مش من زمان أوي يعني، رفع مواطن مصري –اللي بالصدفة كان خال واحد من كتاب الموضوع- سماعة التليفون وكلم مكتب المحافظ، وحكاله قصة من خياله عن السياح اللي عدوا من تحت بيته وكانوا "مستائين" جدًا من منظر الزبالة. بعد المكالمة بيومين –على غير العادة- كانت في عربية واقفة قدام العمارة بتنضف مقلب الزبالة، اللي ماكانش في تفسير لوجوده في نص شارع مفروض إنه رئيسي. الراجل المصري ده كان بيحكي القصة لأهله وعيال أخواته وبيحتفل بانتصاره كمواطن متواضع لا حول له ولا قوة، على البيروقراطية الحكومية، وإنه يقدر يكلم المحافظ وياخد حقه بمكالمة تليفون.

التواصل مع أي جهة في الدولة وتقديم الخدمات للناس ومساعدتهم، مش مفروض يكون حاجة صعبة. أرقام الطوارئ مش هي رقم النجدة أو الاسعاف بس، لكن الهيئات الحكومية المختلفة في مصر عملت أرقام طوارئ لكل حاجة في الدنيا، مكافحة التدخين والمخدرات، صحة نفسية، تحرش، عنف ضد الأطفال، نقص أدوية.. لو حصلك أي مشكلة فيه حد يقدر يساعدك وينقذك، ولأنها طوارئ، المفترض إنها خطوط ساخنة، ماينفعش تكون مشغولة وماينفعش تتأخر في الرد عليك، لو قافل "الكيبورد" أو "لوحة المفاتيح" لموبايلك برقم سري أو بصمة إيدك، الحاجة الوحيدة اللي تقدر تطلبها هي أرقام الطوارئ، لأن اللي اخترع الموبايل وبصماته وأرقامه السرية، عارف مدى أهمية الأرقام دي ليك في المصايب، تقريبًا مافيش فيلم أجنبي ولا مسلسل شوفناه غير وكانوا بيطلبوا 911 تلت ولا أربع مرات في اليوم والصبح ع الريق كمان.

عشان تعرف الأرقام دي شغالة ولا لأ لازم تجرب، الموضوع بسيط، احنا جربنا 13 رقم مصري للطوارئ في مجالات مختلفة ومن هيئات مختلفة وهنحكيلك ملخص تجربتنا معاهم، عشان لو محتاج حاجة تعرف مين هيرد عليك ومين مش هيعبرك أصلًا..

مكافحة المخدرات 16023

ده أول رقم بدأنا نجربه، ادينا التليفون لحد سبق وجرب أنواع مختلفة من المخدرات علشان يقدر يرد على أسئلتهم بدون ما يشكوا فيه، ده في حالة لو كانوا هيسألوا، في حالة لو ردوا أصلًا! ردوا والمفاجأة مش إنهم ردوا، لكن في شكل المساعدة اللي بيقدموها: "في مجموعات علاجية لو حابب تنضم ليها، نقدر نعالجك في أقرب مستشفى أو مصحة قريبة من بيتك، وممكن حد يقدملك علاج في البيت. في حالة حسيت إنك هتنتكس، كلمنا وهنجيلك فورًا". الحاجات دي بتتقدم بدون أي مقابل ولأي حد يتصل بيهم، الفرصة قدامك، صدقني يا صاحبي مش رجولة –بصوت الفنان محمد رمضان-.

رقم النضافة  152

هاتها جمايل يا رب ونشوف حاجة بسيطة. عند نزلة "كفر طهرمس" على الطريق الدائري، مكان مناسب لتجمعات من الزبالة والحشرات والأمراض والناموس.. إلخ، في كشك ورد فاتح في الوش، فالوضع مش وحش للدرجة دي. هنعمل إيه؟ نكلم الخط الساخن للنضافة (152) ويتحل الموضوع. ماحدش بيرد، طب جرب تاني في أوقات مختلفة، أو حاول من خط أرضي بلاش موبايل، حاولنا كل حاجة. الرقم غير صحيح. قلنا يمكن العيب فينا وكاتبين الرقم غلط، دورنا ولاقينا إنه بتاريخ سبتمبر 2017 -لسه من كام شهر- في كل الجرايد والمواقع، هتلاقي خبر عن تخصيص خط ساخن لشكاوى النضافة اللي هو 152، بس هما مجهدين شوية.

