في نهاية سبتمبر من كل سنة، ناس بتستنى الشتا وناس بتستنى ألبوم لحد معين، وناس تانية بتستنى أسطوانة فيفا الجديدة. في ميعادها المعلن عنه صدرت فيفا 19. حلوة ولا وحشة ولا زي اللي فاتوا؟ إيه معايير التقييم وإيه اللي بتكون مستنية من نسخة FIFA الجديدة عشان يقدروا يحكموا عليها؟ بالنسبالي معيار تقييم اللعبة بتكون في الجرافيكس وأشكال اللاعيبة والملاعب والجمهور والمدربين والأزياء، كمان الإضافات اللي زادت على اللعبة اللي فاتت وطبعًا أخيرًا الGame play ومدى سهولته أو صعوبته والغلطات الموجودة في اللعبة إن وجدت. ناخدها واحدة واحدة.

1- الجرافيكس:

محرك الألعاب المستخدم في فيفا 19 هو هو اللي كان مستخدم في 18 و 17، ودي النسخ اللي نقدر نقول حصلت فيها نقلة نوعية في الجرافيكس، ما قبل فيفا 17 كانت فيفا لعبة مش بتهتم بالجرافيكس خالص، وكانت PES متفوقة على FIFA في النقطة دي. فمن ناحية الجرافيكس وأشكال اللاعيبة والمدربين والجمهور والملاعب، اطمن.

2- الإضافات

ده أكتر جزء ممكن نتكلم فيه عن فيفا 19 لإن الإضافات كتيرة. مبدئيا معروف لكل اللي بيلعبوا لعبة كورة، إن الموضوع متعلق أولًا وأخيرًا بالمنافسة، احنا هنا مش بنهزر ولا بنتسلى، احنا بنتنافس وبنزعق ونشتم ونترفز واحنا بنلعب، عشان بنتنافس، بس لطيف برضه إن اللعبة تزودلك كام مود جداد للتسالي. أول مود ممكن تجربه هو الـ No Rules وده باين من اسمه، هو عبارة عن كورة شوارع بس في ملعب كورة عادي، الحكم شخص عدمي واقف مابيعملش أي حاجة، اللي بيكسب هو اللي بيقدر يضرب أكتر ويباصي للمهاجم المتسلل أكتر.

- تاني مود جديد على اللعبة هو الـ Survival وده عبارة عن إنك بتلعب ماتش عادي جدا، بس كل لما تجيب جول واحد من لاعيبتك هيخرج وتلعب ناقص، لحد ما توصل إنك بتلعب في الملعب ب6 لاعيبة وحارس. المود ده حلو عشان بيجيب ضحك والملعب بيقلب لسيرك وبتلاقي نفسك انفراد من بعد خط ال18 بتاعك وماتشات المود ده بيدخل فيها بال15 جول عادي، ده مش بيوفر تنافسية خالص، بس بيوفر تسالي وضحك وتقضية وقت لطيف مع اللعبة أنت وأصحابك

- تالت مود هو الـ Headers and Volleys. ده ماتش عادي جدًا بس مافيش أجوال بتتحسب غير لو جات عن طريق Headers and Volleys  وده بيخلي الأجوال اللي بتيجي في الماتش كلها شكلها حلو وأكروبات ولوبات وشقلبظات وحاجة آخر فري ستايل. أي أجوال بتدخل بأي طريقة تانية مش محسوبة. في مودز تانية أقل أهمية وأقل في المتعة بتاعتها، زي إنكم تلعبوا 5 ماتشات واللي يكسب 3 منهم يبقى هو الفايز، كأنه ماتش تنس أو Volly ball.

3- الخطة والتكتيك

ده أهم جزء بالنسبالي في اللعبة، فيفا 19 بقت لعبة تكتيكية جدًا وهتسمحلك تطبق أشكال مختلفة من الدفاع والهجوم وواجبات وتعليمات أكتر لكل لاعب من اللاعيبة. الدفاع كمثال بتقدر تحدد طريقة الدفاع المثالية لفريقك، هل بتفضل تلعب دفاع متكتل في عمق الملعب وتركن قدام مرماك ولا بتفضل دفاع متوازن ولا بتحب الضغط؟ طب لو بتحب الضغط تحب تلعب ضغط شكله عامل ازاي؟ وهل لاعيبتك تبقى متأخرة في الملعب ولا واقفين عالي عشان يقطعوا الكورة في مناطق قريبة من الخصم؟ انتشار لاعيبتك، يبقوا قريبين من بعض ولا منتشرين أكتر بعرض الملعب؟ تلعب على الاستحواذ ولا الكور الطويلة ولا الهجمات المرتدة والبنا السريع للعب؟ عشان تفهم أكتر شوف في الفيديو ده ازاي التاكتيكس الجديدة بتغير شكل الملعب

4- الـ Journey

إيه الحلاوة دي أقسم بالله! استكمالا لاتجاهات مود الجورني في في فيفا 18، فيفا 19 وسعت الموضوع وخلت في بدل الشخصية الرئيسية 3 شخصيات. دلوقتي تقدر تبدل ما بين أليكس هانتر وأخته وصاحبه داني ويليامز، وتلعب بأي حد منهم في أي وقت. أليكس وصل لمحطته الأهم وهيلعب في ريال مدريد. داني ويليامز قدر يجدد عقده مع فريقه ومسيرته بتطور. أخت أليكس هتلعب في كاس العالم للسيدات مع منتخب أمريكا. أنت بقى تقدر تختار أي خط من دول وتلعب بيه وتبدل ما بينهم. المود عظيم وواقعي أكتر وبتشارك فيه لاعيبة أكتر.

5- الـ Game Play

اللعبة سهلة ولا صعبة؟ فيها عيوب كتير؟ هي كده كده لازم تكون فيها عيوب مش هتكون واقعية بنسبة 100% ولا 90% حتى، بس هل الغلطات ممكن تخليك تفصل وأنت بتلعب؟ الإجابة لأ، اللعبة في نسختها الجديدة أفضل من النسخ اللي فاتت، الغلطات أقل. مابقاش في إن أي لاعب ممكن يشوط من أي حته وتدخل، اللاعب اللي قدراته عالية هو بس اللي يقدر يعمل كده.

 الغلطة اللي كانت بتحصل لما تلعب ثرو طاير فتلاقي اللاعيبة كلها وقفت تتفرج على الكورة وهي طايرة في الهوا، تم علاجها، الغلطة التانية بتاعت إن اللاعب بيستلم الكورو وهو واقف وعلى ما يكمل جري بيها تكون اتقطعت، اتعالجت برضه، دلوقتي اللاعب بيستلم الكورة وهو بيجري عادي والهجمة مابتقفش.

الكروسات والكرات العرضية بقت أفضل بكتير وفعالة أكتر، بس تقدر إنك تصعب الموضوع على نفسك من السيتينج وتلغي أي مساعدة من الكمبيوتر في التوجيه أو الرفعات والصدات بتاعت الحراس. توقع إنك تضيع فرص كتير في اللعبة عشان دي فيفا مش كورة ياباني. بس أقولك حاجة؟ اللعبة حلوة