النهارده في دبي كان إيفنت إطلاق الخدمات والمزايا الجديدة لأوبر بحضور ساشين كانسال، المدير العالمي الأول لمنتجات السلامة في أوبر، واللي تم من خلاله تعريف العملاء بالخدمات الجديدة اللي تم تصميمها لضمان أمان وسلامة الكابتن والعمل في نفس الوقت.

أو حاجه هتلاحظها في الخدمات الجديدة  هي "أيقونة الأمان" اللي هتظهر في الشاشة أول ما تبدأ رحلتك مع أوبر، "هتلاقي الأيقونة في بداية ومنتصف الشاشة عشان ماتفوتهاش" حسب كلام "كانسال"، لما تضغط على الأيقونة دي هتظهرلك تعليمات عامة للأمان أثناء الرحلة، وكمان من خلالها هتقدر تتصل بالأرقام المختلفة في حالات الطوارئ. 

ميزة تانية مهمة هي إن العميل هيقدر يضيف 5 أرقام يثق فيهم عشان يقدر يختار منهم الرقم اللي هيشارك معاه رحلته ويتابعها لحظة بلحظة، ودي بتعتبر ميزة مهمة لو كنت بترجع البيت متأخر، والميزة دي هتتوفر للكباتن كمان.

كمان ميزة "الإحتفاظ بخصوصية العميل"، بمعنى إنك لما تتصل بالكابتن أو لما يتصل هو بيك عشان تقدروا تتقابلوا، رقمك مش هيظهرله ومش هيقدر الكابتن يعرفه، لكن اللي هيظهر هو رقم أوبر اللي هيوصل الراكب والكابتن بعيد عن رقم تليفونك الحقيقي، والميزه دي جت من اهتمام أوبر بالحفاظ على خصوصية العملاء، "مسؤوليتنا هي تقديم خدمة ممتازة و تجربة آمنة للساشقين و العملاء" حسب تصريحات "كانسال" خلال الإيفنت.

أما بخصوص السائقين، أبليكيشن أوبر هيقوم بالإغلاق تلقائيا بعد 12 ساعة متواصلة من القيادة ومش هيقدروا يستقبلوا ركاب جدد متواصلة و لمدة 6 ساعات، وده لإجبار السائقين على إنهم ياخدوا وقتهم من الراحة عشان يقدروا يكملوا شغل بآمان و تركيز وياخدوا الراحة اللي محتاجينها.

"إنذار السرعة" ميزة إضافية  وظيفتها تنبيه السائقين لما يتخطوا السرعة المحددة للطريق اللي هما ماشيين فيه عشان مايتخطوش السرعات المقررة وده هيساهم بشكل كبير في تقليل خطر الحوادث والأعطال.

وأضاف  "سانشال" معلقا على التحديثات الجديدة: "إن أوبر خلال السنة الماضية عملت على تطوير منتجات مبتكرة تزيد الشفافية والمساءلة وراحة البال لجميع المستخدمين وإن إطلاق مجموعة أدوات السلامة الجديدة في جميع أنحاء أوروبا والشرق الأوسط وإفريقيا هي الخطوة التالية في التأكد من أننا نساعد الجميع على البقاء في أمان وتواصل، أينما كنت".  جدير بالذكر إن الخدمات الجدية لأوبر هتكون متوفرة في مصر خلال أسابيع.