لو بتقضي نص يومك في وسط البلد يبقى هتحتاج تطلب فطار، أو ممكن تنزل تاكل من أي عربية فول. لو هتطلب الاختيارات مش هتكون كتيرة، يعني الشبراوي أو جاد أو آخر ساعة أو فلفلة، وطبعًا بطلنا المحبوب "القزاز". لو بتطلب فطارك من ماك ماتكملش قراية، لو بتفطر لحمة وفراخ وكبدة ع الصبح ماتقراش وبطل عك بقى

ليه القزاز وليه مش أي حد تاني؟ علاقتك بالقزاز بتبدأ على مضض، بتاكل منه وبتشبع وبتدفع قليل بس مش مبسوط، مش حاسس إنك مكتفي وكل يوم بتفكر في بديل، بتحس إنك مضطر وبتصبر نفسك بكلام زي: معلش أصله أسرع ديلفري، معلش أصل السعر أرخص، معلش أصل المنيو عنده فيها حاجات أكتر. بعد فترة بتكتشف العلاقة أكتر، وبتحس إن ارتباطك بالقزاز مابقاش مجرد إجبار، ولا مضطر علشان هو أحسن الوحشين. بتيجي كل يوم الصبح وأنت حاسس إن نفسك تشوف ديلفري القزاز النهاردة.

القزاز مش هيوجع بطنك، أنت فاكره الشبراوي؟ ولا أكله مزيت وغالي ع الفاضي زي جاد، ولا الديلفري بياخد ساعتين علشان يوصلك آخر الشارع زي فلفلة، ولا.. لا مش عارف أقول إيه عن آخر ساعة، ماجربتوش بصراحة، بس أكيد القزاز أحسن. منيو القزاز خصوصا بتاعت الفطار، فيها كل حاجة فعلا، ساندويتشات، علب، سلطات بأنواعها، مقليات، مشويات، حاجات للدايت لو بتعمل دايت، حاجات هيلثي لو عندك قرحة في المعدة، بعد الشر عنك، وحاجات وحشة لو أنت مازوخي. الديلفري بياخد تلاتة جنيه ونص، أنت متخيل يا مان؟ الحلويات برضه موجودة، في حلاوة طحينية، في مربى، في أم علي وكريم كراميل ورز بلبن، مش ممكن يا قزاز والله

أرشحلك منه إيه؟

في حاجات هنصحك تطلبها: الجبنة المقلية والبيض بالبسطرمة، الحلاوة بالقشطة، الفول الاسكندراني، البابا غنوج، البطاطس المهروسة، وطبعا طيبة الذكر أم علي. لو طبته وقت الغدا، اطلب وجبات الفراخ، وعملوا جديد كمان وجبات كنتاكي، اللي هي عبارة عن فراخ كنتاكي بس أحلى وأنضف من بتاعت كنتاكي. في الخضار هرشحلك الملوخية، ولما الشتا يدق البيبان، هرشحلك شربة العدس بالزبدة. لو هتدبها جامد، خد حواوشي

اللي بيحب بيسامح!

في شوية مشاكل كدة، بس عادي يعني اللي بيحب بيسامح، وكلها حاجات ماتجيش حاجة جنب المميزات اللي هتلاقيها لما تاكل من القزاز. ابعد مثلا عن البطاطس الفرايز، هتجيلك معجنة ومزيتة وطرية وباردة وتقرف الكلب، وبصراحة أنت الغلطان، البطاطس تتاكل من إيد ماما سخنة. بلاش برضه الطعمية، مزيتة كدة شوية وتجيب تلبك معوي، بس عادي والله كله بال"أنتينال" بيفك. لو بتحب الجبنة اللي بالطماطم كلها من عند حد تاني، القزاز بيعمل حاجات صعبة، لكن الكلام الفاضي والجبنة بالطماطم دي مش تخصصه فبتقلش منه.

مواقف شخصية مؤثرة

مرة كان القزاز عنده أزمة وزحمة في الطلبات، وقالي آسفين مش هنقدر نجيلك قبل ساعة ونص، قولتله لا خلاص مش عاوز وقفلت. بعدها فضلت أفكر، هو اللي عملته ده كان صح؟ ليه مش بلتمسله عذر؟ ما هو كل يوم بيجيلي بعد ربع ساعة، إيه المشكلة يتأخر ساعة ونص؟ وكان القرار: سيبت شغلي وسيبت مديري وسيبت الميتينج الصباحي وحطيت شغلي ومستقبلي على المحك، ونزلت جيبت الأوردر بنفسي.

حصلت كام مرة إنه يجيبلي الأوردر ناقص، على طول كنت بكلمهم يعتذرولي ويبعتوا الباقي على طول. الراجل الكول سينتر ساعات بيبقى صاحي من النوم مش فايق شوية فبيغير الطلب بمزاجه، فالأول كنت بغضب، بس بعد كدة بقيت باكل الحاجات اللي بيبعتهالي وبستمتع بتجربة جديدة كانت غير متوقعة.