لما اكتشفت اليوتيوب سنة 2008، ماكانش في حاجات مصرية أو عربية كتير، بس كان في شوية حاجات الواحد اتحرم منها -باعتبار إن قنوات الدش العربية بقت غريبة جداً ومزعجة ومرهقة بصرياً، وأخيرًا فقيرة جدا- والقنوات المصرية بطلت تجيبها أو حتى تعيد إنتاجها، زي "إبريق الشاى" على سبيل الحصر.

والأهم من كده بقى إن توجه القنوات المصرية تجاه الأطفال اتغير وبقى حاجة كده مسخ، وأغاني الأطفال بقت تجيب تخلف عقلي حرفياً، يعني ممكن الطفل يصاب بأمراض نفسية بسبب مشاهدة أغاني أطفال معينة وقنوات أطفال زي "براعم" على سبيل المثال. غير إن أصلا التلفزيون الكثير على الأطفال خطر،  ما بالك بقى لو كرتون أو أغنية متخلفة، أكيد هتجيب عته. الدراسات العلمية أثبتت إن التلفزيون له تأثير إيجابي وسلبي على الأطفال، السلبي زي مشاكل في تغير سلوك الطفل وتأخره في التعليم ومشاكل في الذاكرة وغيره.

من دوري كأب وعندي ولد عنده 6 سنين، مانع حرفياً الدش في البيت، عشان كله تخلف عقلي والبديل هو اليوتيوب ونت فليكس. ولازم كأب اقرا كتير واعرف كتير عشان أحافظ على عقل ابني في وسط مجتمع على وشك الانهيار الثقافي والأخلاقي، فكنت لازم أقوم بدور الرقيب على اختيارات ابني في اليوتيوب وعدد الساعات اللي مسموحله يتفرج فيها وإيه القنوات اللي بيخش عليها.

أنا اتعلمت كتير من اختيارات ابني فقررت أشاركها معاكم، عشان اكتشفت إن في فعلاً أغاني أطفال وكارتون تعليمية ومش كله هبل وتخلف، بالعكس دي حاجات لها معنى جداً، بس طبعاً كلها إنجليزي، عشان للأسف الاهتمام العربي بالطفل بعافية شوية. أحب أهدي المقالة دي لكل طفل في مصر والوطن العربي.

ابني عرف أسامي الكواكب اللي في المجموعة الشمسية بسبب الأغنية دي، وبالمناسبة الأغنية دي راب. الأغنية في قناة تعليمية للأطفال جميلة جداً اسمها StoryBots

أنا أصلاً بواجه صعوبة في إني أعرف أقول أسامي الديناصورات الموضوع صعب جدا يعني، بس "مليك" ابنى وهو عنده خمس سنين كان عارف أساميهم. بس طبعًا مش كلهم، ولكن عدد لا بأس به والأغنية دي كانت عامل مساعد كبير جدًا من نفس القناة برضه

بس الأغاني دي للأطفال من سن معين يقدر مخه يدرك الصورة والصوت والحركات والكلام ده طبعاً. عالم سمسم برضه فيه أغاني، بس عالم سمسم بتاع برة مش بتاع هنا، يعني أغنية مغني الراب Will.i.am مع عرائس عالم سمسم عن الثقة في النفس.

وأغنية المغني العبقري Bruno Mars في عالم سمسم عن عدم اليأس.

أغاني الأطفال فيها كتير جدًا، من أول تعليم الكواكب وأسماء الحيوانات، لحد تعليم أسامي الحاجات اللي بنستخدمها يومياً في حياتنا، للأسف كل ده بالإنجليزي، وده الصح كمان، إنك تفرج أطفالك على حاجات باللغة الإنجليزية تعليمية، عشان دي أسلم طريقة وأسرع طريقة يلقطه اللغة بسهولة في السن ده زي الأغنية دي. معروف إن التعليم بالمزيكا له تأثير كبير على أي حد، خصوصًا الصغار من قناة WOW ENGLISH TV

في فرق لما تقول أزرق، أو تحدد وتقول ده أزرق فاتح وأزرق غامق، وده مهم في إنه بيساعد ويطور القدرة على التمييز بين الأشياء والاختلافات بينها، وهنا تلاقي برضه أغاني تقدر تساعد الأطفال على تحديد الألوان من خلال الأغاني، زي الأغنية دي من نفس القناة WOW ENGLISH TV  لـ Steve and Maggie

و برضوا من قناة StoryBots أغنية تعرف طفلك على أسماء أشهر الحيوانات، لكن دي مش مجرد أغنية وخلاص، دي فيها حاجات كتير تشغل عقل الطفل من ناحية الألوان والحركة وتفاصيل كتير ممتعة للطفل.

ده بقى أيام الاسبوع، ممكن بعض الناس تلاقيه مزعج حبتين عشان نبرة صوته قريبة من النبرة اللي الأطفال بتحبها، اللي كلها هبل دي

من قناة Blippi هى تعليمية بالإنجليزي.

من قناة Super Simple Songs أغنية الأرقام، هتعلم الطفل ويبداْ عقله يخزن الأشكال واسمها، كمان في رسوم جميلة وغريبة مش تقليدية، يعني ده أكيد بيساعد على نمو الجزء المسؤول على الابتكار والإبداع والخيال، ده غير تعليم طريقة العد على الأصابع.

آخر أغنية في القائمة هي برضه من القناة Super Simple Songs بس المرة دي عن الأكل. كلنا بنعاني مع الأطفال في موضوع الأكل، بس في أغاني بتخلي الأطفال تشوف الاكل بطريقة مناسبة للعقول البسيطة بتاعتهم، خصوصًا الألوان والرسوم متميزين جداً، وغير كده بيعرف الأكل على شكل قصة مسلية وتجذب عين وودان الطفل.

اليوتيوب مليان أغاني أطفال، بس في منها الوحش جداً ومجرد صورة من برة وبس عشان يجيب عدد مشاهدات، وفي منها الحلو وفعلاً تعليمي، عشان في الأول والآخر احنا يهمنا نطلع جيل مثقف واعي ويميز الحاجة الجميلة من القبيحة، ده مش هييجي لوحده والمزيكا بتلعب جزء مهم جداً في التربية العلمية والفكرية والنفسية للطفل، مش أنا اللي بقول كده ده العلم.