• اكتب معانا
  • ماتنسناش
  • تابعنا
الموضوع اللي جاي
القومي للطفولة: 5% من بنات مصر تحت 17 سنة متزوجات
الموضوع اللي فات
رويترز: السعودية وسوريا من أخطر دول العالم على الستات

"يا بت أنتي مراتي".. حكايات بنات اتعرضوا للابتزاز الجنسي عن طريق الإنترنت

..

لو اتفرجتى على مسلسل "هذا المساء"، في حكايتنين مهمين هتلاقي نفسك مش ناسياهم، حكاية تقى اللي صاحبها كان مصورها وقدر "فياض" يوصل لفيديوهاتها وصورها وبدأ يبعتلها رسايل على الواتس آب ويتصل بيها ويهددها إنها لو مارحتلوش البيت تعمله "اللى هو عايزه" هينشر صورها وفيديوهاتها على النت ويفضحها

 

وكمان مش هتنسى "سوني" صاحب محل الموبايلات اللي فى آخر كل يوم بيقعد على الكمبيوتر بتاعه ويدخل يهكر أي موبايل مسكه طول النهار ويسلي نفسه بصور وفيديوهات ومكالمات  الزباين الستات اللي راحوله، لحد ما ينقى منهم الضحية الجديدة اللي هيتسلى عليها ويطلع منها بمصلحته

 

مسلسل "هذا المساء" اللي تم إنتاجه سنة 2017 ناقش موضوع مهم أوى ومسكوت عليه نوعًا ما، يمكن لأنه مابيحصلش قدام الناس أو بشكل واضح، لكن الأكيد إنه بيحصل طول الوقت. التحرش والابتزاز اللي بتقابله البنات على الإنترنت بشكل يومي، بيعتبر نوع خطير من التحرش المسكوت عنه، لأنه إما بيتم بشكل غير مباشر في مراحله الأولى أو لأنه زيه زي التحرش الصريح اللى بيتم بالإيد فى الشارع، معظم البنات – للأسف- بتسكت عنه وبتخاف تقول إنها اتعرضتله.

يعنى إيه تحرش؟

التحرش متعارف عليه دوليًا على إنه أي صيغة من الكلمات غيرمرغوب بها  أو الأفعال ذات الطابع الجنسي واللي بتنتهك جسد أو خصوصية أو مشاعر شخص ما وتجعله يشعر بعدم الارتياح، أو التهديد، أو عدم الأمان، أو الخوف، أو عدم الاحترام، أو الترويع، أو الإهانة، أو الإساءة، أو الترهيب، أو الانتهاك.

يعني مش بس التلامس أو التحرش الجنسي بالشكل المعروف، لكن كمان الإيحاءات المهينة، الإبتزاز الجنسي والكلمات والأفعال اللي بتجرح مشاعرك أو تخدش الحياء، بتدخل كلها ضمن تصنيفات التحرش الجنسي، وده معناه إنه كل رسالة جاتلك فى الـ other  وكل معاكسة تليفون تعتبر تحرش جنسي صريح.

وبيتعرف التحرش عبر الإنترنت إنه القيام بإرسال التعليقات، الرسائل و/أو الصور والفيديوهات غير المرغوبة أو المسيئة أو غير لائقة عبر الإيميل، الرسائل الفورية، وسائل التواصل الاجتماعي، المنتديات، المدونات أو مواقع الحوار عبر الإنترنت. في دراسة للأمم المتحدة سنة 2017 بتقول إن حوالي 99% من النساء المصريات بيتعرضوا للتحرش بأشكاله المختلفة، سواء كان لفظى، جسدى أو عن طريق الإنترنت.

"الحكايات مختلفة، بس الهدف واحد.."

