معروف عننا في مصر- أو مش معروف يعني دا اللي بنقوله لنفسنا- إننا بلد سياحي لحد كبير، وياما سمعنا عن كلام زي إن الشعب المصري مُرحِب ومضياف، وإن الناس كريمة وطيبة والبلد جميلة والحياة كلها ماشية سكينة في الحلاوة.  بس اللي احنا بنقوله دا مالوش أي أهمية جنب شهادات ناس أجانب جم زاروا مصر في فترة ما من عمرهم وخدوا انطباع عنها بناءً على تجربتهم، يا ترى هما شايفين مصر ازاي وبيعانوا معاها ولا مبسوطين؟ على هذا الأساس قررنا ناخد شهادات ناس زي ما هي من موقع Quora الخاص بالتقييمات، وده جزء منهم

1- Anonymous

 أنا زرت مصر مرتين و أقدر أقول إنه المكان الوحيد اللي عمري ما هفكر أرجعله تاني أو أرشحه لحد. أنا عشت في الشرق الأوسط  قبل كده وعارفة ازاي ألبس واتعامل، لكن أنا وصاحبتي كان دايمًا بيتم التحرش بينا، ولو حاولنا في مرة نصور صورة، يجي راجل  يقف قدام الكاميرا لغاية ما نديله فلوس علشان يبعد عننا، ولو مادفعناش بيمشي ورانا لغاية ما نتعصب عليه .احنا الاتنين كنا بنعاني من تسمم من الأكل في مركب في النيل، ومش احنا لوحدنا، لأ، ده نص السفينة جالهم تسمم معانا .

شوفنا قبل كدة اللي واقف في البار بيخفف إزازة الڤودكا بميه، وبلغنا عن اللي شفناه، بس الإداره قالت إنه هو كدة. واحنا نازلين من السفينة وبنزل شنطنا، جم ناس أخدوا الشنطة وشالوها وماحدش طلب منهم ده، وطلبوا فلوس علشان يرجعوها ولما رفضنا، المرشد السياحي اقترح ندفع لكل واحد 10 دولار علشان يرجّعوا حاجتها، بس لما صوتنا علي والناس اتلمت، البوليس اتدخل والمرشد ماحاولش يساعد في أي حاجة. تجربة كمان لما روحت أعمل مساچ، اللي عملتلي كانت شاطرة، اديتها بقشيش كويس وحطته في هدومها، وهمستلي "أرجوكي ماتقوليش للمدير إنك ادتيني فلوس، لما روحت أحاسب طلب مني أسبلها بقشيش، وسيبت دولار، بس كنت عارفة إنه مش هيديهولها. بالنسبالي مصر للأسف ماكانتش تجربة كويسة.

2- Tom Marino

 أنا بعتبر المصريين من أكتر الشعوب الكريمة والمضيافة يمكن أكتر من أي حتة تانية، وبيظهروا حسن التعامل للأطفال وكبار السن. وعجبني تجمع الناس مع بعض علشان يشربوا شاي أو ياكلوا حلويات أو يحكوا مع بعض مثلاً أو يفتحوا مواضيع أو علشان يشربوا شيشة .الأسواق المفتوحة طول الوقت والموجودة في كل مكان، مسلية أكتر من السوبر ماركت، دلوقتي بيوحشني الخضار، الفاكهة المزروعة بمية نهر النيل، وحشني الأكل الصحي والتوابل ومحلات العطور والفصال علشان آخد بسعر أقل.

أنا شايف إن مصر أرض الحكاوي والقصص، وكل الناس بيتشاركوا في الكلام وبيبقى عندهم أفكار قوية ومؤثرة، سواء  كانت قصص من التاريخ أو أساطير أو مجرد أخبار جديدة من قرية أو مدينة. أكيد طبعًا الأهرامات مبهرة، والشواطئ هناك جميلة وتخلي التاريخ يرجع للحياة من جديد. كنت عارف إني بمشي على شواطئ قام عليها حروب ومعارك تاريخية وحضارات قوية، المتاحف أكتر من اللي الواحد ممكن يتخيله.

الاختلاف الكبير بين طبقة الأغنياء والفقراء مزعج جدًا، الفرق بين الحياة في القرى والعاصمة هتفاجئ معظم الزوار، وأظن إن الغرب ممكن يثير اهتمامهم مرحلة التعليم وإن التعليم في أماكن معينة، ومش كل الناس بتقدر تتحمل تكلفته في مصر. في مصر، الدنيا أمان، نسبة أنك تتسرق بتبقي قليلة، الزحمه في مصر في منتهى الفوضى ولازم تتعلم إنك تعدي الشارع وأنت مش عارف هتعيش ولا هتموت. دايمًا كنت بستغرب لما بشوف عربية مرسيدس وعربية حمار بيجرها ماشيين جنب بعض. أنا كأجنبي عشت في مصر، بشوف مصر بلد رائعة وحيوية 

3- V. Loubach

جغرافيًا وتاريخيًا: أحب أزورها 

سياسيًا: غير مستقرة 

ثقافيًا: غنية جدًا  

4- Stacy Tidwell

أنا هتكلم عن نفسي، في مكانين لازم كل أمريكي يزورهم: مصر وروسيا. البلدين مش بيبذلوا مجهود لتسويق السياحة لبلادهم في الولايات المتحدة. البلدين هيستفيدوا جدًا لو الأمريكان زاروهم. الأمريكان مش فاهمين الدور المهم اللي مصر بتلعبه في الشرق الأوسط، لكن السياسيين والجيش الأمريكي عارفين ورئيس أمريكا نفسه كمان. أنا زرت مصر في سبتمبر السنة اللي فاتت، وأقدر أقول إن أي حد عايز يشوف التنوع والاختلافات في الثقافة يزورها. 

في مصر هتلاقي ناس كريمة، بتاخد بالها منك، مش مهم أنت مين. أنا أردني و كانوا كرما جدًا معايا. الأهرامات موجودة في الجيزة اللي بتبعد عن القاهرة العاصمة ب ١٥ كيلو. الجو لطيف في سبتمبر. لكل السياح الحاجات كلها رخيصة مقارنةً ببلادكم. في المجمل، مصر بلد جميلة وحبتها جدًا، وكنت أتمنى أقعد فيها فترة طويلة. 

5- Valentina primo

هيقولولك إن مصر مش أمان، هيقولولك إن الطيارات بتقع، إن في تحرش جنسي والصراع وصل لأسوء مراحله، بس مش هيقولولك إن اللي قابتلها في كافيه وأنت بتحاول تلاقي طريقك، هتعرض إنها تستضيفك لأسابيع لحد ما تلاقي مكان تقعد فيه. مش هيقولولك إن أصحاب الفنادق في مدينة صغيرة على البحر هيعرضوا يدوك شنطة الضهر بتاعتهم وحتي جزمهم علشان تتسلق جبل سيناء، بعد ما نسيت معداتك.

مش هيقولولك إن أي عروسة معدية هتعزمك تروح معاها فرحها. مش هيقولولك إن شخص غريب هيتصل بيك الساعة ٢ الفجر علشان يقولك إنه لقى شنطتك تحت الكبري بعد ما يكون دور في كل تفصيلة علشان يلاقي رقم يكلمه. مش هيقولولك إن في مدينة صغيرة قريبة من السودان هيفتحولك قلبهم وبيوتهم بدون أي أسباب غير إنهم عايزين يعملوا كدة. ماحدش هيقولك إنك في مصر عمرك ما هتبقى لوحدك أبدًا. المصريين دايمًا بيقولوا “ماحدش عارف الخير فين” بس أعتقد ربنا عارف إن الخير هنا.