• اكتب معانا
  • ماتنسناش
  • تابعنا
الموضوع اللي جاي
موقع The independent: القاهرة هي المكان الجديد لمحبي الأكل
الموضوع اللي فات
فيديو: وزير مسلم في أمريكا يحلف اليمين الدستورية على المصحف لأول مرة

8 نجوم رفعوا شعار "العلوقية مسؤولية"

كفاية بقى هتضيع نفسك

في بداية 2018، اجتمع تيم "الفصلة" علشان يشوفوا هيعملوا إيه في السنة الجديدة، وإيه التطوير اللي لازم يوصلوله. بإجماع الفريق، لاقينا إن أكبر عدو لأي ناس عاوزه تبدع وتفكر هي "العلوقية"، الشبح اللي بسببه ياما راح ناس زيك وأحسن منك! ففي واحد وهو قاعد على كرسيه ومش راضي يتحرك من مكانه، اقترح إننا نعمل ليست عن النجوم والموهوبين اللي أصابهم داء الكسل والخمول والتكرار وماتعلموش من الشطار، فمسيرتهم اتأخرت كتير وخسروا جزء من حماس الناس ليهم، وإياك تكون زيهم وتروح وتجرحنا، وقوم كده واستهدى بالله وشوف شغلك وكفايانا تفخيد، الحياة صعبة والعلوقية مش مسؤولية.

1- إبراهيم سعيد

كل اللي اتفرجوا على الأهلي في نهاية التسعينات وبدايات الألفية، يعرفوا لاعب كورة اسمه إبراهيم سعيد، تقدر وأنت مغمض توصفه بأحسن لاعب في مصر؛ بيلعب في كل المراكز، لعب ليبرو، مساك، نص ملعب دفاعي، نص ملعب مهاجم، حتى مركز راس الحربة لعب فيه. سرعة ومهارة وقوة، دقة في الاستلام والتسليم، حاجة كدة بسم الله ما شاء الله، بس تقول إيه في البني آدم بقى؟ مشاكل مع كل فريق يروحه، سهرات وشرب وخناقات وقضى على نفسه خالص، لغاية ما بقى لون شعره أشهر من لعبه، رغم إنه لغاية دلوقتي لو لبس شورت ونزل بكرشه يلعب، هيكون أحسن من لاعيبة كتير.

2- غادة رجب

دي تصلح إنك تعمل عنها فيديو من 45 ثانية لمثلًا، تحط فيها لقطات فيديو سريعة لبنت رقيقة صوتها جميل، بتطلع تغني في حفلات الأوبرا، وتفضل الصور والفيديوهات تجري بسرعة بسرعة، لحد ما الكاميرا تدخل زووم على واحدة بترقص جنب مصطفى كامل على ألحان أغنية ملحمية اسمها "تسلم الأيادي". اللي عملت طالعة مشابهة بغادة رجب، كانت أمال ماهر، بس أمال طورت نفسه بسرعة وغيرت جلدها كذا مرة وقدمت لون مختلف، جايز تحبه وجايز تكرهه، بس هي موجودة، لكن فين غادة رجب دلوقتي؟ فين البنت اللي طلعت تغني مع كاظم على المسرح "فرشت رمل البحر" وكانت هتخليني أعيط من صوتها وإحساسها؟


3- محمد سعد

2017 كانت سنة سعيدة لسعد، اللي قرر أخيرًا يلحق أي حاجة فاضلة من مسيرته وعمل دور كل النقاد كانوا بيتحزموا ويرقصوا من حلاوته في فيلم "الكنز". فليه بقى يا نجم نضيع 12 ولا 13 سنة من عمرنا في أفلام أي كلام وأدوار مكررة لحد ما بقيت أقل ابناء جيلك والجمهور كان قرب ينساك؟ سعد بالمناسبة كان مشهور جدًا على مستوى الجامعات كمخرج وممثل، وقت ما كان بيدرس في المعهد، فاحنا بنتكلم عن ممثل شاطر جدًا وموهوب بس ساب نفسه علشان المية ترفعه، نتمنى يكون اكتشف إنه لازم يتعلم العوم.

