"موزو" هو نوع شيبسي جديد مصنوع من الموز المجفف بدل شرايح البطاطس، بيتباع في أكياس صفرا ملونة، اشتغل عليه "أحمد مصطفى" الشاب القناوي هو و4 صحابه، بعد ما جت لهم الفكرة أثناء حضور مؤتمر دندرة الاقتصادي الأول 2015، من وفد سنغافوري عرض فكرة مشروع صغير مماثل حقق نجاح كبير جدًا في بلدهم.

شيبسي الموز فيه أطعمة مختلفة زي الشطة والليمون والكباب. اتعلِّم "مصطفى" هو وصحابه طريقة تجفيف الموز من فيديو أونلاين، بعدها جهِّزوا وحدة إنتاج صغيرة عشان يبدأوا تصنيع. أهمية صُنع شيبس من الموز بترجع لقيمته الغذائية العالية في مقابل البطاطس المقلية.

"مصطفى" بيقول إنه عمل تجربة على حضانات الأطفال في دندرة في قنا عشان يقيس مدى استيعاب السوق لمنتجه، والنتيجة كانت كويسة بالنسبة ليه وأظهرت مدى إعجاب الأطفال والكبار بمنتجه. كيس الشيبس بيتباع في معرض "إبداع من مصر" للأعمال اليدوية في أرض المعارض دلوقتي بـ 10 جنيه، بس "مصطفى" وعد بتخفيض قيمة الكيس في حالة إنشاء مصنع خاص بيه وإنتاج كميات أكبر. الخطوة الجاية بالنسبة لـ "موزو" هي محاولة الحصول على مصنع مرخص في المنطقة الصناعية الجديدة اللي هتتعمل في قنا.

المعرض مستمر ليوم 25 نوفمبر في أرض المعارض، ممكن تزوروه وتجرَّبوا "موزو"