المهرجانات ظاهرة وفن، نتفق أو نختلف معاها بس مانقدرش نقول إنها مش فن، لكن ممكن نتخانق على أسلوب الفن ده والمحتوى بتاعه والعناصر المكونة ليه. اللي لازم نعرفه إن أي فن فيه الحلو والوحش ومش معنى إن المهرجانات طلعت من المناطق الشعبية تبقى حاجة وحشة. عشان نفهم ونقرب أكتر من عالم المهرجانات، قررنا نتكلم مع حمو الحلواني، واحد من أقدم الناس في فن المهرجانات في إسكندرية

أنت عرفت المهرجانات ازاي؟

أنا طول عمري بسمع عدوية وده من صغري، وجورج وسوف، لكن ماكنتش بسمع الشعبي الفحت الجامد أوي ده، كمان طول عمري بسمع الأجنبي زي فريق modern talking و frank sinatra أبويا الروحي، وكنت بسمع تامر عشور، شوية محي ومحمد فؤاد ومنير وأحمد منيب، ومرة واحدة لقيت المهرجانات دي طفت علينا بعد "فيجو" ما قال:

انا نازل يا سعاد

خلي بالك من الواد

وبعدين؟

كان بالنسبالي ده غنا عادي وماكنتش أعرف يعني إيه مهرجان ولا حتى بتتسجل ازاي، بس ساعتها اتعرفت على "فيلو" وكان مكسر الدنيا ونمبر وان في إسكندرية. روحت ستوديو الدرابوكا قابلت فيلو، بس هو مشى من الاستوديو بعد كده وفضل حمو صبحي وسجلت معاه أول مهرجان "العين بتعشق والقلب يعشق"

                                                                                         حمو الحلواني

بيكمل حمو: "الاستقبال كان حلو والجو برضه وأدمنت المهرجانات. بعد كده عملت مهرجان اسمه "العشره أدرجية" مع ناس اتعرفنا عليهم في سيدي جابر وسجلناها في خلال شهر رمضان والحمد الله المهرجان ضرب وبقينا ناكل عيش. وده أكتر مهرجان سمّع وانتشر ليا.

محمد منصف عمل مهرجان الدنيا ساعة مع فيلو وعملت معاه أنا "الدنيا ساعة و معدية" الجزء التاني وتوزيع فيلو

بعد كده اتعرفت على "أبو ليلة" اللي عمل مهرجان "احنا بتوع ربنا"، وعملنا كليب على قناة "شعبيات"، صورناه مع "وزة مطرية" اللي كان مع فريق 8%، هو اللي أخرج فيديو "مهرجان حصلت لك مرة" اللي نزل على قناة شعبيات وكانت لسه في بدايتها.

بس المهرجانات سبوبة يعني الناس واخداها شغلانة وأكل عيش

أيوة 90% منهم سبوبة، ليه؟ كلهم خارجين من مناطق شعبية، يعني دي شباب غلبانة عادية جداً بتكافح عايزة تعيش عايزة وتوصل وبتحلم إنها تحقق ذاتها وتشتهر. أنا عندى 43 سنة، يعني صعب نجيب جيلنا لفكر الشباب الصغير ده، اللي طلع في وقت لقى كل حاجة في البلد غالية وعايز فلوس. فكر بتوع المهرجانات، أنا مش هساعدك ببلاش، في مقابل، وأنا طالما متسيط وضارب ومعروف وأنت أقل مني، يبقى لا يمكن أساعدك، لو أنا متسيط لازم أعرف اللي متسيط زيي عشان نساعد بعض احنا الاتنينـ هي دي فلسفة بتوع المهرجانات.

ليه الناس شايفة المهرجان فن هابط ؟

الناس من قديم الأزل مع كل جيل، لما طلع عدوية الكل قال ده فنان هابط، عدوية كان مكروه عشان كانت مصر الكلاسيكية بتاعت ال ستينات لحد التمانينات، ومن بعدها بدأت خلاص تتقبل الشعبي وبداْ يظهر لنا شعبان عبد الرحيم بالرتم بتاعه اللي مش بيتغير وحط عليه أي كلام. يعني الشعب اتغير والذوق اتغير. في ناس بتفتكر إن كتر الإسفاف بيجيب مع الشباب، وتحط في الأغنية مصطلحات فيها إيحاءات جنسية عشان تقدر توصل لدماغ المتلقي بأسرع وسيلة وتركب معاه، وده إسفاف، فأنا شايف إن المهرجانات فن هابط لو دخلت فيه الإسفاف.

ليه المهرجانات بتنتشر بسرعة؟ تفتكر الثورة ليها دور إن الناس عايزة التغيير؟

أنا قولت في بداية كلامي إن مصر خرجت من العهد الكلاسيكي وأغاني الحب والمحن، المهرجانات فرضت نفسها عشان الوقت بيتغير ورتم الحياة بقى سريع، الناس عايزة الدرامز والطبلة اللي ترقص وده مايمنعش إن في ناس بتعشق الرومانسي، بدليل إنه موجود لحد النهاردة مع عمرو دياب، اللي هو لون تاني غير لون المهرجانات. بعد الثورة حاجات كتير اتغيرت وأنا شايف إن المهرجانات أصبحت إدمان بالنسبالي، بس لما برجع لنفسي واسمع في البيت مع نفسي، بسمع "فرانك سيناترا".

المهرجان تغير وتطور؟ يعني دلوقتي المهرجان له صوت مختلف عن زمان؟

اتطور، مثلاً  فيلو كان فارد سيطرة بالرتم بتاعه السريع مع لون المزيكا اللي بنرقص عليها على كلام غير جارح، اتطور لظهور حمو بيكا والشاعر الفاجر اللي بيكتب له، بيكا مش بيغني سريع، والشاعر الفاجر بيكتب رتم أبطأ بلون الموال، احنا في الأول كنا بنقول المهرجان رص سريع، لكن بيكا فرض لون تاني. 

