كل الناس بتعاني من مشكلة نقص الدواء، ممكن الفلوس تبقى في جيبك، لكن الدوا مش موجود، وممكن يبقى الدوا موجود لكن تمنه أعلى من قدرتك بكتير. أحمد العناني قرر يستخدم التكنولوجيا علشان يساعد في حل المشكلة، من خلال أبلكيشن "سبيل"، واللي هدفه يوصل الدوا للناس بشكل مجاني للقادرين ولغير القادرين. "سبيل" وسيط بين الناس اللي ناقصها الدوا وبين الجهات والأفراد اللي عندهم النوع الناقص أو الغالي.

موقع "مصراوي" اتكلموا مع العناني اللي قال إنه كتير كان بيلاقي ناس علاجها واقف علشان دوا ب30 جنيه، وإنه كان بيلاحظ المشكلة عند جيرانه ومعارفه في مدينة بنها. العناني ضاف إن أزمة الدوا وضحت أكتر بعد ارتفاع الدولار، وده اللي خلاه يستغل خبرته كمهندس برمجة علشان يعمل الأبلكيشن بمساعدة صديق ليه بيشتغل في مجال الأدوية.

التطبيق بيحتاج إن المستخدم يدخل بيناته وطريقة للتواصل معاه. كمان العيادات والمؤسسات الخيرية ممكن تسجل في الأبلكيشن علشان تساعد الناس يوصلوا للدوا. العناني بيتواصل مع صيدليات ومؤسسات خيرية وبيجمع بيناتهم علشان يشاركوا في الأبلكيشن ويساعدوا الناس تلاقي الدوا الناقص عندها.