4- خالد يوسف

لسبب ما، يعتبر خالد يوسف هو الوريث الشرعي لسينما يوسف شاهين –هاهاهاهاهاهاهاها- شاهين نفسه قال إن مافيش حد يعرف يعمل "هاملت" غير خالد يوسف –هاهاهاهاهاها- لكن المخرج اللي كان بيعمل أفلام تصنف إنها مهمة، وكان بيقلب الدنيا بكل فيلم ليه، قرر بعد الثورة يتفرغ للسياسة، مش مجرد مشاركة، لا تفرغ كامل، وبقى عضو برلمان، وبقيت تسمعه يتكلم عن الانتخابات والقوانين والحكومة، لسه أخيرًا قرر يفكه من الكلام ده وحس إنه مافيش منه فايدة وبدأ يصور فيلم جديد. حمدلله على السلامة يا أستاذ خالد. بالمناسبة، حاجة عظيم إن الفنان يبقى معني بقضايا بلده وله رأي ودور، بس أنت في النهاية فنان مش سياسي، وخد بالك لأحسن تروح تدور على عنب اليمن فتفوت بلح الشام وبعدين تلاقي العنب بقى زبيب.

5- صالح جمعة

تاني لاعيب كورة في القايمة، لسه صغير والمستقبل قدامه كبير، بس هو تقريبًا واخد الكورة هواية، أو فاكر نفسه حاجز ساعتين في ملعب في مدينة نصر، مش عاوز يقتنع إنه لاعب كورة محترف. لسه امبارح النادي الأهلي قرر إنه يطلعه بره القايمة الأفريقية، وده بديهي للاعب بيضرب الأرقام القياسية في الغياب عن التدريبات وقلة اللياقة البدنية والوزن الزايد وكل الحاجات اللي ماتعملش زيها لو عاوز تبقى لاعب كورة. صالح غالبًا هيكون إبراهيم سعيد بتاع الجيل ده، رغم إن مركزه كصانع لعب يعتبر فاضي، وكوبر بيتنشق على أي واحد بربع موهبته، بس الإنسان بيحب ياكل الخرا بمعلقة.

6- عمرو زكي

بجملة لاعيبة الكورة بقى. لما يا حبيبي تحترف في الدوري الإنجليزي وتوصل إنك تبقى هدافه، يبقى تلتزم مع فريقك، تدرب كويس وترجع من معسكرات المنتخب بتاعك بدري وتهدا وتقول هديت، علشان في الآخر ماتلاقيش نفسك بتختم حياتك وأنت عندك 30 سنة وبتلعب في فرقة في الكويت. بالمرة كمان، ماتبقاش تصدق الصحافة المصرية لما تقولك إن ريال مدريد هيفرتك الترينك علشانك، وبلاش العشم ياخدك. ربنا يكرمك يا صلاح ويبعد عنك كل حاجة وحشة يابني.

7- خالد عجاج

من فترة ظهر تاني النجم التسعيناتي في إعلان لشبكة موبايل، لسه جميل كدة وصوته حلو وحنين، وطلع بأغنية لسه معلقة مع الناس، فكرني بكليب أصعب حب، كنت بفضل أعيط وأنا بتفرج عليه. المهم إن خالد عجاج اختفى فجأة. آخر ظهور غنائي ليه كان في 2011 تقريبًا، ولو دورت على أي أخبار عنه، مش هتلاقي غير أخبار شخصية زي إنه بيجوز بنته وكدة. ألف مبروك يا أستاذ خالد وياريت لو أي حد يعرفك شاف الموضوع ده، يوصلك إننا بنحبك وعاوزين نعمل انترفيو معاك وبنقولك اطلع بقى من المكان اللي أنت فيه وارجع غني تاني يا أخي.

8- مصطفى شعبان

ما هو مافيش سبب يخليك تقعد كام سنة تقدم نفس الشخصية بنفس الشكل وطريقة الكلام والإفيهات والدم التقيل، غير لو أنت مكسل وواخدها مسؤولية. مصطفى شعبان كبداية في عائلة الحاج متولي ومن بعدها "مافيا" و"النعامة والطاووس"، وحتى الدور العبيط اللي لعبه في فيلم "خلي الدماغ صاحي"، كل ده جميل، حاجات تنجح وحاجات تفشل، بس كان بيجرب ويغير ويلعب، بس فجأة قرر يتقمص دور نور الشريف في فيلم العار، وكمل بالدور ده 4 ولا 5 سنين كمان، نور الشريف نفسه بكل رصيد النجومية اللي بيملكه، مايقدرش يعمل كدة، فليه يا حبيبي؟ غلط عليك كدة وعلينا والله، قوم كدة وغير الكون واستعيدني واستعيدك.

Home
خروجات النهاردة
Home
Home