 رقم الإقلاع عن التدخين 16805

يوم الثلاثاء 30 يناير الساعة 4 الضهر، اتصلنا بالرقم ده، وبسرعة جدًا رد فعلًا وسمعنا كلام عن خطورة التدخين وإنه أكتر حاجة ممكن تسبب الوفاة وإنك لازم تبطل تدخين، وبعد دقيقة اتقالنا إنه جميع الخطوط مشغولة الآن وإننا هنسمع شوية نصائح لحد ما حد يرد علينا، بس الحقيقة إننا فضلنا نسمع النصايح دي لمدة 6 دقايق، وبعد ما خلصوا ساد الصمت فجأة وسمعنا صوت صرصور الحقل وفضلنا مستنيين يمكن حد يعبرنا، بس غالبًا كانت النصايح كلها خلصت وماحدش فاضي يرد برضه، فقررنا ندوس 0 زي ما بنعمل مع خدمة العملاء مثلًا، بس برضه ماحدش عبرنا.

بعد يومين جربنا تاني والمرة دي حد رد، وكان شخص متعاون جدًا وقالنا نفس النصايح دي وإننا المفروض نبعد عن أصدقاء السوء اللي ممكن ندخن معاهم، وكان عنده نصايح كتير جدًا بس مابيقدمش خدمة فعلية غير إنه يقولنا مكان أقرب عيادة للإقلاع عن التدخين، واللي موجودة في مركز البحوث في الدقي ومفتوحة كل يوم حد وأربع.

لو بتفكر تبطل تدخين الرقم ده شغال كل يوم من 8 الصبح لـ8 بليل ماعدا الجمعة.

خط مكافحة السياس في محافظة القاهرة 136

علشان هو مش تمام إن في ناس تقرر تنصب نفسها سياس في الشارع منهم لنفسهم بدون ترخيص، في خط معمول علشان الناس تبلغ عنهم، في موقع "اليوم السابع" بتاريخ 9 مارس 2017، المرور بتناشد المواطنين إنهم يبلغوا على رقم (136). ماحدش قال هو الرقم مابيجمعش ليه أو مش شغال ليه ولا هما خلاص شطبوا ع السياس وقفلوا الخط ولا إيه اللي حصل؟

العنف ضد الطفل 16000

كل العيال اللي بتشوفهم وتسمع صوت صريخهم من كتر الضرب، في البيوت والشوارع والمدارس، في خط ساخن مخصص لمساعدتهم وتقديم الرعاية ليهم، علشان حتى الحمير بتمشي من غير ضرب، وعلشان كفاية تشوهات نفسية. الرقم هو 16000، ماشي نجرب. بيرن، بعد دقيقة انتظار لحد ما الفويس الأوفر تخلص شوية كلام عن أرقام وخطوط المساعدة. بيرد واحد  ويسألني عن شكوتي:

- من فضلك أنا نقلت جديد لمنطقة الطالبية هرم، وفي واحد جارنا بسمعه بيضرب ولاده ضرب هيستيري وبسمع صريخهم وعاوز أعرف ممكن نساعدهم ازاي؟

-- تعرف اسم الراجل أو بياناته

- لا للأسف أنا لسه ناقل جديد بس ممكن أجيبلك الحاجات دي، بس مش عاوز أسبب أذى للراجل أنا عاوز أساعد الأطفال بس

-- سن الأطفال كام تقريبًا.

