11 فيلم وثائقي مش مملين
وانا صغيرة كنت بشوف على التليفزيون المصري أفلام تسجيلية مملة جدًا، فيها واحد بيتكلم وفي الخلفية مزيكا حزينة وشوية صور لأماكن وبيوت وراوي بيقرأ تاريخها، ورغم ملل الأفلام دي إلا إنها كانت بتديني كم معلومات مش هعرف اخده من أي مكان تاني، لما دخلت كلية إعلام كان عندنا مادة مخصوصة اسمها أفلام تسجيلية، وفيها عرفت إن النوع ده من الأفلام بيكتب التاريخ، وانك بعد فترة لما بترجعله بتكتشف حاجات مكنتش تعرفها، وانه مش شرط ابدًا يكون الموضوع ممل وتسمع صوت راوي، لكن ممكن تسمع اراء ناس مختلفة وتشوف مادة ارشيفية عمرك ما شفتها، الامتع كمان انك ممكن تعيش حاجة لحظة بلحظة لو الفيلم اتصور وقت وقوع الحدث ..
احلى الأفلام الوثائقية اللي شفتها، للاسف ماكنتش عربية، واغلبهم عرفتهم بعد ما فازوا او اترشحوا للأوسكار، بس لأننا بنتكلم عربي فدي 7 ترشيحات لأفلام وثائقية عربية مش مملة، وبعدهم هنكتب 7 ترشيحات تانيين لأفلام وثائقية مش عربية، ولو مبتحبش الوثائقي ابدأ بالاجنبي لأنه أمتع وادعيلنا ..
وانا في الكلية كانت الدكتورة اللي بتدينا مادة أفلام وثائقية بتشغلنا الفيلم ده، وبتفتخر ان يسري فودة خريج كلية إعلام، يسري قبل ما يبقى مقدم برامج توك شو، كان عنده برنامج تحقيقات عظيم اسمه سري للغاية بيعمل فيه تحقيقات وثائقية، هنرشحلك منه 4 حلقات
الطريق إلى عتليت: الحلقة دي بتتكلم عن الأسرى العرب في 56 و 67، مش هتتخيل المذابح اللي حصلت في حقهم غير لما تشوف الحلقة دي.
العبور إلى المجهول: الفيلم ده بيتكلم عن المقاومة العراقيةاللي اتحولت للجيش الإسلامي وجماعات متطرفة، يسري سافر العراق واتكلم مع الناس دي واتواصل معاهم عشان يعمل الحلقة دي.
الطريق إلى 11 سبتمبر: يمكن دي الحلقة الأشهر والأهم واللي بوظت سمعة "يسري" عشان قابل رجال القاعدة واتكلم معاهم ودخل وسطهم، بس طلعلنا بوثائقي عظيم.
تحطم الطائرة المصرية - سر البطوطي: لو زهقت من الحروب، ففيه حادثة مشهورة في مصر عن سقوط طيارة لمصر الطيران، وفيه كلام كتير عن إن الطيار انتحر، الحلقة دي بتحكي القصة كاملة بقى.
بيحكي الفيلم عن مخرج بدأ يدور عن "رشدي" وده واحد من مصورين الشواطئ في اسكندرية اللي كانوا بيصوروك ويركبوا صورتك على حصان مثلا، رشدي كان صور والد المخرج اللي وهو بيدور اكتشف كتير عن مصورين الشواطئ واستديوهاتهم.
الفيلم ده مش ناطق بالعربي بالكامل، لكنه مهم جدًا عشان بيوثق حاجة عشناها، الفيلم بيتكلم عن كواليس برنامج "البرنامج" وازاي اتعمل وازاي وقف، مش هتلاقي الفيلم على يوتيوب، بس لو كتبت اسمه في جوجل هيطلعلك مواقع كتير تقدر تشوفه من خلالها.
ده اسم برنامج على التليفزيون العربي، انا شفت منه حلقتين وهنسيبلك لينك حلقة ودور انت بقى، يمكن يبان ان ده برنامج مش فيلم وثائقي، بس هو معمول بطريقة الفيلم، وبيحكي عن اللي بيشوفه المصورين في الحروب، الموضوع مش سهل خالص تتخيله.
