من 3 سنين بدأ الدكتور البيطري "محمود عوض الصياد"، اهتمامه بمعالجة الحيوانات الضالة في الشارع مجانًا في أكتوبر وطريق الواحات والفيوم، بعد ما لفت نظره في 2015 بوست على الفيسبوك من خلاله كان في شاب بيستنجد بحد يساعد كلب بلدي مصاب بكسر في رجله في منطقة الشيخ زايد. وقتها اتصل بيه الدكتور وطلب منه يجي له حدائق أكتوبر وهو "هيتكفل بكل حاجة". "الصياد" قال لموقع مصراوي إن أكتر حاجة بتفرق معاه هي إنقاذ حياة الحيوان، "لحظة ما بيخف باحس بسعادة كبيرة".

الدكتور بيستقبل الكلاب البلدي والقطط في المستشفى الخاصة بتاعته، اللي معلَّق عليها يافطة بيعلن فيها عن مبادرته لمعالجة الحيوانات مجانًا، وبيعمل لهم فحوصات عشان يعرف حالتهم بالظبط قبل ما يبدأ علاجهم. ولمَّا بيخفوا بيتواصل مع جمعيات رعاية الحيوان عشان يضمن له مكان يعيشوا فيه بدل الرجوع للشارع.

"الصياد" كان جاي له في التنسيق طب بشري، لكن اختار طب بيطري بمزاجه لشغفه بعالم الحيوانات، "أنا فاكر لما روحت مكتب التنسيق أغير لبيطري، المسؤولة فضلت تقولي يا ابني بلاش، طب ادخل أسنان ولا صيدلة أحسن". بيقول "الصياد" إن أغلب حيوانات الشارع بتتخبط من عربيات وموتوسيكلات وتكاتك، بسبب السلوك السيء من بعض المواطنين وعدم اهتمامهم بالحيوانات بل ومعاملتهم بعنف في أحيان كتير. "لو الناس خدت بالها من الطريق واستنت الكلاب تعدّي ده هيبقى أحسن كتير".