دلوقتي نص مزيكاتية مصر بيتقال عليهم اندرجراوند، وأي حد معدي ممكن يغني ويعمل فرقة كمان، بس من 10 سنين ماكنش ده الوضع، لما بدأ أحمد شمس Sunny يفكر في المزيكا ويأسس مقام باند في أسكندرية سنة 2013 في وقت ماكنش فيه فرق كتير، ومن قبل كده كمان وهو بيلعب مع فرق تانية، ياسين زهران قابل "sunny" واتكلم معاه عن بداياته وازاي عمل مقام، وليه ساب المزيكا، والموضوع كان مكلف قد ايه؟ 

بدأت مزيكا ازاى ؟

بدأت مزيكا سنة 90، درست في الكونسرفتوار ولعبت فيه 5 سنين وبعدين المدرس بتاعي قالي ادرس في جامعة Trinity من خلال الكونسرفتوار بس و فعلاً درست classical guitar وتاريخ المزيكا والنظريات وحاجات كتير وفضلت هناك لحد اخر مستوى وكنت بحضر دبلومة بس بسبب اني كنت داخل كلية في مصر معرفتش اكمل، ومن هنا جه اهتمامي بالمزيكا بس مش الكلاسيك لكن الروك.

كنت بتسمع مين من فرق الروك ؟

وأنا في إعدادي في 94 مثلًا الروك و الميتال كانوا ممنوعين في مصر، وكنا بنهرب الشرايط، حد يجي من بره معاه الشرايط الكاسيت وكلنا نعمل كوبي، وطبعا النسخ بتطلع صوتها رايح في داهية، ونفضل نسمع ونتعلم من أي باند زي The scorpions مثلًا، ومن هنا أنا حبيت الروك، وبدأت اعرف فرق اكتر زي Metallica و black Sabbath و Iron Maiden.

وبعد كده دخلت في سكة تانية خالص للبروجريسف شوية أو المزيكا المختلطة وعرفت باند اسمه Dream Theater  وده أكتر فريق اثر فيا، الجيتاريست بتاعهم جون باتروشي هو المثل الأعلي ليا، واكتر حاجة شدتني فيهم إنهم 4 أفراد بس بيعملوا شغل المزيكا كله، ولما درست مزيكا كنت عايز ادرس الستايل بتاع الروك والميتال والجاز والفيوجين، عشان البروجريسف مش روك او ميتال بس لكن توليفة على شوية حاجات كلاسيك كمان.

و إيه أول فريق عملته ؟

أول باند كان اسمه "المار" كنت أنا وأصحابي سنة 2000 واحنا في المدرسة، بس أول حفلة كانت 2002، وكنا 3 أو 4 فرق مستقلة بس في أسكندرية، عشان ساعتها مكنش في حد غير فريق الحب و السلام و دول اقدم فريق من السبعينات و فريق رسالة وفريق "نميرا" اللي عمله حمزة نمرة، ففكرة انك تعمل فريق مستقل كانت غريبة شوية، وكمان هتفضل تفكر تعمل حفلات فين؟، فبدأنا نسأل الأكبر مننا بيغنوا فين وبيعملوا ايه، فاتعلمنا من فريق الحب والسلام لأنهم أقدم ناس.

والاتجاه بتاعنا كان مش روك خالص كان فكرة الروك العربي يعني أو السوفت روك العربي اللي هى الكلمات عربي و المزيكا سلو روك أو سوفت روك دي كانت البداية، وعملنا حفلات في مركز الفنون في مكتبة اسكندرية وحضرنا ورش مع فتحي سلامة في الجيزويت فاتعرفنا على فرق كتير.

طب و فريق مقام ؟

قبل "مقام" كنت بلعب مع اوركسترا مكتبة الأسكندرية، وكنت بلعب كضيف مع فرق تانية من 2008 لحد 2013 بس وقفت عشان كنت شغال موظف في شركة وحياتي كانت شغل في القاهرة عشان اجيب فلوس فصعب أسافر اسكندرية اعمل بروفات وكده، وكانت الفكرة بتيجي في دماغي اني نفسي أعمل حاجة بطعم جديد، يعني اخد من كل أنواع الموسيقى الجاز والفيوجن والروك والميتال واعمل مكس، بس قلت محدش هيسمعنا وممكن يقولوا علينا عبدة شياطين عشان فيه ميتال.

وبسبب حبي للمزيكا التركي والفارسي والمقامات العربي والشرقي قلت لازم ده يتوظف، وكان صاحبي مصطفى دارس في أوبرا سيد درويش وبيفهم الشرقي، كلمته وشرحتله الفكرة وقعدنا مع بعض، وقلنا ندمج الحاجتين سوا والشعب المصري يقدر يسمع المزيكا دي، وظهور المهرجانات خلاني أفكر اني لو لعبت مزيكا قدام ناس كتير مش هيسمعوها لكن لو دخلت حاجة بيحبوها زي الموال هيسمعوها.

