مين بيعمل مين أو مين بيضيف لمين؟ الممثل بيضيف لمخرج الفيلم ولا العكس؟ نجاح أو فشل الفيلم محسوب لمين فيهم؟ رغم إن ده عمل جماعي ومفروض إن كلنا إيد واحدة يا بهجت وكلنا بنكمل بعض، بس الإشكالية دي دايمًا موجودة في معظم المجالات.

في 2008 قرر برشلونة إنه يسند مهمة تدريب الفريق لمدرب شاب اسمه بيب جوارديولا، وبعد 4 سنين من التاريخ ده، مشي جوارديولا من تدريب برشلونة، وهو مصنف كواحد من أفضل مدربي اللعبة في تاريخها. رغم كل إنجازات جوارديولا، فضلت إشكالية: ميسي هو اللي عمل جوارديولا ولا جوارديولا اللي ضاف لميسي؟ الإجابة ببساطة، سواء في الكورة أو الفن أو في أي عمل جماعي، هي الاتنين أثروا في بعض والاتنين اتأثروا ببعض وكل واحد فيهم ضاف للمنتج النهائي عشان يطلع بشكله الحالي.

طب لو كان في لاعب كورة مغضوب عليه، والجماهير مش مؤمنة بإمكانياته ولا قدرته على حجز مكان في تشكيلة الفريق، لغاية ما جه مدرب واداله بُعد جديد في الملعب خلى اللاعب يظهر بشكل مختلف عن المعروف عنه، كده يكون المدرب هو اللي عمل اللاعب واللاعب من غيره هيرجع تاني لمستواه الأقل من عادي؟

طبق نفس الإشكالية أو التساؤل ده على العمل الفني، لو ممثل قدراته محدودة أو غير ظاهرة، وجه مخرج حوله بقدرة قادر لأحسن ممثل في مصر، طبعًا بفضل عوامل تانية زي الورق الكويس واللبس والديكورات.. إلخ، بس ساعتها المجد يكون للمثل اللي خرّج من نفسه قدرات جديدة؟ ولا للمخرج اللي شاف في الممثل حاجة هو نفسه ماكانش عارفها؟

وأنت بتسأل نفسك، افتكر كام مرة كانت شايف إن فلان ده ممثل تعبان أو على قده، لحد ما في دور معين ليه خلاك تغير وجهة نظرك. دول 7 حالات منهم.

1- شعبان عبد الرحيم:

حرامي متدين، جدع وحنين والناس بتحبه، بيرفض كل أشكال الانفتاح أو التقاليد اللي بتكسر أعراف المجتمع الشرقي، حتى لو كان الانفتاح ده مجرد كلام جوه رواية. شخصية معقدة جدًا ومركبة وتفاصيلها كتير، مين ممكن يلعبها؟ داود عبد السيد قرر إن أنسب واحد للدور ده هو شعبان عبد الرحيم، وتخرج شخصية "شريف المرجوشي"  في فيلم "مواطن ومخبر وحرامي" كعلامة من علامات سينما داود عبد السيد.

عشان تعرف حجم الجهد اللي عمله داود مع شعبان، ممكن تاخد فكرة عن تمثيل شعبان عبد الرحيم من أي فيلم أو مسرحية من اللي كان بيطلع فيهم لابس ملون ومش حافظ الحوار فالناس تضحك على شكله وعلى لبسه، وهو المطلوب بالنسبة لصناع العمل، اللي مش عاوزين من المطرب الشعبي حاجة أكتر من كده.

2- محمد سعد

نجم الشباك ورقم واحد في نجوم الكوميديا، ده كان حال محمد سعد لكذا سنة، قبل ما شخصياته تخزله ويمل منها الجمهور، ويقدم مجموعة أفلام ماحدش هيفتكر اسمها، لكن الهدف منها هو إن اسمه يفضل موجود على أفيش. احنا أمام حالة ممثل موهوب بس عليه تراب والشغل معاه مجازفة. بس مع ورق كويس ومخرج يمسكه من إيديه ويحطه في مناطق درامية معينة، ممكن تشوف شكل مختلف خالص.

ده اللي عمله شريف عرفة في فيلم "الكنز"، لما أسند لسعد شخصية "بشر الكتاتني"، رئيس القلم السياسي في عهد الملك فاروق. شخصية مختلفة تمامًا عن أي حاجة عملها سعد. صاحب السلطة القاسي الشديد اللي بيكون ضعيف قدام مطربة درجة تانية حبها ومن حبه ليها مقدرش يعتدي عليها. سواء عجبك الفيلم أو كان لك تعليقات عليه، فأكيد إن شريف عرفة نفخ التراب من فوق محمد سعد وفتحله باب جديد يدخل منه للجمهور.

