الجنسية بعد إقامة ٧ سنين، أما لو أي جنسية تانية فلازم تقعد ٣٠ سنة في الإمارات منهم ٢٠ سنة على الأقل من بداية العمل بالقانون، واللي بيقدم يكون محترف كلام عربي. من أهم الشروط في أغلب الحالات، إن اللي مقدم على الجنسية يبقي حسن السير والسلوك وليه مصدر دخل وذو أهلية. ممكن يتم منح الجنسية لأي حد قدم خدمات مهمة للدولة ومش شرط يكون أقام مدة معينة. في النهاية جنسية الإمارات من أقوى الجنسيات دلوقتي ومش سهل خالص الحكومة توافق على منحها، والأهم كمان إنها ممكن تتسحب من المتجنس في أي وقت لو دعت الظروف لكدة.

مصر:
بالنسبة لمصر، لو حد محتاج جنسيتها فلازم إقامته متقلش عن ١٠ سنين في البلد، يكون حسن السلوك وعنده محل إقامة بإسمه، ولازم يقدم مبرر لطلب الجنسية، مراته مصرية مثلًا، عنده مشروع في مصر، ومؤخرًا تم عرض مشروع قانون جديد بيقلل عدد سنين الإقامة اللي محتاجها الشخص علشان ياخد الجنسية ل ٥ سنين مقابل وديعة دولارية يحطها في البنك، بس لسه مانعرفش القانون دا هيرسي على إيه

البحرين:
عشان متتعقدش قررنا نعرفك علي جنسية أسهل شوية، ممكن ياخد جنسية البحرين أي شخص عربي أقام أكتر من ١٥ سنة متتالية، ولو غير عربي بيقوا ٢٥ سنة، بشرط إنه يكون حسن السمعة وعنده دراية كاملة باللغة العربية وعنده عقار مسجل باسمه. ممكن يتم منح الجنسية بأمر من الحاكم مباشرة وممكن تقدم لأي عربي قدم خدمات مهمة للبحرين. بوجه عام الحصول على جنسية البحرين أمر سهل مقارنةً بدول عربية تانية.

Home
خروجات النهاردة
Home
Home