السيناريست مدحت العدل أعلن إنه انتهى من كتابة الجزء التاني لفيلم "صعيدي في الجامعة الأمريكية". وقال مدحت العدل فى تصريحات لجريدة «الشروق» إنه كان متردد في كتابة جزء تاني من الفيلم، بس إصرار هنيدي هو اللي حمسه، ومفروض إن التصوير يبدأ في يناير 2019 عشان يتعرض في موسم عيد الفطر ويكمل لحد الصيف.

"العدل" أكد إن هيكون صعب وجود نجوم الجزء الأول في الفيلم، خصوصًا إن كلهم دلوقتي نجوم صف أول وميزانية الفيلم مش هتسمح بالتعاقد معاهم، كمان هيكون صعب إنه يكتب مساحة دور كبيرة في الفيلم لكل نجم منهم، بس على الأغلب هيظهروا كضيوف شرف في مشهد واحد يجمعهم مع بعض، يكونوا بيحتفلوا فيه بمرور 20 سنة على تخرج الدفعة.

بداية التفكير في كتابة جزء تاني من الفيلم، بدأت بشكل ساخر على تويتر، لما في حد سأل هنيدي: "كام ريتويت وتعمل جزء تاني من صعيدي في الجامعة الأمريكية؟"، فرد هنيدي بهزار إنه عاوز 100 ألف ريتويت، وكانت المفاجأة إن عدد الريتويتس وصلت لـ300 ألف، ساعتها هنيدي اتكلم مع شركة العدل وطلب منهم يفكروا في إنتاج جزء تاني من الفيلم.