3- محمد رمضان

كل ما حد يقول حاجة وحشة عن محمد رمضان أو عن تمثيله، بيطلع قطاع من الجمهور يقول عنه إنه ممثل كويس والله ومجتهد. جزء من قناعة الناس إن رمضان ممثل كويس، جاية من الدور اللي لعبه في "احكي يا شهر زاد" للمخرج يسري نصر الله. رمضان بجسمانه الضئيل وقتها وبملامحه المصرية الصرف، كان لسه في بداية حياته الفنية، بس لعب دور لشخص بيضحك على 3 أخوات بنات وبيعشمهم بالجواز بعد ما ينام معاهم.

شخصية حقيرة جدًا، ومش لايق على ملامح رمضان الوديعة اللي تحسسك بالتعاطف معاه من قبل ما ينطق، بس أقنع كل اللي بيتفرجوا بالدور وكرههم فيه. بعد كده بكام سنة بقى رمضان نجم شباك وقدم أفلام ومسلسلات مكسرة الدنيا، بس في رأيي مافيش دور كان فيه جرعة التمثيل بتاعت "احكي يا شهر زاد"، ومافيش مخرج طلع من رمضان اللي طلعه يسري نصر الله.

4- منة فضالي

هي بقالها بتاع 15 سنة لسه فنانة شابة ومش فاكرلها أي دور مهم أو حتى مش مهم، اللهم إلا دورها في مسلسل "الملك فاروق" مع المخرج السوري حاتم علي، اللي اكتشف في منة فضالي حاجة ماحدش قبله اكتشفها، وبالنظر لأدوارها اللي بعد كده، فماحدش اكتشفها لسه غير حاتم علي.

في المسلسل بتلعب منة فضالي دور الملكة فريدة، الست القوية أحيانًا والمغلوبة على أمرها أحيانًا، بتحب فاروق جدًا وفي نفس الوقت بتحب نفسها وبتغير على ملكها وكرامتها وبتغير على جوزها من مغامراته وأصحابه اللي مش لايقين على ملك مصر والسودان.

5- عبير صبري

تقريبًا السبب الوحيد في شهرة عبير صبري هو إنها أعلنت اعتزالها واتحجبت. عملت إيه قبل ما تتحجب؟ طب عملت إيه بعد ما اتحجبت وبعد ما خلعت الحجاب تاني؟ اللي فاكرلها دور حلو يقول، اه في "عصافير النيل" للمخرج "مجدي أحمد علي". لعبت عبير صبري شخصية "بسيمة" اللي حبت فتحي عبد الوهاب، لكن ماجتمعوش سوا غير وهما في المستشفى كمرضى سرطان. مشهد إعادة تجمع فتحي عبد الوهاب بعبير صبري في المستشفى واكتشافه إنها مصابة بنفس مرضه، هيأثر فيك حتى لو ماشفتش الفيلم، خصوصًا بسيمة اللي كان كل همها إن حبيبها مايشوفهاش وهي مريضة فصورتها تتغير في عنيه.

6- درة

هي دلوقتي نجمة وليها اسم وأعمال ناجحة.. إلخ، بس تحديدًا مع "كاملة أبو ذكري" في "سجن النساء" عملت جرعة تمثيل ماعملتهاش في أي دور تاني، وسواء في حالة درة أو في كل الحالات، ماتعرفش الفضل للمخرج والمؤلف ولا الممثل هو اللي اختياراته وحشة ولا في إيه بالظبط.

درة عملت دور بنت بتتسجن ظلم وبتتحول بسبب ضغوط المجتمع لواحدة بتمارس نفس الفعل اللي اتهمت بيه قبل كده. التحول في الشخصية من واحدة طيبة وساذجة لعاهرة، صعب أي حد يصدقه غير لو الممثل أتقن دوره اللي مكتوب كويس، ده اللي عملته درة. حتى انفعالاتها كان واقعية ومتصدقة أكتر في "سجن النساء" عن أي دور تاني ممكن تكون عملته.

7- خالد سليم

إيه رأيك فيه أفلام "كان يوم حبك" أو "سنة أولى نصب"؟ مش مهم تقول رأيك في دول، بس اتفرج على "موجة حارة" للمخرج "محمد ياسين"، واحكم مرة تانية على خالد سليم. خالد لعب دور ضابط في الآداب اللي شاكك في سلوك مراته وفي مصادر فلوسها بس بيفوت لإنه بيحبها، لغاية ما شكوكه بتتأكد وبيواجهها، فبتنتحر. لو شوفت موجة حارة، ماتشوفش حاجات تانية لخالد سليم، لأحسن تنتحر.