سنة 91، وبصوت رقيق أقرب للطفولي، سمع الناس ألبوم "حبيت" لمطرب شاب اسمه محمد محيي، وعلى مدار 25 سنة غنا وحوالي 10 ألبومات، شريحة من الجمهور قررت إن محيي هو مطرب النكد الأول. هنا هنخوض رحلة البحث في مزيكا محمد محيي، ونقدملك 10 أغاني لمطرب النكد الأول، ألحانهم ممكن ترقص عليها عادي.

1- لالي
أواخر التسعينات شهدت تعاون محيي مع إسماعيل البلبيسي –مطرب الغربة- وعملولنا أغنية "لالي"، ودي أغنية أفراح من الدرجة الأولى، بس الديجيهات طبعا هتتجاهل جهد أستاذ محمد في الفرايحي، ممكن تلاقيه حاضر بأغانيه في جلسات المكتئبين مثلا.

الأغنية كمان في نسخة عظيمة منها بصوت إسماعيل البلبيسي تقدر تسمعها من هنا

2- أنا حبيت 
أول أغنية في أول ألبوم لمحيي سنة 91، الأغنية كلماتها تبدو حزينة، لكن اللحن والأداء غير كده خالص. اللحن كمان قصته مشهورة، هو أصلا بتاع "سعيد صالح"، غناه في مسرحية "كعبلون" على كلمات مضمونها سياسي لبيرم التونسي، بتقول: أنا اتلهيت وخدل زِنّدي.. وأنا لا عنتر ولا غاندي"، ده اللي ماعرفوش محي غير بعد نزول الشريط، فنزل الشريط والغنوة مكتوب جنبها "فولكولور"، قبل سعيد صالح ما يعمل مكالمة لمحيي هسيبكم تتخيلوا نصها. الأغنية موجودة بتوزيعين، توزيع كلاسيكي شوية هتفتكره في الأول أغنية "أنا هويت لسيد درويش" وتوزيع تاني أسرع وأنسب للرقص.

نسخة محيي: 

نسخة سعيد صالح:

3- الصيف
لو دورت كويس ورا محيي وماحصرتوش في أغاني النكد، هتلاقيه عمل أغنية فرايحي في ألبوم تسعيناتي كده، بتتكلم عن علاقات الحب في المصيف، الراجل مش مقصر يعني.

4- ليه الحبيب
الأغنية سنة 92، بس من غير كلام كتير، افتح اللينك وهترقص على طول

 5- بحبك
دويتو محيي وشرين -أيام ما شرين كان اسمها شرين اه يا ليل- اللي كان له فقرة ثابتة في الأفراح، والراجل بتاع الدي جي يخلي العريس يغني جُمل محيي، والعروسة تغني جُمل شرين، كانت حاجة توجع البطن رغم إن الأغنية لطيفة!

6- في الأول
من ألبوم ""صورة ودمعة"" سنة 2001، اللي لازم تدور فيه بملّقاط علشان تطلع أغنية فرايحي، لكن الأغنية دي تحديدًا لحنها فارض نفسه على بلاي ليست "محيي الفرحان"، غير الآلات المستخدمة في التوزيع، حاجة جديدة على محيي وكانت أول وآخر مرة تقريبًا.

 7- حب تاني
من ألبوم "شارع الهوى"، ألحان وتوزيع مبهجين جدا، وكلمات خفيفة للشاعر عبد العزيز عمار، أقولك التقيلة بقى؟ الفيديو كليب اللي اتصور مع المخرج أحمد المهدي، كله حركة وألوان ومحيي بيرقص مع بنات! متخيل الموقف نادر التكرار ازاي؟! فأكيد لازم تشوفها وتسمعها.

8- مش كنت قولي
ومازلنا مع أالبوم "شارع الهوى"، المرة دي أغنية "مش كنت قولي"، كلمات وألحان عنتر هلال ورياض الهمشري، والاتنين حققوا شهرة كبيرة في التسعينات. رد فعلي الأول على الأغنية إنها فكرتني بأغنية حكيم "الحق عليه"، فأكيد الأغنية مش حزينة خالص ولازم نعمل معاها وقفة.

9- ياللي بتغيب عليا
الأغنية كلها آهات و جراح بس في حدث جديد علينا هو إننا هنشوف فيه محمد محيي بيرقص مع موديل، مش مغطس راسها في المية ولا بيعذبها مثلا زي كليب "أهل الملامة"، محيي في الألفينات ماعملش غير 3 ألبومات، الفرحة فيهم كانت شحيحة شوية، بس لحن الأغنية دي فلت الحمد لله.

10 - فاكراني بحبها
من ألبوم "مظلوم" في 2008، الأغنية جديدة على مزيكا محيي، غير إنها مش حزينة يعني، هنلاقي محيي هو اللي تقلان والست متشحتفة عليه وهو ناقص يقولها أنتي ماعندكيش أخوات ولاد! غير جزئية الراب اللي في الأغنية، وكل دي عوامل خليتها تحتل مركز في بلاي ليست "محيي الفرحان"

الصورة المستخدمة في الموضوع فوتوشوب