فاتن بتقول إنها عرفته من خلال النت، الموضوع بدأ كصداقة عادية وبعدين حبينا بعض، ووثقت فيه وصدقت إنه هيتجوزها بس بعد ما يحل شوية مشاكل عنده، وعلشان يحل المشاكل دى طلب منها فلوس وهي ماكانش معاها تدفعله، فاتفاجئت إنه كان مخترق كاميرا موبايلها ومصورلها فيديوهات، ومسجل المكالمات ما بينهم، وبدأ يبتزها إنه لو الفلوس ماوصلتوش الحاجات دى هتتنشر على النت وهتوصل لأهلها. طبعا خافت وبعتتله الفلوس وفكرت إنه نفذ اتفاقه معاها ومسح الفيديوهات والموضوع انتهى، لكنها اكتشفت بعد فترة قليلة إنه مافيش حاجة اتمسحت وطبعا رجع يبتزها مرة تانية لحد المشكلة اتحلت.

بنت تانية رفضت ذكر اسمها بتحكي إنها قبلت طلب صداقة من بنت على الفيس بوك، وبدأوا يتكلموا وبقوا أصحاب مقربين بشكل ما، بس بعد فترة بدأت تشك فى طريقة الكلام إنها بقت غريبة ومش طبيعية زي ما أى اتنين بنات أصحاب ممكن يتكلموا، الغريب إنها لما سألتها ردت عليها بكل صراحة إنها "مش بنت" واكتشف إنه راجل متجوز ومخلف وعنده أكتر من أكونت بأسماء بنات بيكلم منهم ستات وبنات ويتقرب منهم، عشان يحكوله أسرارهم ويفضفضوا ويحكوا مشاكلهم، عن طريق إنه كان بينزل software معين يحول صوته لصوت واحدة ست، وفى منهم اللى كانوا بيبعتوله صور بلبس علشان ياخدوا رأيه أو رأيها فيه. لما عرفت الحقيقة قررت تبعد وماتتكلمش معاه نهائي، وطبعا هنا بدأت التهديدات بإنه لو ماستمرتش فى الكلام معاه هيبدأ ينشر صورها ويفضحها.

القانون المصري بيجرم التحرش، بس مابيحميش منه  

"محمد رفعت" طيار مدني، واحد من الناس اللى بيحاولوا يساعدوا البنات فى حل النوع ده من المشاكل، وساعد في حل المشاكل اللى اتكلمنا عنها من خلال جروب على الفيس بوك بيضم أكتر من 400 ألف بنت. كواحد من ضمن مبادرات مجتمعية غير حكومية بتحاول تساعد البنات وتحميهم من التحرش، زى "خريطة التحرش" أو "شفت متحرش"، اتكلمنا معاه عن الحالات اللي بيقابلها وازاي بيقدر يحل المشكلات دي ويتعامل معاها، وإيه الأساب الأكتر شيوعًا للنوع ده من الابتزاز المادي أو الجنسي اللي بيتعرضوله البنات.

قالنا "رفعت" إنه معظم الحكايات بتبدأ لما البنات أو السيدات يبعتوا صور "خاصة" لأجوازهم المغتربين أو لو البنت بتجهز مثلا فبتبعت صور وهي لابسة هدوم من جهازها لصاحبتها القريبة في الانبوكس أو على الواتس آب علشان تاخد رأيها، الصور دى بيقدر أي هاكر يوصل ليها ببساطة جدا ويبدأ يستخدمها ضدهم. عادة بيبقى ده هو أصل المشكلة، لكن فى أوقات كتيرة بيبقى عن طريق رسايل فيها تهديدات بمحادثات متفبركة فيها كلام جنسي، وواحد تانى من الأسباب الأساسية، هو إن معظم موبايلات البنات وحساباتهم على فيس بوك  بتبقى من غير حماية كفاية أو خصوصية،  ده بيخلي اختراقها سهل.