ومن هنا بدأنا "مقام" ودخلت في الفريق آلات موسيقية جديدة على الموضوع ده، يعني القانون مع الجيتار والدرامز مش تخت شرقي، وكنت محتاج حد يلعب طبلة ورق عشان يساعد ويعمل إيقاع شرقي مع الدرامز الغربي ويبقى الصوت عربي ونعمل دمج.

مين كان بيألف الكلمات وازاي كنتم بتعملوا الأغاني؟

بدات انا و جون عماد اللي بيلعب قانون نعمل المزيكا و نكتب، يعني نقعد في أوضة البروفات و نجيب ورقة و قلم و نقول هنعمل دي كذا و نعمل ده كام بار ونحدد افكارنا في المزيكا وبعد كده بقية الباند كان معانا "ماريو" بيلعب كيبورد، و"سيمو" درامز، و"مؤمن" بيز جيتار، و"بودا" بيلعب بركاشن ومصطفى المغني وبيلحن معايا. لكن الكلمات مكتبناش ولا حاجة منها، كان فيه ناس أصحابنا شعراء نستأذنهم نغني كلماتهم، أو مثلًا باند "كراكيب" لما عملوا"موج البحر" قلت لشريف اللي كتب الكلمات وغناها "أنا عندي رؤية تاني ممكن اعمله" ، أهم حاجة تكون الكلمات مناسبة لستايل المزيكا اللي بنلعبه زي أغنية "سندباد"

فريق مقام كان بيعكس ايه في دماغك ؟

كان بيقول للناس من فضلكم اسمعوا حاجات جديدة والرسالة دي للعالم كله مش مصر بس، أنا مكنتش بقدم مزيكا، أنا كنت بقدم نوع مزيكا جديد، فيه حاجات شبه اللي بعمله زي فريق "ميراث" التونسي" لكنهم معتمدين على الكيبورد والفوكال بس في الشرقي وساعات بيحطوا طبلة، بس احنا عندنا الآت شرقي وموال مصري.

عملتوا حفلات هنا في مصر و برة مصر ؟

اول حفلة لمقام كان في سنة 2015، وبعد أول حفلة دي كان وراها علطول مهرجان بنالي الدولي في إيطاليا.

و ازاى شاركتوا في المهرجان ده ؟

قدمنا من خلال ابليكشين على النت، وسمعوا شغلنا فقالوا انتم معانا وكنا الفريق الوحيد من مصر بس في السنين اللي قبلنا كان فيه "مسار إجباري"، الحلو في الموضوع إنهم طلبوا مننا ندي ورشة عمل لمدة يوميين للموسيقيين الجايين من الدول التانية عشان الطابع الشرقي بتاعنا.

قابلتكم مشاكل في مهرجان إيطاليا؟

طبعا كان فيه أزمة الفيزا عشان لازم تطلع بسرعة وإدارة المهرجان بلغوا القنصلية وفضلوا متابعين معانا، وتصاريح السفر عشان الخدمة العسكرية، وشوية تعطيلات روتينية كانت هتخلي نص الفريق يسافر والنص التاني يروح متأخر، بس إدارة المهرجان اتدخلت.

طب الجيتارات سافرت إزاى من مصر ورجعت تاني بسهولة ؟

أي حد بيسافر بيثبت الحاجة اللي معاه على الباسبور، لكن مسئول الجمارك في مصر قالي مش لازم تثبتها، قلتله وأنا راجع هتجمرك، قالي لا عادي، وطبعا وأنا راجع من إيطاليا لاقيتهم بيقولولي هنجمركه، فوريتهم الصور والفيديوهات من أول حفلة عملتها، وبعد نقاش وذل كتير عديت بس اتبهدلنا يعني.

بعد حفلة إيطاليا الفريق توقف عن العمل ؟

ده لأسباب كتير منها الخلافات الداخلية، الأفكار ماكنتش كلها متوحدة ومتحددة ، وكان فيه أسباب تاني زي توفير المساحات والأماكن يعني هما كام مكان في المكتبة والجيزويت والمركز الثقافي الفرنسي ومسرح سيد درويش وخلاص كده.

وفيه كمان ناس في مصر تقولك لو الجيتار ده عمل صوت معين يبقى الناس دي عبدة شيطان، يعني سكر وعربدة وأنا منكرش إن ده بيحصل في بعض حفلات الميتال بس دي مش طقوس، هو بس بيبقى فيه ناس شاربة قبل ما تدخل الحفلة.

يعني عدد الأماكن بتقل؟

بالظبط كده، أنا عايز أوصل مزيكاتي للناس ومفيش أماكن كفاية و فاكر ليالي التلفزيون اللي كان بينزله مطربين انا ليه كفريق مستقل معنديش حاجة زي كده وما بيتعملناش ليالي التلفزيون من اصله.

