لو معاك قرش محيرك هتعمل بيه إيه؟ اليومين دول مابقاش في حد معاه قرش محيره، بس لو معاك، لازم تعرف تستثمرهم ازاي علشان مايطيروش، إيه رأيك في العقارات؟ في 2017 السوق ده كان نايم شوية، ارتفاع أسعار الأراضي وأسعار مواد وأدوات البنا، كل ده خلى المستثمرين يتراجعوا عن الشرا في المدن الجديدة وفضلوا يراقبوا السوق، في انتظار اللحظة اللي الدنيا تستقر فيها علشان الكل يخش بتقله، تمام؟ اللحظة دي هي 2018، كبارات الاستثمار العقاري جايينلك ببشرى كويسة، بيقولوا إن المجال السنة دي هتحصله طفرة، وأديك شايف المدن الجديدة اللي قايمة تتبني بسرعة الصاروخ في كل حته. عجبك موضوع العقارات ده؟ اتشجعت شوية؟ طب لو هتشتري، لازم تكون عارف أكتر عن المكان والشركة اللي هتتعامل معاها، كمل وهتعرف..

سنة 1994، اتأسست OUD أو الشرقيون للتنمية العمرانية على إيد شركة "النساجون الشرقيون"، اللي ليهم سجادة في كل بيت مصري تقريبًا. 24 سنة مش كتير، بس بالنسبة لOUD كانوا كافيين علشان تتحول لواحدة من أكبر الشركات في مجالها، وتوصل لاستثمارات تعدي ال3 مليار دولار، عملوا بتاع 6000 وحدة سكنية وأكتر من 200 أوضة فندق في أماكن مختلفة في مصر، كمان كانوا من أوائل الناس اللي تروح تعمّر في الشروق، العاشر، القطامية والتجمع الخامس. الشركة عارفة إن التنوع وسيلة مهمة للنجاح في السوق المصري، فتلاقيهم مرة بيعملوا مدن سكنية، مرة منتجعات، وطبعًا مشروعات لأصحاب الدخل المتوسط، وبتتركز مشروعاتهم في قطاعات السياحة والعمران والزراعة. أكيد سمعت عن مشروعات عملوها زي (Heliopolis Hills اللي هو أول مجتمع خاص متكامل في مدينة العبور - Baron Royal Tower  - Fountain park). كمان لو طالع بحر أحمر قريب هتلاقي هناك مشاريع تبعهم، زي (- Parottel Hotel  - Las Cabana Matangi).

OUD عملت حاجات كتير، وسواء الحاجات دي كانت مدن أو شقق أو مكاتب تجارية، فهم عندهم رؤية ثابتة، بتخليهم يدوروا على تصميمات عصرية ومبتكرة بأحسن جودة ممكنة، بيتعاونوا فيها مع التوب في كل مجال، كل ده مايخلاش من تاتش شرقي المصريين بيحبوه، زي المشربية! المشربيات بدأت تظهر في العصر العباسي، حاجة كدة القرن ال13، فضلت مكملة في المعمار العربي لحد القرن العشرين، يعني مش من زمان أوي، ارتبطت في دماغ الناس بالبيوت الفخمة والقصور، وهتبقى أكيد حاجة لو لاقيت تصميم في 2018 بيخلط المشربيات والطابع الشرقي بالمعمار المودرن. يعني بيوت ع البحر تلاقي، مودرن تلاقي، مشربيات تلاقي، ناقصك حاجة؟

كل ده حلو، بس إيه الجديد؟ وناويين على إيه في 2018؟ أنت بتتكلم عن شركة راح تعمر الصحرا قبل أي حد تاني، فلما يكون في توجه من الدولة لبناء مدن جديدة في كل حتة، يبقى أكيد OUD هتدخل بتقلها. محمد محمد فريد خميس، المدير الإداري للشركة بيوضح: "حاليًا بنطور منطقة صناعية مساحتها أكبر من 10 مليون متر مربع في العين السخنة، غير الأراضي الجديدة في مناطق زي العاصمة الإدارية والمستقبل والعبور والقاهرة الجديدة". الشرقيون مكملين في مشاريعهم الحالية، ومحافظين على مواعيد التسليم المتفق عليها مع العملا، بالتوازي مع التوسع في مناطق جديدة وشراكات أكبر هيطلع منها مشروعات أكتر. عرفت بقى لو معاك قرش محيرك هتعمل بيه إيه؟ جمد قلبك، المكان اللي أنت شايفه بعيد ومتطرف النهاردة، بكرة مش هيفرق كتير عن المعادي أو مصر الجديدة ولا حتى 6 أكتوبر، القاهرة اتزحمت يا اخوانا ولازم نفتح الشقتين على بعض.