- هو عنده 3 ولاد، ولدين وبنت، البنت لسه صغيرة مامتها بتشيلها، الولاد أعمارهم في ابتدائي تقريبًا.

-- هحتاج منك بس تقولي اسمه وعنوانه علشان نقدر نتصرف

- إيه اللي هيحصله بالظبط؟

-- في إخصائي بيروح المكان ويدرس الحالة ويتأكد من المشكلة، وبيوعّوا أهل الطفل إن دي طريقة مش مناسبة في التربية، وكمان بياخدوا منه تعهد كتابي إن ده مايتكررش، في حالة لو اتكرر بتكون في إجراءات قانونية ضدهم، بس خلينا نتمنى إننا مانوصلش لده.

خط شكاوي المجلس القومي للمرأة

01205575331- 01121997477 –01007525600

3 أرقام أهو بكل الشبكات عشان رصيدك مايخلصش، بس الحلو مايكملش للأسف، الأرقام متسجلة كلها على True caller باسم المجلس القومي للمرأة، بس 2 منهم غير موجودين بالخدمة والرقم التالت مقفول علطول، واحنا مش هنتصاحب يعني عشان نبعتلهم ميني كول.

المشورة الأسرية 16021

لو رقم شكاوي المجلس القومي للمرأة مش بترد، نجرب بقى المشورة الأسرية ونشوف هيحصل ايه؟ كنا متخيلين إنهم هيحلوا المشاكل الجنسية والنفسية والكلام ده، أو هيردوا على الاستشارات القانونية للجواز، بس اكتشفنا إن الموضوع مختلف وإن الرقم  بيقولك إنه مخصص لصحة الأم والطفل والإبلاغ عن زواج الأطفال، عطلنا شوية كده هنقولهم إيه واحنا عمرنا ما ربينا أي عيل، بس الموظف اللي رد علينا كان متعاون جدًا وقالنا إن لو الطفل تعب أو فيه أسئلة عن الرضاعة الطبيعية أو عن مواعيد التطعيمات أو شفنا حالة زواج قاصرات، ممكن نتصل بيهم وهما هيتصرفوا فورًا.

ختان الإناث 1600 أو 16021

الختان للإناث جريمة بيعاقب عليها القانون، والعقاب بيشمل الطبيب أو الحلاق المنفذ وكمان ولي الأمر بعقوبات توصل للسجن. لو عترت في حد عمل أو ناوي يعمل في أهله الجريمة دي، مفروض تكلم 1600 وهما هيقدروا يتصرفوا. بس الرقم ده مش شغال، اللي شغال هو 16021 .. أيوه هو نفس رقم المشورة الأسرية اللي طلعت مش مشورة أوي.

- من فضلك، في حد معايا في نفس مكان العمل وسمعته بيقول إن الأسبوع الجاي هيعمل العملية لبنته

-- ممكن اسم حضرتك؟

- آسف مش حابب أقول اسمي ولا حابب ادخل في أي مشاكل ولا عاوز أعمل مشكلة للراجل، عاوز ألحق البنت بس.

-- طيب حضرتك تعرف اسمه عنوانه ورقم تليفونه؟ هنحتاج كمان أي معلومات عن البنت.

- هحاول أوصل لده، أنا ماليش أي علاقة بالراجل فماعرفش عنه حاجة بس هحاول.

-- ياريت ضروري علشان نقدر نساعد البنت قبل ما ده يحصل، احنا هنكلمه وهنفهمه إن دي جريمة وهنبعت حد على البيت كمان يتكلم معاهم ويقنعهم، بس أرجوك ضروري هاتلنا البيانات دي علشان نقدر نوصله وبنأكدلك إن المعلومات سرية.