و العائد المادي كانت مشكلة طبعاً ؟

اه كل ده بالاكتفاء الذاتي يعني احنا بنصرف من جيوبنا، و في ناس سابت شغلها عشان تتفرغ للفريق أو كان بيلعب في كذا فريق وسابهم عشان يركز، يعني بدفع من معايا ومباخدش أي عائد، ومفيش  sponsor ومفيش أماكن كمان.

وموقف نقابة الموسيقيين منكم ؟

النقابة معاها سلطة ضبط قضائي لو مش معانا الكارنيه، وطبعا فيه ناس كتير مش معاها الكارنيه ومتسجلة في نقابات تانية وبتشتغل في المزيكا، زيي كده أنا اصلًا تبع نقابة التجاريين فبالنسبالهم أنا مجرد هاوي، مبكسبش من المزيكا ومينفعش اسجل مع نقابة الموسيقين، وأنا مش عايز ابقى عايش مهدد في أي لايف على أي مسرح، الاقي حد بيكسر عدتي، احنا مش باعة جائلين، احنا المفروض يعتبرونا مع تنمية المجتمع.

عالجتوا المشاكل الداخلية ازاى في الفريق ؟

واحنا راجعين من إيطاليا أنا قلتلهم أنا هسيب الفريق وكملوا انتم، واحنا اصحاب وحبايب في الأخر، وهما قالولي اجيب بديل جيتارست وجبت فعلا باهي فريد وكنت واثق انه هيلعب بنفس الشكل، عشان أنا كان ليا شرط انه أيا إن كان مين هيلعب مكاني لازم يعمل زي مانا عملت بالظبط عشان ودان المستمع اللي حبت الباند ده.

المخاوف بتأثر علي الفرق المستقلة ؟

انت كفنان محتاج مود معين وترتب أفكارك وتشوف هتوصل للناس ازاي، يعني محتاج المجهود والوقت عشان تكرس حياتك للمزيكا بغض النظر فيه ربح مادي ولا لا، أنا كنت عايز الانتشار.

فلما المخاوف تحل محل الطموح لازم تنهار بسبب الاحباط، الناس بتدور على الفلوس في مكان تاني وتسيب المزيكا.

يعني انت بطلت مزيكا كده ؟

أنا وقفت مزيكا لأسباب مادية، بس مبطلتش، عشان الشركة اللي كنت بشتغل فيها قفلت في مصر وده اثر عليا في الفلوس اللي كانت بتجيلي كل شهر، واسعار العدة والالآت غليت وأنا اللي كنت بصرف على مزيكتي، كل فريق اللي بيميزه صوته وأنا عشان العب في مقام لازم حاجات معينة تتجاب ودي مكلفة جدًا يعني آلاف الدولارات وطبعا الجمارك والضريبة فمقدرتش اكمل.

يعني عدتك كانت عاملة كام ؟

120 الف لـ 130 جنيه كعضو فقط في فريق، يعني 2015 كان بقالي سنتين قاعد من الشغل وكنت مضطر ابيع العدة بتاعتي، أو أعيش بجيتاراتي في البيت و مش لاقي دخل أو ابيع العدة بتعتي و يكون في دخل وخصوصا بعد ما الباند توقف كل ده اتلغى خالص ومبقاش فيه خطة للسفر بره مصر في مهرجانات زي الأول.

طب لو في فرقة و عايزة تعمل البوم روك عربي ده يكلفهم كام ؟

عشان تسجل 8 تراكات في ستوديو في القاهرة من غير ماسترينج من غير ميكسينج مجرد تسجيل بس وفريق مكون من 5 او 6 افراد هيبقى لا يقل عن 15 الف جنية لـ 20 الف وده لو هيسجلوا كلهم سوا، لو كل واحد هيسجل لوحده هيتكلف أكتر طبعًا.

يعني لو شباب في ثانوية عامة عشان يسجلوا ؟

يعملوا تراك واحد ويسجلوا في البيت على الكمبيوتر ولما يكونوا جاهزين يروحوا الاستديو ويقولوا بنعمل ديمو مش ألبوم كامل ويجربوا يعني.

ده غير اسعار الجيتارات ؟

الجيتار اللي كان بالف دلوقتي بقى 7000 فلو طالب عنده 16 سنة عايز يجيب جيتار هيكون صعب و ده صيني او اندونيسي يعني.

شايف مشهد الفرق المستقلة ازاى في مصر؟

فيه انتشار حلو جدا و الجمهور حابب فكرة الفرق المستقلة أكتر من المطرب المنفرد، والفرق دي بتتعب عشان تبان ومشاكل العائد المادي وكل الحاجات دي انا عارفها، المستوى الفني أنا شايف إن أعمار 16 سنة لما يشوفوا فرق زي مسار إجباري وعايزين يبقوا زيهم، ودي حاجة كويسة.

المزيكا بترقى الشعوب واحنا في مصر لسه معندناش أماكن حفلات مش هفضل طول عمري ألعب في ساقية الصاوي ولا المكتبة.