أغاني كتير بنحبها بس لما بنسمعها في اللايف بتبقى حاجة تانية تمامًا، وحضورك حفلة لمغني بتحبه وهو واقف قصادك بيحاول يوصلك إحساسه وكل مشاعره بيبقى مختلف عن إنك تسمع تسجيل الأغنية الأصلية. جمعنا جزء من أحلى الأغاني اللي كانت في اللايف أحلى:  

1- يومًا ما – جوليا بطرس
لما بتسمع اسم "جوليا" أول حاجة بتخطر في بالك أغنية "يومًا ما"، ويا سلام لو قُلت أدائها للأغنية دي في حفلة الواجهة البحرية 2016 مش الأغنية الأصلية، وده مش تقليل من الأغنية، قد ما هو تقدير للأداء العظيم اللي قدمته في الحفلة دي.

تقدر تسمعلها كمان "بتنفس حرية" من نفس الحفلة.

2- أكتبلك تعهد – أنغام
"أنغام" عملت مفاجأة للجمهور في مهرجان الموسيقى العربية 2016 بأداء عظيم لـ "أكتبلك تعهد"، بدأت بسلاسة خالص لحد ما دخلت في إعادة الكوبليه الأول من الأغنية والكوبليه التاني بالتحديد، رفعت سقف التوقعات عند الجمهور، وأبهرتهم. بعد ما خلصت الأغنية اتطلب منها تغنيها تاني، ومع إصرار الجمهور غنت الكوبليه التاني مرة تانية وبمزيكا هادية جدًا، أنت ممكن جدًا تحضر حفلة مخصوص لأنغام عشان تسمع "أكتبلك تعهد" بس.

ممكن كمان تسمع "بقيت وحدك" من نفس الحفلة، كان معاها نادر حمدي على البيانو، والأداء ده برضه أحسن بكتير من الأغنية الأصلية. تقريبًا أنغام كانت عايشة حالة حلوة يومها.
 
3- أنا وأنت - عمرو دياب
"بس أنت تغني واحنا معاك" ده اللي حصل في حفلة مارينا 2016، الجمهور كله شارك عمرو الغُنا، وده أحلى أداء لـ "أنا وأنت". أغاني كتير لعمرو بتبقى أحلى في اللايف.

"يهمك في إيه" من حفلة دبي 2010

4- بقيت حاوي – مسار إجباري
حلوين في التسجيل، وحلوين في اللايف.. بس "بقيت حاوي" وأنت بتسمعها في حفلة، بتدخلك مود تاني تمامًا وبتبقى قاعد بتسمع وأنت متسلطن، الحفلة دي كانت من 6 سنين ولسه هاني الدقاق بيغنيها في كل حفلة بإحساس مختلف.

5- كده؟ - شيرين
حفلة هلا فبراير 2018 بالنسبالي هو أحسن أداء للأغنية دي، مود تاني بتدخلك فيه شيرين واحساس مايتوصفش.

مش بس في الحفلة دي، من سنتين لما انتشر فيديو لشيرين وهي بتغيها في برنامج "صاحبة السعادة"، انتشار الفيديو ده كان دليل على نجاحها في تأدية الأغنية.

6- أنا حنيت – ماجد المهندس
من بين كل الحفلات اللي غنّاها فيه، بس لما كان ضيف في حلقة من حلقات أراب أيدل، كانت أكتر مرّة غناها بإحساس. تقريًبا ماجد ماكنش عايز يبهر الجمهور بس، لأ ولجنة التحكيم كمان كإنه متسابق في البرنامج. بالأداء ده كان هو الـ Idol  يومها.


7- استعجلت الرحيل – كاظم الساهر
احساسه في الأداء ده بالتحديد كان أحلى بكتير، والوقفات والعُرب اللي عملها بصوته ماكانتش موجودة في الأغنية الأصلية.

تقدر تسمع كمان "مو ضحكتك" من حفلة مارينا 2000.

8- النور مكانه في القلوب - مدحت صالح
تخيل مدحت صالح بيغنّي قصادك بشجن: "يا تكون قد الحياة يا تعيش وحيد وسط الدروب"، الأغنية دي مابيقدمهاش بنفس الأداء في كل حفلاته، لكن اللايف اللي كان معاه فيه أوركسترا سفنكس، هي أحسن مرَّة اتغنت فيها الأغنية دي.

9- واحدة بتشبهك – جدل
"جدل" في اللايف غير تمامًا، كل اللي بتسمعوه على الساوند كلاود حاجة، وفي اللايف حاجة تانية، "وحدة بتشبهك" في حفلة عمان 2017 مختلفة عن الأغنية الأصلية، وتفاعل الجمهور معاهم عظيم.


10- مابقاش أنا – أصالة
من بين كل الحفلات اللي غنت فيها "أصالة" الأغنية دي، بس فيه فيديو قديم للأغنية دي على اليوتيوب من حفلتها اللي اتذاعت على المصرية الفضائية، قارن الأداء ده بأي أداء تاني لنفس الأغنية وشوف أنهي أداء هيكسب.

ممكن تسمع "اسكت بقى"، عظمة على عظمة. 

انتوا كمان شاركونا وقولولنا إيه أكتر أغاني حبيتوها وحسيتوها في اللايف أكتر.