خلال الفترة الأخيرة، التوكتوك انتشر في مصر لدرجة إنك ممكن تحسه ماسورة وضربت في الشوارع، بسبب إنه سهل يتنقل في الزحمة، وبيسلك في الشوارع اللي العربيات ما تقدرش تسلك فيها. حاليًا ما تقدرش تلاقي شارع جانبي في مصر مافيهوش توكتوك، وبسبب إن مافيش قانون ينظم عملية سير التكاتك في مصر، وإن مافيش رقابة عليها، بقى منظر عادي جدًا تلاقي عيال صغيرة ممكن في سن 7 سنين بيسوق التوكتوك ويسألك علي فين يا أستاذ، والأجرة هتزيد ومش عاجبك اركب تاكسي!

إسماعيل عبد الحميد، سوري عنده 34 سنة، جاب توكتوك معاه من الصين بيمشي بالطاقة الكهربائية والدينامو، مختلف في الشكل والحيز، وآمن لإن ليه أبواب مش مفتوح على البحري.

أقصى سرعة ليه هي 50 كيلومتر في الساعة وده اللي يخليه مناسب للمدن والقرى السياحية، وبيشتغل 10 ساعات عمل و8 ساعات يتشحن فيهم، وقال إنه ممكن يتعدل بحيث المحرك يبقى دينامو، فيفضل شغال 24 ساعة، إسماعيل كمان بيقول إن الشاحن سهل الاستخدام وخفيف، بالتالي سهل يتنقل معاك، وسعر التوكتوك 35 ألف جنيه مصري.

وقال برضه إن ممكن في المستقبل القريب يتعمله أبليكشن زي أوبر وكريم، يساعد الناس.

المصري اليوم عملت معاه الفيديو ده 

الصورة من جريدة اليوم السابع