ابتدى موسم الأمطار في محافظات مصر المختلفة، مع توقعات بإن السيول تضرب محافظات سيناء ومطروح والبحر الأحمر وسوهاج، عشان كده أعلنت الوزارات عن خطتها لمواجهة السيول، ومنع تكرار الكوارث اللي حصلت قبل كده.

وزارة الري أعلنت انها عملت جروب واتساب للتنسيق بين أكثر من 30 جهة حكومية، لضمان سرعة الإستجابة أول ما أي أزمة تحصل، في نفس الوقت اللي صرفت الحكومة فيه ملايين الدولارات على بناء سدود، عشان يقدروا يحموا المناطق من الفيضانات خاصة سيناء والغردقة وسوهاج والوادي الجديد.

خبراء الأرصاد اتوقعوا إن 11 محافظة مصرية تواجه السيول السنة دي، وبيقولوا إن استعدادات الحكومة السنة دي هي الأفضل لو قارنتها بالسنين اللي فاتت، موسم المطر هيبتدي مع يناير لحد نص فبراير، وهي نفس الفترة اللي الخبراء بيتوقعوا إن السيول تحصل فيها.

أستاذ الموارد المائية "نادر نور الدين" بيقول إن الحكومة ممثلة في وزارة الري عاجزة عن مواجهة السيول، زي اللي حصل في السنين اللي فاتت" وقال إن الحكومة ما نجحتش في مواجهة السيول في إسكندرية والبحر الأحمر السنة اللي فاتت، والمتوقع إن السنة دي يبقى في محافظات أكتر تتعرض لسيول شديدة.

السنة اللي فاتت، السيول اللي ضربت محافظات القناة وسيناء والبحر الأحمر وسوهاج، اتسببت في قتل العشرات منهم أطفال، واتقطعت الخدمات في بعض المدن.

وتعتبر كوارث السيول أزمة بتتكرر كتير في مصر كل سنة، وأبشع كارثة حصلت هي السيول اللي ضربت أسيوط سنة 1994 وقتلت 270 شخص ع الأقل.