خلصت المكالمة، بس تاني يوم الصبح تجيلي مكالمة من رقم ماعرفوش، "أنا دكتورة فلانة من خط المشورة الأسرية"، بتطلب مني أوصلها بسرعة بأي معلومات عن الراجل علشان نلحق بنته بسرعة. الناس كمان عرضت إنهم يعملوا حملة توعية في الشغل عندنا، في حالة لو الظاهرة دي منتشرة بين ناس كتير في مكان شغلي، وأكدوا عليا إنهم مستنيين مني مكالمة. اضطريت اعمل للرقم بلوك علشان ماحدش يتصل بيا تاني من ناحيتهم، بس كنا مبسوطين جدًا وعاوزين نعرف عنوانهم ونروح نبوسهم من بوقهم ونعرّف كل الناس بيهم.

رقم شكاوى وزارة الصحة 16474

ماكناش عارفين إيه ممكن الشكاوي اللي تستقبلها وزارة الصحة، ولاقينا الرقم موجود على النت عشان تسألهم عن الأدوية، بس الموظف الهمام اللي رد علينا ادانا الرقم المتخصص في نقص الأدوية - وهنجربه بعد شوية- وقالنا إن الرقم ده متاح لو قابلنا مشكلة في أي مستشفى، لو الطوارئ مارضيتش تستقبلك، أو لو حصلك إهمال أو أي مشكلة هناك، من الآخر كده زي ما حصل في مستشفى السلام في المعادي، ولما كلمناه بعد كده، قالنا إننا لازم نقول اسم المستشفى وعنوانها وإيه اللي حصل بالظبط، ولأننا مش عايزين نلبس حد فماتصلناش بالرقم ده تاني، بس اتأكدنا إنه شغال.

نقص الأدوية 0225354150

"ميدودرين" دوا رخيص بحوالي 11 جنيه، لما غلي في الموجة الأخيرة بقى ب18 تقريبًا، في نفس الوقت، مهم لكل اللي بيشتكوا من ضغط واطي وأنيميا وحاجات زي كدة. مؤخرًا بقى كل اللي تعمله علشان تلاقيه، إنك تعتر في صيدلية مش بتبيع فعندها كمية قديمة باقية من زمان. نكلم أخواتنا في خط نقص الدوا يدونا المشورة. الرقم (25354150) وحط قبلها 02 ماتنساش. بترد موظفة بتقولنا إنه فعلًا ناقص وبتقولنا على اسم البديل الممكن، بس لازم تشوروا على الطبيب المعالج الأول. "كمان يا فندم سيبلنا اسمك ورقم تليفونك وهنتواصل مع شركات الأدوية ونرجع نكلمك نقولك وصلنا لإيه". ماحدش كلمني تاني بعدها، بس تمام. واضح كده إن وزارة الصحة أكتر وزارة شغالة.

خط الصحة النفسية 08008880700

الرقم ده هو اللي المفروض مسؤول عن أي مشاكل نفسية تحصلك، مكتئب؟ خايف من الدنيا زي ما أستاذ حماده هلال بيقول أو بتفكر تنتحر؟ كلم الرقم ده، بس للأسف الرقم ده مابيشتغلش غير من تليفون أرضي، فلو أنت ناوي تنتحر ياريت تكون في البيت ولو ماعندكش تليفون أرضي قدّم عليه، عشان تلاقي حد يلحقك. لو كلمته من تليفون أرضي بقى مابيردش عليك بعد الساعة 8، مش تنقوا مواعيد انتحاركم؟ 