من اكتر المشاكل اللي بتقابلنا في البلاد العربية اننا بنقرأ التاريخ بعين الكسبان، فمبنعرفش الحقايق كاملة، الرئيس الأول لمصر بعد الثورة كان محمد نجيب، لكن لأسباب مبتتقالش في مناهج المدارس، مبقناش نسمع سيرته وبقينا نسمع اسم جمال عبدالناصر بس، في الفيلم ده حاول الباحثين انهم يعرفوا حقايق عن الرئيس المنسي، يمكن يكون ممل شوية، ومش بالمتعة اللي متخيلها، بس قصة الراجل ده تخليه يستحق يكون في الليست
الفيلم ده بيتكلم عن "بيتر" المواطن البريطاني اللي قرر يروح يعيش وسط مخيمات اللاجئيين في لبنان في ضيافة عيلة فلسطينية، ومن خلال رحلته دي بقى بتعرف كل حاجة عن الحياة في المخيم، ميزة النوع ده من الأفلام الواقعية الواضحة جدًا في كل حاجة، حاجة كده زي برامج الواقع.
سنة 1979 اقتحم داعية سلفي المسجد الحرام في مكة واحتله لمدة 15 يوم، انا شخصيًا مكنتش اعرف اي حاجة عن الموضوع ده لحد ما وقع تحت ايدي الفيلم ده، وسمعت الحكاية من شهود عيان.
كلمة في سرك: الجزيرة الوثائقية بتعمل احسن أفلام وثائقية في العالم العربي، ومالهاش أي علاقة بالسياسة، وهتلاقي أفلام عن اي حاجة فكرت او بتفكر فيها.
ملحوظة: الأفلام العربي اللي بتتعمل للمهرجانات مش للقنوات احلى بكتير بس للاسف مش بنلاقيها أونلاين، بس ممكن تجرب تقرأ عن فيلم منهم وهو عن قصة حياة أقدم كومبارس في مصر من هنا.
ملحوظة تاني: الأفلام العربي رغم انها وثائقية بس للاسف مش دايمًا بتديك الحقيقة كاملة، فاتعب ودور شوية اكتر.
ندخل بقى في الجد والأفلام الأجنبي
بما اننا في فترة كأس عالم فهتتبسط بالفيلم ده وحكايته، في سنة 1978 كان عشان الارجنتين تصعد لنهائيات كأس العالم لازم تكسب بيرو 4/ صفر وده كان صعب جدًا لأننا قدام فريق قوي، لككن وقتها لأسباب سياسية النظام الحاكم في الارجنتين قدم رشوة لبيرو واللي خليتهم يخسروا 6/ صفر، بعد سنين بدأ يبان حقيقة المباراة دي واتعمل عنها أفلام واتكتب عنها مقالات.
الفيلم ده عظيم جدًا، جدًا، مش بس لأنه اخد اوسكار لكنه كمان بيحكي عن واحد عمل البوم واحد وفشل في بلده – امريكا-، لكنه من غير ما يعرف الالبوم ده وصل لبلد بعيدة جدًا عنه في افريقيا، وبقى نجم في مكان عمره ما راحه ومن غير ما يعرف، مخرج الفيلم تتبع قصة ازاي الالبوم وصل للبلد دي وبينهي الفيلم بحفلة للنجم في البلد اللي حبته وخلدت اسمه من غير ما يعرف، الراجل عاش طول عمره فاكر انه فاشل واكتشف بعد سنين انه بيأثر في ناس عمره ما شافهم.
الفيلم عن مذابح اتعملت ضد الشيوعين في اندونسيا في الستينيات ومات فيها حوالي مليون بني ادم، ده موضوع ممكن ميكونش مغري كفاية ليك، بس المغري هو إن مخرج الفيلم خلى اللي ارتكبوا المذابح دي يعيدوا تمثيلها ويحكوا عملوا كده ازاي، ازاي عذبوا وسرقوا وقتلوا باسم الدفاع عن وطنهم.
الست دي كانت مربية بس كانت بتحب التصوير، وبعد وفاتها اكتشفوا اكتر من 100 الف صورة من كل انحاء العالم وليها طريقة معينة في التصوير، دي حتى ليها صور في مصر، مخرج الفيلم كان بيدور مين فيفيان؟ وكانت بتعمل ايه؟ وامتى صورت كل ده ووثقت الحياة كده من غير ما حد يحس بوجودها.
