في ظل محاولة الأهالي والمجتمع لتوعية أطفالهم بأهمية الصحة النفسية والضرر اللي ممكن يحصل لنفسية الشخص بسبب كلمات قليلة، تفاعل براند ملابس الأطفال Flamingo Rose بشكل رائع مع بوست لأم بتشتكي من تريقة زمايل بنتها "سيدرا" على شعرها.

الموضوع بدأ لمَّا اشتكت "سيدرا" أكتر من مرَّة لوالدتها بسبب تريقة صحابها على طبيعة شعرها الكيرلي، ورغم إن المُدرسين حاولوا يتكلموا مع الطلاب أكتر من مرَّة إلا إنهم مابطَّلوش، وروَّحِت يوم "سيدرا" البيت وهي قاصة شعرها لنفسها عشان تخلص من تريقة زمايلها.

كتبت الأم بوست في جروب للأمهات بتتناقش فيه معاهم، ولمَّا البوست وصل لـ Flamingo Rose اختاروا "سيدرا" كموديل ليهم.