يا عيني ع الأم وحنان الأم! أمك حلوة، لا حلوة بجد، وتستاهل منك تتعب شوية علشان تطلعلها كام أغنية جديدة في يوم عيدها، غير الأغاني اللي هما حفظوها وبتنزل عليهم مقرر كل سنة يوم 21 مارس. أمك جاهزة؟ يلا..

1- عشرية – أحمد منيب

الأغنية دي صالحة لكل زمان ومكان، تشغلها لأمك، تشغلها لمراتك، تنفع أعياد ميلاد، تنفع في أفراح. دي أحسن أغنية رومانسية ممكن تسمعها، أغنية بيأديها راجل بالغ عاقل فاهم الدنيا كويس، لمراته أم عياله اللي شايفها ست الستات، كلها غزل ناضج من اللي المشاعر فيه مش هتتغير مهما فات عليها زمن.

2- موال الأم – رمضان البرنس

أنت الأول تعرف رمضان البرنس؟ أكيد سمعت صوته أو تعرف أغاني ليه، حتى لو ماتعرفش إن ده رمضان البرنس، لكن صوته المميز أكيد عدى عليك في ميكروباص أو فرح أو حتى قاعدة ناس بتحشش، الراجل ده لما يغني للأم هيطلع حاجة عاملة ازاي؟

3- عمرو دياب – أمي الحنون

عمرو دياب بقى، بس أغنية قديمة شويتين في بدايات الهضبة. الأغنية دي كمان ليها نسخة بصوت محمد منير، بس مش عارف مين غناها قبل التاني. اه صحيح، في مقطع كدة في الأغنية، عمرو ومنير بيقولوا فيها شعر، جريها بسرعة ماتتفرجش، ده لمصلحتك أنت والله.

4- أنتي في دمي – عمرو دياب

عمرو تاني، وبرضه أغنية مش مشهور بس مش قديمة، ده لأن عمرو غناها في الحفلات بس بعد وفاة والدته. كل اللي بيحضرو حفلات للهضبة عارفين إن في أغاني عمرو بيأديها في اللايف بس، دي واحدة منهم.

5- عماد عبد الحليم – أمي

عماد عبد الحليم كان اسمه عماد سليمان، واللي غير اسمه عبد الحليم حافظ بعد ما تبناه فنيًا. أول ما سمعت الأغنية دي افتكرت إن اللي بتغنيها واحدة ست، ده لإن عماد كان طفل وقتها وبيغنيها في حفلة، بس سمعها لأمك وهترجعلها الذكريات وتفرح بيك.

6- بساطة – أمي

"مستحملاني ومربياني ورمت وداني من كتر التقريص"، باند "بساطة" عملوا –كالعادة- أغنية لايت خفيفة تبتسم كده وأنت بتسمعها، بيتكلموا فيها عن الأم اللي تعرفها اللي بتديك فلوس باليمين وتحدفك بالشبشب بالشمال، وتطبطب عليك بعدين تقولك والله لأقول لأبوك، بس أغنية زيها زي أغاني كتير مأخدتش حقها، يمكن علشان معدين القنوات بيكسلوا يذيعوا أغاني تانية غير شادية وفايزة.

7- رشا رزق – أمي يا أماه

هاااححح.. طالما لسبيستون أنا موافق واشتريت. نجمة عالم الصغار الأولى وكوكب زمردة وألوان وأكشن وكل كواكب المجرة، بتغني للأمهات.

لم كل الحاجات دي في بلاي ليست حلوة ونزلها على فيسبوك واعمل مينشن لأمك، وخالاتك وعماتك هيدخلوا يحسدوها عليك في الكومنتات، وعيال خالاتك هيبقى موقفهم صعب قدام اختياراتك الفذة في الأغاني وتقديرك لأمك.