مبادرة شمسية هى مبادرة بتختص بالصحة في مصر، بتهتم بصحة المواطنين وده بيأثر إزاي على حياتهم، وبيعملوا أنشطة مختلفة عشان يتأكدوا من ضمان الجودة الصحية اللي بيحصل عليها المصريين، المبادرة عملت موقع "Eghospitals" لتقييم المستشفيات في مصر.

الموقع بيقيم المستشفيات من خلال عدة معايير هى: سلامة المرضى واللي بتقاس من خلال تجنب المخاطر الطبية وإجراءات مكافحة العدوى، والمعيار التاني هو العناية بالمرضى وحقوقهم واللي بيشمل سرية المعلومات وحقوق المريض والتعامل معاه، والمعيار التالت هو المباني والأجهزة الطبية اللي بيشمل كل حاجة في المستشفى حتى المفروشات وأي حاجة محتاجها المريض، والمعيار الرابع هو خدمات الطوارئ، أما الخامس فهو العيادات وده بيشمل كل تفاصيل العيادات الخارجية والانتظار والاستقبال والتعامل مع المرضى، والمعيار السادس الإقامة الداخلية وأخيرًا معيار الفريق الطبي.

الموقع بيشير لحاجة مهمة جدًا إن التقييم تم بناءا على مؤشرات حددها المستفيدين من الخدمات الصحية وتم مراعاة الحيادية أثناء التقييم الذى تم من خلال زيارات عشوائية للمنشأة. والنتائج المعلنة تعبر عن وجهة نظر المقيمين وقت تقييمهم للمستشفى بناءًا على تجاربهم الشخصية ويحق لإدارة المستشفى طلب تقييم جديد في حالة اختلاف النتائج عن الواقع.

الموقع كمان بيقسم المستشفيات من حيث المحافظات والتخصصات وأنواعها وأسعارها.