محمد الشناوي سجين في برج العرب بقاله 13 سنة، بعد ما اتحكم عليه بالسجن 20 سنة في قضية تزوير. خلال الـ13 سنة اللي فاتوا، أخد الماجيستر وفضل يسعى عشان ياخد الدكتوراة، "محمد" بيقول إنه قرر يكمل دراسته عشان يعوض عيلته عن اللي فات، ولما سأل في إدارة السجن قالوله كمل دراستك واحنا هنشجعك.

إخصائي اجتماعي من السجن راح لجامعة الإسكندرية وقدم بحث الدكتوراة في كلية الحقوق اللي كان بعنوان "تطوير المؤسسات العقابية"، وفي يوم المناقشة راح "الشناوي" ومعاه حراسة من السجن، وتم قبول دراسته ومناقشتها وأخد الدكتوراة بتقدير جيد جدًا.