الكاتبة سلوى النعيمي في رواية برهان العسل – اللي بتتكلم بشكل أساسي عن علاقاتها بالجنس وعلاقة العرب بيه- بتقول: إن كل الستات العرب بيتعاملوا مع المثلية الجنسية والنوم مع ستات زيهم على إنها تجربة فضولية ممكن يجربوها، وبتحكي عن علاقات سرية عرفتها وسط الستات العرب، الكلام ده يبدو إنه صادم، يعني إيه علاقة مثلية بين الستات خصوصًا لو هما أصلًا مش مثليين؟! لكن  الحقيقة إن في قعدات الصراحة كدة، هتلاقي نسبة البنات المتقبلة للموضوع -حتى لو مش هتعمله- أكبر بكتير من الرجالة، وده أكيد ليه أسبابه.

مثلًا لما كنت بسأل أي راجل "straight" بهزار عن أي حاجة متعلقة بالمثلية، كان بيقفش ويقول لأ وازاي وبتاع، وأغلبهم بيقرفوا وبيحسوا إنهم مش متقبلين الفكرة خالص، لكن الستات ممكن يقولوا: احنا مش كدة ودي مش ميولنا بس مش متضايقين ومش قرفانين –مابنتكلمش هنا في حرام وحلال-، كمان فيه بنات كتير اتكلمت معاهم بيقولوا تجربة لطيفة في حياتنا ممكن نعملها مرة في العمر بس ماتبقاش علاقة مستمرة. يعني البنات غالبًا لو شافوا صورة بنتين بيبوسوا بعض مبيداروش وشهم حتى لو مش عجباهم، عكس الرجاله اللي ممكن ترجع احيانًا.

ليه بقى الفرق الشاسع ده في رد فعل الرجالة ورد فعل البنات؟

اللي احنا بنقوله ده اتعمل عنه مواضيع في مجلات عالمية والناس اتسألت وناس ناقشت الموضوع، وطلعوا وطلعنا معاهم بشوية أسباب بتخلي الست عندها ميول للمثلية أكتر حتى لو هي أصلًا بتفضل الرجالة:

**السبب الأولاني هو الفضول، دايمًا الحاجة اللي عمرك ما بتعرفها بيفضل حواليها هالة كده بتميزها وبتخلي ليها طابع مميز وعايز تجربها، وده اللي بيحصل مع العلاقات المثلية بالنسبة للستات، طيب ليه الراجل مابيحسش بالفضول ده؟

لأنه بيحس الموضوع بيمس رجولته، الراجل بيعتبر قدرته الجنسية جزء من رجولته، فلما تقوله أنت مش هتبقى الطرف المسيطر هيحس إن الموضوع بينتقص من رجولته، ودايمًا هتلاقي في الثقافة الشعبية سخرية من الراجل المثلي زي "عجلة" مثلًا، بس مافيش زيها أوي بالنسبة للستات، ولا حد بيفتح الموضوع، بل بالعكس فيه رجالة بيعتبروا الموضوع مثير ليهم جنسيًا!

**السبب التاني اللي ممكن يخلي الستات عندها ميول أكتر، هو إن الستات فاهمين بعض أكتر والرجالة "غُشم"، غالبًا الراجل أثناء العلاقة الجنسية بيفكر في نفسه هو ومش بيبقى فاهم أوي جسم الست وبتتبسط ازاي، وإنها مش هتتبسط بنفس الحاجات اللي بتعجبه هو! وأفلام البورن اللى بتخلي الست مبسوطة ومتنططة دي بتضحك عليه، فالستات بتحس إن أكيد لو واحدة زيها هتبقى فاهماها أكتر وهتعرف تخليها مبسوطة، باعتبارهم هما زي بعض يعني.

**فيه موقع أجنبي كان رأيه إن السبب التالت إن الرجالة مش بيفهموا إن الستات ممكن تحب جسمه بطريقتها هي، وفيه حاجات بتفضلها وحاجات لأ وهتطلب حاجات، وكتير من الرجالة بيفتكر إن من حقهم هما بس اللي يطلبوا شكل معين، فالستات بتتخنق بقى وتلجأ لبعض.

**الموضوع ليه مميزات ممكن تكون موجودة عادي لو فيه إتفاق بشكل معين، زي إن مافيش حمل مفاجئ ولا خوف منه في العلاقة المثلية، وزي إن الست هتوصل للأورجازم بشكل يبسطها أكتر من غير وجع قلب، وفي النهاية الموضوع ممكن يكون مغامرة لطيفة عايزة تجربها، وتحس إنها مرغوبة حتى من الستات، ومش لازم تقول زي الست سمية الخشاب "ماعندكمش غير جسمي تطمعوا فيه".

كل الناس بيتولدوا يا أبيض يا أسود، بيعرفوا ميولهم بدري يمكن كلنا فاكرين كدة، لكن بحسب دراسة في جامعة "اكسس" الرجالة الغيرين –اللى بيفضلوا علاقات الجنس الآخر يعني - بيفضلوا طول عمرهم كدة، لكن الستات حتى لو على علاقات مع رجالة ومبسوطين فيها، فهما بينجذبوا لستات تاني وإن ماقالوش ده لحد ولا حتى بينهم وبين نفسهم.

وبحسب الدراسة دي كل الستات اما مثليين أو باي سيكشوال، مافيش ست سترايت على طول الخط.

التليجراف –على سبيل المثال- عملت موضوع عن الستات اللي بيميلوا للستات وهما كبار، كان بشكل أساسي بيدور عن قصة إيما اللي اتعرفت على جوليت وحبيتها وهي عندها 40 سنة، وقبلها كانت عمرها ما مالت للستات. جوليت هي مؤسسة وصاحبة موقع خاص بمواعدة الستات لبعض وبيسهل عليهم يعرفوا بعض أكتر، وكانت ضمن قائمة Diva power list  سنة 2016، ودلوقتي الموقع بيديره جوليت وإيما، اللي قالوا إن فيه ناس بتكتشف ميولها وهي كبيرة وطول ما أنت ماجربتش ماتقدرش تحكم هتتبسط أكتر أو لأ!

الإندبندت خدت الدراسة دي وعملت إحصاء لطيف كدة على الستات والرجالة، لاقيت إن 82 % من الستات اللي سألوهم بيميلوا للجنسين فعلًا، والدكاترة المتخصصين قالوا إن كون الست عمرها ما هتكون "باي سيكشوال" أو "ليزبيان" حاجة مانقدرش نعرفها دلوقتي، لأنها ببساطة ممكن ميولها تتغير بمرور الزمن والتجربة ومن غير ما تتعرض لحوادث مثلًا، تتغير كده بدون مناسبة.

على الرغم من كل الدراسات دي، الستات في العالم العربي ممكن يموتوا من غير ما يعدوا بالتجربة دي نظرًا لتقاليد البلاد والأديان فيها، فماتخفش مش هتبقى "روس" –بطل مسلسل فريندز اللي سابته مراته علشان حبت صاحبتها- بس أنت برضه خليك جنتل وعارف تتعامل معاها علشان ماتحسش بالأسباب اللي قلناها. الكاتبة سلوى النعيمي وعلى لسانها، لما قالوا ليزيد بن معاوية إن زوجته "تساحق" قالهم إنه أمرها بده علشان تعرف قيمته! راجل واثق من نفسه.