                                                                           فيجو الدخلاوي - حمو بيكا - حمو الحلواني

إيه الفرق بين المهرجان بتاع القاهرة وبتاع إسكندرية؟

فرق كبير، مهرجان القاهرة بيضرب في الميديا بعدين يوصل إسكندرية يشتغل في قاعات الأفراح، بس صعب يعجبنا في القعدات بتاعتنا في إسكندرية عشان احنا مزاجنا صعب. إسكندرية عمومًا فيها الشعر والكلمات بس القاهرة فيها موزعين أكتر بكتير، احنا عندنا أزمة موزعين.

في القاهرة برضه آخرهم يعملوا المهرجان 4 دقايق، إسكندرية المهرجان فيها شغل وبيزنيس وسبوبة، يعني ممكن مهرجان يوصل ل 12 دقيقة. الزبون بيدفعلك كام الف جنية عشان تعمله مهرجان، بس لازم تحط اسمه في المهرجان، عشان الأسامي دي تضرب وتنتشر ويقولك أنا اتسيط والمهرجان ده بتاعي.

"في الدقيقة 05:22 حمو بيكا بمسي على قرية عبد الوهاب" احلى اسماك احلى مشويات

طب المهرجان مزيكا شعبي؟ بتوع الشعبي بيقولوا إن المهرجان مش تبعنا؟ وهل فيه حرب؟

لا كل اللي بيغني مهرجان مش بيغني شعبي، عشان اللي بيغني شعبي بيكون دارس مزيكا ومقامات، بيعرف يطلع على المقام ويمسك الحروف ويطلع على أي أورج يكسر الدنيا، بس في عندنا في المجال ناس بيغنوا شعبي، زي مودي أمين وبندق وتيتو. بتوع الشعبي شايفين إن بتوع المهرجانات سيطروا والموضوع بقى مادي بحت وأخدنا مكانهم.

أنا فاكر إن أبو ليلة قالي إن مصطفى كامل قاله إن في حرب ما بينا وما بينهم وهدده، راح أبو ليله قاله "احنا اللي قعدناكم في بيتكم"، اه في صراع ما بين الشعبي والمهرجانات من تحت الترابيزة، لكن الظاهر قدام الناس إن الدنيا حلوة.

شايف إنك تقدر توصّل فكرة أو فكر معين من خلال المهرجانات؟

أنا كل المهرجانات بتاعتي بتتكلم على الناس الغلابة وعن الظلم وعن حد اتظلم في حياته وأخ عامل مشكلة مع أخوه، وبنحاول نوصل الفكرة دي، إنك ما تظلمش حد أو تحكم عليه بسرعة، المشكلة إن دلوقتي في شباب عايزة تعمل مهرجانات عشان تشتم وخلاص على كده.

إيه رأيك في حمو بيكا؟

حمو بيكا كاريزما عالية أوي وواكلة مع الشعب، خصوصًا إن في وسط الضغوطات دي الناس محتاجة لحد يضحكها، لكن حمو بيكا هو بنفسه اعترف إنه طلع من مدرسة الكبار حمو الحلواني ومحمد منصف، يعني لو سألت حمو بيكا وقلتله أول مرة مسكت مايك فين؟ هيقولك في ستوديو الكبار مع حمو حلواني ومحمد منصف

                                                                   حمو حلواني و حمو بيكا

 حمو بيكا نجاحه بسبب تيم ورك يعني الشاعر الفاجر حط تحت اسمه 3 خطوط، يقدر يكتب 10 مهرجانات في ساعة وفيجو الموزع ومودي أمين اللي بغني طرب.

طب و ليه حمو بيكا ضرب بسرعة كده؟

النجاح له مقومات يعني في نظام، حمو بيكا بيجمع بين حاجتين: لغة الشارع كأدارجي شارع وفاهم وبين التعامل مع بتوع المهرجانات. كمان بيرضي كل الأطراف، ونجح ومعاه موزع وشاعر جبار وواحد صوته جميل، ليه ما ينجحش؟ كمان في ميديا، بمعنى إن فيجو الدخلاوي صفحته في اليوتيوب نمبر وان في إسكندرية، أي حاجه بتترفع عليها لازم تضرب.

وبيعمل فيديوهات لايف على طول بالطريقة الارتجالية، ودي جايبة مع الناس أوي وبيضحكوا على كل إفيه يقوله. في بدايات بيكا عملت معاه ومع منصف مهرجان اسمه يا "بيه يا بيه" في 2016

وكمان عملنا مهرجان اسمه "أشقية الضاهرية"

عندك وظيفة ولا بتعتمد على المهرجانات كدخل أساسي؟

أنا خريج كلية آداب قسم آثار مصرية واشتغلت في شرم الشيخ في السياحة و بتكلم 4 لغات إنجليزي والماني وفرنسي وإيطالي، وحاليًا بقوي الألماني بتاعي، مش عشان السياحة ولكن عشان اشتغل في مجال الترجمة، والمهرجانات بالنسبالي حاليًا مش مصدر أساسي، أنا مش منتشر بالدرجة الكبيرة زي حمو بيكا.

                                                                                                  حمو الحلواني و ناصر غاندي في فرح عائلة البولي في العوايد

احنا كده خلصنا بس في حاجة في دماغك عايز تقولها؟

الناس اللي بتسمع مهرجانات ما تحكمش على كل بتوع المهرجانات دول بظلم أو تسرع، احنا مش سرسجية ولا جمهورنا كده، المهرجانات بتتسمع في الطبقات العليا وفي كل حتة.