"احنا طماعين وعاوزين جمهورنا يبقى كل الناس": حوار مع شارموفرز

ألبومنا الجديد نازل في الصيف

Fasla Team باقي مواضيع Fasla Team

التاريخ
14/05/2018 08:11

أول أغنية اسمعها لشارموفرز كانت سنة 2012، بتحكي عن واحد قاعد بالبوكسر في البيت وزهقان من حياته، فبيقرر ياخد عربيته وينزل يشوف حاجة يعملها. آخر أغنية كانت من كام يوم، بس المرة دي رومانسية، عن واحد مفتقد حبيبته، رغم كل الخلافات اللي بينهم. 6 سنين بين الأغنتين، أكيد حصلت فيهم اختلافات كتير، جايز ذوق الناس اتغير، فرق ظهرت وفرق اختفت، الثابت إن شارموفرز فضلوا محافظين على شخصية خاصة بيهم، مختلفين عن كل الموجود، ورافعين توقعات جمهورهم منهم دايمًا، عشان كده تقديم أغنية رومانسية زي "مفتقد الحبيبة" مختلفة عن كل اللي عملوه قبل كده، كان ريسك نوعًا ما. قابلنا مستر شارموفر العظيم وسألناه عن كل الكلام ده، الأغنية والكليب ومزيكتهم وجمهورهم وإيه اللي جاي.

"لا احنا ماقررناش نعمل حاجة رومانسية عشان عاوزين نعمل حاجة رومانسية، هي الأغنية بتطلع بالحالة اللي احنا فيها ساعتها، وده اللي حصل في مفتقد الحبيبة"، بيقولنا محمد العرقان أو "مو"، لما سألناه عن السبب اللي خلى شارموفرز يغيروا في شكل الكلمات والألحان اللي جمهورهم متعود عليه، ويقدموا أغنية رومانسية. بس كون الأغنية رومانسية ده مش الاختلاف الوحيد اللي ممكن تلاحظه في "مفتقد الحبيبة"، الكليب اللي بطلته ياسمين رئيس وإخراج هادي الباجوري، والقصة اللي بيظهر فيها نجوم شارموفرز "مو" و "بهاء" كممثلين، هل دي خطوة أولى عشان نشوف شارموفرز بعد كده ممثلين؟ بيرد أحمد بهاء: " لو هيفيد شارموفرز ممكن بس أكيد مش دلوقتي، احنا لسه محتاجين نركزفي المزيكا أكتر لأن التمثيل بياخد من الواحد جامد، عمر ما مهنتي هتبقى ممثل، أنا مركز في المزيكا، بس لو التمثيل هيفيد من ناحية الانتشار فليه لأ؟ خصوصًا إن التمثيل بيوصل للناس أسرع شوية".

لو أنت ناجح في حاجة معينة أو شكل معين، هيكون قدامك خيارين: إنك تفضل ثابت في حتتك ومحافظ على نفسك وجمهورك في الsafe side، أو تجرب حاجة جديدة وتلعب في حتة مختلفة، بس استحمل الريسك، شارموفرز كانوا عاملين حساب المخاطرة دي، بيشرحلنا "مو": "كان موجود الخوف طبعًا بس كنا مطمنين شوية عشان احنا شعب بيحب الحزن والحاجات الكئيبة، فأغنية رومانسية وفيها حزن أكيد هتعجبهم، ده كان مطمنا سِنة يعني، ومع إننا كنا خايفين بس كان في تفاؤل". طب "شارموفرز" بيحبوا يتسألوا ولا هما اللي يسألوا؟ "آنست وشرمفت" هو اسم البرنامج اللي ظهر فيه "مو" و "بهاء" كمقدمين، وفكرته قايمة على إنهم بيستضيفوا كابلز ويحاوروهم، لما سألناهم ردوا علينا الاتنين في نفس واحد: "نسأل طبعًا أحسن كتير ما نتسأل، أنت بترمي السؤال وتلبس اللي قدامك وتسيبه بقى يعيش هو مع نفسه ويدور على إجابة".

بهاء هو اللي كتب لشارموفرز "مفتقد الحبيبة"، زي ما بيكتب كل حاجة للباند، بس لو بهاء فكر يحط كلماته على صوت حد تاني، هيختار مين؟ بعد تفكير جاوب: "محمد منير في الوطن العربي، ولو في الإنجلش ممكن أحب اكتب لناس زي Shaggy أو Sean Paul"، أما "مو" فلو هيعمل مزيكا لحد تاني غير شارموفرز، هيختار منير وشاب خالد وشاب مامي. بس السؤال ده لازمله كمالة، لو دول الناس اللي أنتوا عاوزين تشتغلوا معاهم، طب مين الناس المفضلة ليكم اللي بتسمعوهم؟ "مو" بيقول: " بالنسبالي أنا، بس مش بالترتيب يعني، "اوتستراد" من الأردن، وفيه باند من مصر اسمه "هاويدرو" بيلعبوا أفرو ميوزيك، وفيه "سكون" اللي أحمد صافي بيغني فيه"، "بهاء" تفضيلاته في المزيكا مش مختلفة كتير عن شريكه: "أنا بحب "هاويدرو" برضه، وفيه حد لسه مكتشفه، فنانة اسمها منال، رابر مغربية قوية جدًا".

لون شارموفرز المختلف بيحط قدامهم سؤال ثابت: إيه نوع المزيكا بتاعتكم ومين جمهوركم اللي بتستهدفوه وتدوروا عليه؟ خصوصًا إنهم بيقدموا أشكال كتير وكلها مختلفة، لكنهم بيجاوبوا على السؤال ده ببساطة: "مش حاسين إن فيه نوع معين يعني، لو حد بيسمع حاجة related بالنسباله أو انبسط أو عجبه beat، في أمهات بتسمع شارموفرز وفي أطفال، واحنا نفسنا كل الناس تسمعنا، طماعين شوية". "بهاء" بيضيف على كلام "مو": "بنحاول نراعي ده حتى في المزيكا إن احنا باند يعتبر commercial، فلما بنيجي نعمل مزيكا بنهتم طبعا بالمزيكا كمزيكا، بس فالنهاية بنبص برضه بصة overall عالالبوم من الناحية التجارية، اللي هو يبقى فيه أغاني مختلفة بتخاطب الأعمار كلها".

بهاء ومو بيحضروا دلوقتي لألبومهم الجاي اللي هينزل الصيف ده "انفصام"، "مفتقد الحبيبة" هي أول تراك منه، وعارفين إن ذوق الناس بيتطور وبيتغير وجاهزين لده دايمًا، " الذوق اتغير عن وقت ما بدأنا طبعًا، بس هو فيه نقطة تحول حصلت بقالها سنة مثلا، يعني أحجام الحفلات الكبيرة دي ماكنتش موجودة من سنة، السبب في كده حاجات كتير، يعني الجيل الجديد مثلًا، الشباب اللي كان قاعد في البيت بيسمع الأغاني أونلاين دلوقتي، بقى بينزل يشتري تذكرة ويحضر الحفلة، وكمان وجود رعاة وإعلانات" بيوضح بهاء. أول تراك من الألبوم عدى على خير باختلافه وكليبه وقصته، نستنى باقي الألبوم.