مارثون زايد الخيري هيتعمل للمرة الخامسة في مصر يوم 28 ديسمبر، في محافظة الاسماعيلية، برعاية مصر الخير. وهيتم تخصيص دخله لصالح مرضى الجذام. وبتيجي النسخة دي في إطار احتفالات دولة الإمارات بمئوية الشيخ زايد آل نهيان.

قيمة الجوائز مليون جنيه هيتوزعوا على 250 فائز نقدًا بعد انتهاء السباق. وهيتم توزيع شنطة لكل المشاركين فيها تيشيرت السباق، رقم السباق مزود، وشريحة تتبع، وزجاجة مياه معدنية.

جدير بالذكر إن مرض الجذام انتشر في التمنينات وأصاب أكتر من 5 مليون شخص على مستوي العالم. وحاليًا نسبة الإصابة بيه انحصرت بشكل كبير حسب أخر احصائيات منظمة الصحة العالمية، واللي قالت إنه موجود بمعدل 99% اقل من المعدلات السابقة.

في مصر بيتم التعامل مع مرضي الجذام من خلال مستعمرة الجذام و 18 مركز تاني في 18 محافظة، وفي 2018 صدر فيلم "يوم الدين" اللي بطله مريض جذام وبيتكلم فيه عن رحلته مع المرض.