بعد محاولات كلمناه من خط أرضي فعلًا وقبل الساعة 8 واتقالنا إن المكالمة متسجلة لضمان مستوى الخدمة، بس فضلنا على الانتظار حوالي 5 دقايق لإن جميع موظفي الخط الساخن في خدمة أخرى "حاليًا"، زي ما الرسالة المسجلة كانت بتقول، بس في الآخر رد علينا موظف متعاون وقالنا إن الرقم ده بيقدم 3 حاجات، أولهم هو التوجيه لو عايزين نسأل عن أقرب عيادة نفسية، سألنا اللي محتاج استشارة نفسية بنت ولا ولد؟ وسنه كام سنة، وبعد ما قلناله إنه بنت عندها حوالي 25 سنة وساكنة في محافظة الجيزة، قالنا إن أقرب مكان هو مستشفى حلوان العيادة الخارجية اللي شغالة كل أيام الأسبوع من 9 الصبح لـ12 الضهر، ما عدا الإجازات الرسمية، ويفضل نروح بدري عشان الزحمة. سألناه لو الرقم ده بيقدم أي خدمات تاني غير التوجيه؟ قالنا لو قابلنا أي شكوى في أي مستشفى نفسي ممكن نتصل بنفس الرقم وهو هيحلها خلال 48 ساعة، وأخيرًا ممكن نتكلم مع دكتور بس للأسف الدكاترة موجودين من الحد للخميس من 12 الضهر لـ4 العصر بس، لكن الكلام مع الدكاترة مش هيكون غير استشارة، لكن أي تفاصيل زيادة لازم نروح جلسة نفسية وجهًا لوجه. 

ولما قلناله إن الميعاد ده مشكلته إنه دايمًا وقت شغل والرقم ده بيشتغل من البيت بس، الموظف ادانا نمرة تانية 0220816831 وقالنا دي نقدر نتصل بيها من أي موبايل كل أيام الأسبوع لحد الساعة 8 وبتقدم نفس  الخدمات، الخط ده كان مفيد جدًا مشكلته الوحيدة مواعيده، ده "خط ساخن" لازم يبقى شغال في أي وقت مش خط موظفين.

خط الإبلاغ عن التحرش 

التحرش ليه خطوط كتير جدًا، بدأنا بالرقم 08008883888 الخاص بالمجلس القومي للمرأة وجالنا الصوت "لا يوجد خدمة في هذا الرقم في الوقت الحالي"، تقريبًا الرقم مخصص للأعياد عشان التحرش بيكتر فيها بس، لاقينا رقم تاني خاص بالمجلس القومي للمرأة وهو 15115 لكن الرقم طلع غير موجود بالخدمة أو غير صحيح. 

فلجأنا للرقم الخاص بالمترو والتحرش فيه 16048، بعد انتظار 5 دقايق رد الموظف، قلناله إننا شفنا حالة تحرش في المترو من شوية بس مش عارفين نتصرف ازاي، قالنا إن مفروض نتصل بالرقم ده في لحظتها واحنا جوه المحطة وحد هيجي، بس ماينفعش نتصل بعدها، سألناه طيب الرقم ده مفيد في إيه تاني؟ قالنا إنه بيقبل أي اقتراح يخص المترو وممكن نعمل مذكرة لو قابلنا أي مشكلة وهما بيساعدونا في ده، المهم إننا نتصل في لحظتها، الموظف مسألناش الحادثة كانت في محطة إيه أو الساعة كام أو يوم إيه، كل اللي قاله إنهم ممكن يساعدونا في وقتها.

فيه أرقام تانية لاقيناها خاصة بالتحرش، لكن تبع منظمات خاصة واحنا كنا بندور عن الأرقام الحكومية بس.

122 النجدة

ده الرقم اللي بيجي في دماغ أي حد لما تقوله "طوارئ"، ماكنش عندنا أي شك إنه شغال وبيرد أصلًا، عشان كده ماعملناش حسابنا إننا هنكلمه، بس حظنا إننا احتجناه فعلًا لما حصلت خناقة وكانت هتتطور لأسلحة بيضا، فاتصلنا بيهم وفعلًا ردوا بسرعة، وبعد أسئلة عن المكان وتبع قسم إيه وإيه اللي بيحصل، قالي إنهم جايين بسرعة، عدت ساعة واتنين وتلاتة والخناقة خلصت وماحدش جه ولا عبرنا، يمكن نسيوا! فلما حصل ده تاني قررنا نكلمهم تاني وصفينا نيتنا ودعينا ربنا يسهل طريقهم، بس المرة دي ماردوش علينا خالص بقى.