موقع "الوطن" عمل حوار مع سلمى أحمد، البنت المصرية اللي قدرت تفوز بالمركز التالت على مستوى العالم في مسابقة "كاستك" العلمية المقامة في دولة الصين 2018 في مجال الطب الحيوي، بمشروع بحثي جديد لعلاج مرض سرطان باستخدام العلاج المناعي، وحسب "الوطن" سلمى أجرت اختبارات سنة ونص في مستشفى 57357.

سلمى لسه طالبة في سنة أولى ثانوي، وقدرت تبتكر علاج للسرطان باستخدام مواد طبيعية زي "الجنزبيل" و"حبة البركة" حسب كلامها لـ "لوطن". عشان تتأهل سلمى للمسابقة العالمية في الصين، انضمت الأول لمسابقة مستشفى 57357 للطلاب المبتكرين تحت السن الجامعي على مستوى الجمهورية كلها، وأخدت المركز الأول في المجال الطبي بالمسابقة وعشان كده تأهلت للمسابقة الصينية.

الفكرة الأساسية للعلاج اللي توصلت ليه سلمى، هي الاعتماد على المواد الطبيعية مع إضافة مواد كيميائية تقوي الجهاز المناعي وتدمر الخلايا السرطانية، وغلق جينات معينة بالجسم مسؤولة عن تعرض الشخص للإصابة بالسرطان، وبتقول إن العلاج أثبت نجاحه بنسبة 70%. مسابقة "كاستك" هي مسابقة عالمية للعلوم والهندسة لطلاب تحت السن الجامعي، وتقام سنويا في ولاية شون كينج بالصين.