بيحكى "محمد": "واحدة من أغرب المشاكل اللي مرت عليا في الجروب، هي بنت من الجيزة فضلت واقعة في دايرة الابتزاز أكتر من سنة، وكل ما تتخطب أو ترتبط يوصل المتحرش صور لخطيبها فبالتالي خطيبها يسيبها، والموضوع اتكرر 3 مرات على فترة طويلة جدًا توصل لسنتين وهي مش عارفة مين اللي بيعمل كده ولا ازاي الصور دى بتوصلهم، ولما حكيتلي وقعدنا ندور مين اللي ممكن يكون اخترق حسابتها أو تكون بعتت الصور لحد مالقيناش، فمكانش في قدامنا غير إننا نفكر في الدايرة القريبة منها، ولما سألتها مين أكتر حد بيمسك موبايلك غيرك، قالت أختى وصاحبتى الأنتيم، وهنا بدأت أشك في صاحبتها، وبعد ضغط عليها اكتشفنا إن صاحبتها دى كانت باعته الصور من موبايل البنت لنفسها وكل ما ترتبط تبعت الصور دى للولد من أكونت غريب علشان تبوظ الموضوع!"

لما سألناه ازاي بيقدر يوصل للمتحرشين، قال إنه غالبًا البنت بتبقى عارفة أو على الأقل شاكة مين اللي بيعمل كده فيها، وفى الأول بنفكر في الناس اللي ليها مصلحة تعمل كده من اللي تعرفهم، فغالبا بيكون حد كانت مرتبطة بيه وسابته، أو حد كانت بتتكلم معاه  من غير معرفة مسبقة، يعنى بيبقى تعارف من خلال الانترنت، أو للأسف حد من أصدقائها المقربين اللي بيعملوا كده من دافع النفسنة أو الكره، لو الطرق دى اتسدت بنبدأ ندور لو الموبايل أو اى اكونت ليها معموله hacking.

بيكمل: "معظم الحالات اللي مرت عليا بتتحل بشكل ودى عن طريق إني بوصل للمتحرش اللي البنت عارفاه أصلا وببدأ اتفاوض معاه، ولو المفاوضات فشلت بهدده إني هبلغ أمه وأهله، وهنا الولاد بيتراجعوا لأنهم بيخافوا يتفضحوا قدام أهلهم، خصوصًا لو كانوا متجوزين أو عندهم أخوات بنات".

تعملي إيه عشان تحمي نفسك؟

مهم تحمي أي أكونت ليكي على الإنترنت وتعمليله security قوي، ومهم كمان تحاولي ماتبعتيش أي صور شخصية ليكي أو تعملي video calls ليها طبيعة خاصة لو حوزك مسافر مثلا، كمان مش أي حد يمسك موبايلك، ولو اضطريتي توديه يتصلح مثلا يبقى مهم تفضيه من أى بيانات، مكالمات أو صور شخصية عليه.

القانون المصري بيجرّم فعل التحرش، والمادة 306 مكرر (أ) من قانون العقوبات المصري بتقول: يعاقب بالحبس مدة لا تقل عن ستة أشهر وبغرامة لا تقل عن ثلاثة آلاف جنيه ولا تزيد على خمسة آلاف جنيه أو بإحدى هاتين العقوبتين كل من تعرض للغير في مكان عام أو خاص أو مطروق بإتيان أمور أو إيحاءات أو تلميحات جنسية أو إباحية سواء بالإشارة أو بالقول أو بالفعل بأية وسيلة بما في ذلك وسائل الاتصالات السلكية أو اللاسلكية، وتكون العقوبة الحبس مدة لا تقل عن سنة وبغرامة لا تقل عن خمسة آلاف جنيه ولا تزيد على عشرة آلاف جنيها و بإحدى هاتين العقوبتين إذا تكرر الفعل من الجاني من خلال الملاحقة والتتبع للمجني عليه.

منظمات تساعدك فى حالة لو اتعرضتى للتحرش أو الابتزاز الجنسي:

حركة ضد التحرش: 01063414614 

شفت تحرش: 0115 082 8811

خريطة التحرش: ابعتى رسالة على  6069 او من خلال https://harassmap.org/ar/contact

وحدة مكافحة العنف ضد المرأة : 01126977222 – 01126977333 – 01126977444

مكتب شكاوى المرأة : 15115

العنوان: قطعة 11 شارع عبد الرزاق السنهوري متفرع من مكرم عبيد بجوار حديقة الطفل – مدينة نصر

Home
خروجات النهاردة
Home
Home