الدكتورة "داليا السيد"، منسقة حملات التوعية بالأمانة العامة للصحة النفسية وعلاج الإدمان في مستشفى العباسية، وصاحبة مبادرة "الصعيد مش بعيد"، فكَّرت في حملة للتوعية بضرورة الاهتمام بالمرض النفسي، وعشان تحارب مركزية العاصمة قدر الإمكان قررت تعملها في محافظة أبعد ما يكون عن القاهرة، وقالت "لما فكرت إيه أكتر الأماكن اللي ممكن مش معترفة بالمرض دة، جه في بالي مدن الصعيد".

بدأت "داليا" في عمل استطلاع على الإنترنت عشان تعرف الأماكن اللي ممكن تبدأ بيها، بالتوازي مع تخطيطها كان في حملة اسمها صحتك النفسية تهمنا في قنا، بتتواصل مع مستشفى العباسية إنهم يعملوا حملات هناك. فـ حسّيت داليا إنها وجدت ضالتها في الحملة دي.

الحملة اتعملت في "قنا"، شارك فيها خمس أطباء، وشملت تفاعل كبير مع الأهالي في واحدة من القاعات التابعة للتنمية المحلية لمدينة "دشنا". انقسمت التوعية النفسية في المبادرة لتلات عناصر رئيسية؛ التوعية بمرض الاكتئاب وأعراضه، والقلق، والفصام. وأهم حاجة ركِّزوا عليها كانت الإدمان وازاي نتعامل معاه كمرض. "داليا" قالت لمصراوي "الناس اللي حضروا كانوا مش مقتنعين إن الإدمان مرض ممكن يتعالج، شايفين إنه طالما الشخص دخل في السكة دي فخلاص مفيش رجعة".

"محمود منظم", مدير وحدة طب المجتمع بمستشفى العباسية وواحد المشاركين في المبادرة، بيقول إن المشكلة ونقيضها كانوا موجودين، "إن الناس بعضهم كان معتقد إن تعاطي الحشيش مثلا كل فترة مفهوش مشكلة ومش مضر".

"داليا" بتقول إن الأفكار التي بيتكلم فيها فريق المبادرة تعتبر جديدة في الصعيد، "عشان كدة أخدنا معانا حد متعافي من الإدمان كان بيتكلم عن تجربته وبيرد على أسئلة الناس".

محافظة قنا كلها لا تضم مستشفى نفسي، وحسب منظمي المبادرة، الناس في "قنا" ماكانوش يعرفوا إن "أسيوط" و"سوهاج" فيها مستشفيات نفسية ممكن يروحوها.

المبادرة كان فيها جزء ترفيهي زي الماراثون اللي عملناه على الكورنيش ونظمه فريق keep fit runners.