في غلطة غير مقصودة، ظهر الملك فيصل وهو بيوقع ميثاق الأمم المتحدة سنة 1945 جمب "يودا" واحد من الشخصيات المحورية في سلسلة حرب النجوم، في كتاب مدرسي سعودي، وبمجرد ما الموضوع انتشر على السوشيال ميديا طلع وزير التعليم السعودي "أحمد العيسى" يعتذر عن الغلط غير المقصود، ويقول إن في لجنة قانونية اتشكلت للتحقيق في الغلط ده.

الصورة كانت جزء من مشروع فني عمله الرسام السعودي "عبد الله الشهري" المعروف بلقب شاويش، المشروع الفني عبارة عن سلسلة أعمال فنية فيها رموز من الثقافة الأمريكية، مدموجة مع صور من أحداث تاريخية، وقال شاويش إن " الفكرة جاتله لما شاف صورة "أنور السادات" واقف جمب "ميكي ماوس" خلال زيارته لديزني لاند، وقال إنه اختار شخصية "يودا" تبقى جمب الملك فيصل، اللي كان وقتها مبعوث للشئون الخارجية لوالده الملك "عبد العزيز آل سعود" لإن الاتنين معروفين بذكائهم وقوتهم وهدوئهم.

أضاف الشهري إنه مش عارف الصورة وصلت ازاي للكتاب المدرسي، وإن في انتقادات كتير وصلتله بسبب الصورة بس الأغلب كان لوزارة التربية والتعليم، وإن كان لازم حد يدقق في الصور قبل ما تنتشر.