ليه ممكن موهبة قوية جدًا ماتاخدش حقها الكافي من الشهرة والنجومية؟ مش عارف. بيقولوا إن عمرو دياب ومن قبله عبد الحليم حافظ، استمروا فترة طويلة على هرم الغنا في الوطن العربي، بسبب الذكاء وحسن الاختيار اللي بيخليهم يتطوروا ويتناسبوا مع كل فترة، قبل ما يكون بسبب موهبتهم. مش كفاية تبقى موهوب، بس هتحتاج تكون بتعرف تدير موهبتك، أو تروح لحد يعملك ده. في النهاية أيًا كان السبب، فاحنا عندنا مطربين وفنانين كتير ممكن ينطبق عليهم لفظ Under rated، في ناس منهم ماحدش يعرفهم أصلًا

1- وجيه عزيز:

ملك ملوك الأندر ريتيد، وواحد من أحلى الأصوات اللي ممكن تسمعها. موسيقي هايل جدًا وله لون شرقي مختلف. موهبته ماتقولش أبدًا إنه يكون بس مشهور في أوساط معينة ومجموعات ودواير صغيرة وسميعة الساوند كلاود. وجيه له أعمال مهمة كملحن لناس كتير، لكن كمان له 4 ألبومات آخرهم كان في 2007. وجيه موجود وبيشتغل من سنة 88، وكان له باند اسمه "أوتار مصرية" قبل ما يبطلوا في بداية الألفينات. كل الكلام ده مش مهم قصاد إنك تدور عليه وتسمعله، بنرشحلك "لو تروح" و "مالناش غير بعض".

2- أحمد الحجار

النسخة غير المعروفة من علي الحجار. أحمد هو أخو علي وتقريبا توأمه. راجل ملحن وله تجارب غنائية وموسيقية هايلة، بس ماتفهمش هل هو ارتضى يكون في الظل لصالح نجومية أخوه اللي أحمد بيعمله ألحان كتير، ولا هو أصلًا دماغه مش في المزيكا ولا هو إيه بالظبط؟ الأكيد إن حتى الأعمال القليلة اللي أحمد غناها بصوته كانت تستحق شهرة أكتر من كدة بكتير. اسمعله "عود" واسمع نسخته من أغنية أخوه "لما الشتا يدق البيبان".

3- يحيى غنّام

أول مرة أسمع اسم الراجل ده، كان في برنامج "الحلم" اللي بيحكي قصة حياة عمرو دياب، عمرو اتكلم عن يحيى في جملة مختصرة كواحد من أفراد الفرقة اللي بتلعب وراه. تاني مرة سمعت الاسم، لما اكتشف إنه بيغني وصوته حلو ومزيكته بتعلق في الودان. يكفي أقولك إنه عمل أحلى أغنية سمعتها عن السفر. يحيى غنام اللي ماحدش يعرفه، برشحلك ليه أغنية "الغربة" و "ناديني".

4- عماد عبد الحليم

يمكن يكون أشهر واحد في الليست، بس التوقعات والكلام اللي اتقال عنه، كان عكس النهاية المأساوية. واحد تبناه عبد الحليم وهو طفل وآمن بموهبته لدرجة إنه يديله اسمه. موهوب وصوته حلو واسمه بدأ يتعرف شوية بشوية، أكيد ماحدش يتوقع إن النهاية تكون إدمان ووفاة بجرعة زايدة. الله يرحمه عماد عبد الحليم، غنى أغنية "اتقدم" بتاعت النمر الأسود، بس برشحلك تسمعله "المدن" و "كأنك حد تاني". أغانيه طويلة شوية بمقاييس العصر الحالي بس حلويين ومأخدوش حقهم.

5- عمر فتحي

عجب لغزال قتال عجب. الأغنية اللي في منها نسخ كتير، هتسمع أحلى نسخة منها بصوت واحد اسمه عمر فتحي. عمر موقفه كان مختلف شوية، راجل مشهور جدا وواخد خطوات ثابتة، لدرجة إن المطرب اللي عاوز يرفع أجره لازم يستأذن من نجم الجيل عمر فتحي. المرض والموت كانوا سبب إنه يختفي وهو في بداية التلاتينات، يمكن كنت تسمع عنه أكتر لو استمر لفترة أطول، رغم إنه فعلًا عمل 11 ألبوم. غير عجب لغزال، ممكن تسمعله "على إيدك" و "بحبك لا".

6- مصطفى رزق

واحد بيعمل جاز على بلوز وبيخلطهم بالمزيكا الشرقي وبيصمم ديمورات وبيلعب عود وطرابيزات بلياردو وبنج. مصطفى رزق على كل مواهبه مش هتلاقي ناس كتير تعرفه. مزيكته وموهبته تقول إنه أندر ريتيد بامتياز. برشحلك تسمعله "شفطة بن" و "حبة وجع"

7- مأمون المليجي

أترسم كل الوشوش.. تنقسم بينا المواجع. الفنان السكندري، الباشمهندس اللي مات من كام شهر قبل ما مزيكته تاخد حقها الكافي. فاكر مرة شوفت كليب مرة وأنا طفل على قناة دريم لواحد ماعرفوش، شكله كبير وبيغني كلام غريب، إيه ابقى واحد منهم حلمي هو حلمهم، بيقول إيه ده؟ وإيه المزيكا دي؟ ده كان مأمون المليجي الأندرريتيد. اسمعله "الشوارع" و "بحبك باستفاضة"، كمان له نسخة من أغنية "مولاي" بتوزيع مختلف. ابقى خد فكرة