قائمة التراث العالمي لليونسكو هي قائمة فيها أماكن بترشحها اليونسكو للناس، وبتكون مصنفاها على أساس مواقع تاريخية في العالم. ورغم إننا طول الوقت بنقول إن مصر فيها ثلث آثار العالم، بس الحقيقة إن مافيهاش غير 7 أماكن بس موجودين في قائمة التراث العالمي لليونسكو، دي قائمة بيهم. زورهم وقولنا تجربتك

أبو مينا

موقع ديني مصري بيرجع تاريخه لقرون. بيخص قديس مصري من إسكندرية، استشهد في أواخر القرن الثالث، دلوقتي مش باقي غير أطلال من الكنيسة والدير ومن 2001 اليونسكو مصنفة المكان ده إنه معرض للخطر. 

 مدينة طيبة القديمة ومقبرتها

عاصمة مصر القديمة اللي فيها أكتر من 13 معبد ودلوقتي اسمها "الأقصر"، أيوة هي بتاعة أغنية أنتي بلاد طيبة اللي غناها محمد منير وأنوشكا.

القاهرة التاريخية

اللي اتعرفت باسم القاهرة الاسلامية، واللي بتدور في منطقة الحسين والقلعة واللي حواليها وفيها مساجد وبيوت من أقدم المساجد في العالم كله وبترجع للقرن الـ14.

هضبة الأهرامات في الجيزة

المكان ده مش بس فيه الـ3 أهرامات اللي كل الناس عارفينهم، لكن كمان فيه آثار فرعونية كتير ومصنفة المنطقة دي بالكامل إنها ضمن مواقع التراث العالمي.

 المعابد النوبية من أبو سمبل لفيلة

المعابد النوبية رغم إنها اتنقلت وقت السد العالي، إلا إنها مصنفة ضمن مواقع التراث العالمي، خصوصًا إن من ضمنها المعبد اللي بيتم فيه تعامد الشمس على وجه الملك رمسيس مرتين في السنة.

منطقة سانت كاترين

المنطقة دي مقدسة للأديان الإبراهيمية التلاتة، مسلمين ومسيحين ويهود ممكن يروحوا يزوروا المكان اللي استلم فيه النبي موسى الوصايا العشر واتكلم مع الله. الدير تم تصنيفه إنه ضمن مواقع التراث العالمي سنة 2002. 

وادي الحيتان - الفيوم

هو المنطقة المصرية الطبيعية الوحيدة في القائمة دي  مش تاريخية. المنطقة دي كان فيها حيتان ودلوقتي موجود بقاياهم.