حاجات كتير بتكون في الأول معمولة لمجرد الترفيه لحد ما القرش يدخل و يبقى في ربح، ساعتها الموضوع بيقلب جد ويبقى أكل عيش. قنوات اليوتيوب بتمشي بالمبدأ ده، وخصوصاً القنوات بتاعت المهرجانات، القنوات دي مصدر أكل عيش مهم، من غيره ناس كتير تقعد في البيت. حبيت أفهم أكتر عن البيزنس ده، اتكلمت مع زيزو "ار سي سي"، واحد من أول الناس اللي دخّلت المهرجانات على اليوتيوب وبسببه في ناس كتير بقت نجوم.

الموضوع بدأ معاك ازاي ودورك في المهرجانات إيه؟

أنا كنت بسمع الأغاني دي الأول وكنت بنتقدها، يعني مهرجان "السلام" أول ما سمعته انتقدته، بعدها جربت اسمع المهرجان تاني وأنا متضايق، لاقيته خرجني بره الموود وحسيت إن الموضوع ده لازم ياخد حجم أكبر من حجمه ويوصل لناس أكتر.

كنت لما بدور على مهرجانات على النت بلاقي مهرجانين بالكتير وفي أغاني كنت بسمعها مش بلاقيها على النت، اكتشفت إن الناس كانت عشان تسمع المهرجان و تحمله، لازم تروح مكان وتاخد المهرجان على تليفوناتها، أيام الـ N70 و النوكيا 6600. قلت طب ما نعمل صفحة على الفيسبوك نجمع فيها الكلام ده؟

بدأت أعمل كده، كنت باخد المهرجانات وبجمعها من صحابي وارفعها على النت. عملت أول صفحة كان اسمها "فيجو شبح اسبيكو"، أيامها لو كان عندك 2000 على الصفحة يبقى أنت كده بطل، الكلام ده في 2010.

لو أنا مغني مهرجان جديد وعايز اعمل قناة يوتيوب تجيب فلوس.. اعمل إيه؟

في ناس كتير بتجيلي وتكون عايزة تعمل الموضوع ده، لو مطرب جديد وعنده الموهبة ممكن أقف جنبه، واتكلم معاه في المهرجان نفسه عشان يعدله لو هو عامل حاجة غلط، لإني بكون عاوزه يسمّع وينجح، فبقوله تعالى أعملك قناة ونبتدي سوا، لو مش موهوب مش بهتم بيه، لأنه حتى لو عمل مهرجان ونجح، مش هيكمل وهيكون من أصحاب الأغنية الواحدة.

طب إيه القنوات اللي أنت ماسكها وبتحمي المحتوى بتاعها ازاي؟

أنا بقالي 9 سنين في المجال ده فبقيت فاهم في السوشيال ميديا زي "توتير، يويتيوب، انستجرام، وفيسبوك"، غير كده في مواقع مش منتشرة في مصر بس بره مصر مسموعة، زى dailymotion، وده بشتغل عليه لزوم التسويق لبره مصر. الحماية دي بتاعتي أنا بقى، عشان بتعامل مع إدارة اليوتيوب، يعني التراك لو اتسرق بعرف أحل المشكلة، وكده كده في عقد بيني وبين المغني بموضوع الحماية ده وعشان كل واحد يضمن حقه.

الناس بتعرف ازاي إن في قناة جديدة ظهرت؟

بشيرها عندي على صفحات فيسبوك ومنتدى يوتيوب الجديد اللي تبعي، هي حاجة زي فكرة الفيسبوك بس على اليوتيوب و دي حاجة جديدة في اليوتيوب،  كمان باخد 50 ثانية من الفيديو أحطها على انستجرام كفيديو تشويقي وأقول استنوا المهرجان الفلاني هينزل يوم كذا الساعة كذا، ده ماكانش بيحصل قبل كده في المهرجانات، أنا أخدت الفكرة دي من دعايا المطربين لألبوماتهم، زي عمرو دياب وحماقي، بس لما عملت ده في المهرجانات الموضوع نجح والناس حبيته، وأول مهرجان عملت معاه كده كان مهرجان "مدلعة".

وبالنسبة للأرباح ليك ولصاحب القناة؟

لا دي أسرار مش هتكلم فيها

طب نفترض القناة اشتغلت و نجحت وصاحب القناة اختفى أو مات أو سافر أو اعتزل، بتتصرف ازاي في القناة؟

لو بتاعتي يبقى باخدها عشان في الأصل بتاعتي، ببيعها والسعر بيتحدد حسب المشاهدات والاشتراكات (الفيوز والسبسكرايب)، وهل عليها مخلفات وواخدة دروع ولا لأ وجمهورها مصري ولا مش مصري. الدروع دي بتاخدها من يوتيوب كل لما تجيب أعداد مشاهدات أكبر، تعدى ال 100 الف مشترك تاخد الفضة و المليون دهب و في ماس و بعد الماس حاجات تانية كل ما عدد المشتركين يزيد. المخالفات بقى زي حقوق النشر وكده.

قدرت تجيب دروع لقنوات مين؟

جبت مثلا لفيجو، ضاحي ريمكس وغيرهم كتير، كمان قنوات بمحتويات تانية، دينية مثلا وأغاني خليجي من الإمارات والعراق، لأن الحمدلله في ناس من بره مصر بتكلمني أمسكلها قنواتها

اليوتيوب بقى مصدر دخل رسمي؟

طبعاً، في شركات دي شغلتها، تصحي تفتح القنوات اللي ماضي معاها ويشتغل عليها، بالنسبالي برضه دي شغلتي الأساسية ومش هبطلها إلا لما اليوتيوب نفسه يبطل ويقرر يمنع الأرباح في مصر.

إيه أكتر قصة اثرت فيك وأنت شغال في المجال ده؟

كان في ولد بيرفع محتوى voice over بصوته، زي "أغرب سبع حاجات في مصر" ويجيب صور ويتكلم عليها بصوته، القناة دي كانت بتصرف على دراسته الجامعية وعلى والدته، وكان والده متوفي وبيجوز أخواته البنات من مكاسب يوتيوب، كان بيعمله 600 دولار ولا 800 دولار في الشهر ومرة ضربت معاه معاه وجاب 1000 دولار. كلمني عشان قناته اتقفلت رغم إنه مش بيسرق محتوى، حليت المشكلة في 3 أيام فكلمني شكرني وقالي خد والدتي عاوزة تشكرك، لاقيتها بتعيط وبتقولي أنت ماتعرفش القناة دي بتصرف علينا ازاي.

مرة تانية كان في بنت عاملة فيديو على Musically والفيديو بتاعها ضرب شوية وهي كانت من منطقة شعبية، الفيديو وصل لأخوها فضربها بالمطوة في وشها وكان عايز يموتها، بس واحد يعرفه ويعرفني قاله أنا هخلي حد يقفل الفيديو ده خالص، وفعلاً كلمنى ومسحت الفيديو وربنا سترها مع البنت.